ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី ១៣ ខែសីហា ឆ្នាំ២០២១ បានសម្រេចឃុំខ្លួនបុរសម្នាក់ ដាក់ពន្ធនាគារ ជាបណ្តោះអាសន្ន ជាប់ពាក់ព័ន្ធនឹងបទល្មើសឆបោក ដោយ មានស្ថានទម្ងន់ទោស ។
យោងតាមដីកាឃុំខ្លួនរបស់ចៅក្រមស៊ើបអង្កេត បានអោយឈ្មោះ ជនជាប់ចោទរូបនេះ មានឈ្មោះ ហ៊ឹ ម សុភាព ហៅជា សុភាព អាយុ ៥១ឆ្នាំ មុខរបររត់ម៉ូតូឌុប រស់នៅនៅសង្កាត់ស្ទឹងមានជ័យ ខណ្ឌមានជ័យ។
ជនជាប់ចោទឈ្មោះ ហ៊ឹម សុភាព ត្រូវបានតំណាងអយ្យការអមសាលាដំបូងរាជធានីភ្នំពេញ ចោទប្រកាន់ ពីបទឆបោកដោយ មានស្ថានទម្ងន់ទោសតាមមាត្រា ៣៧៧ និងមាត្រា ៣៨០ នៃក្រមព្រហ្មទណ្ឌ ដែលប្រឈមនឹងជាប់ពន្ធនាគារ រយៈពេលពី២ ទៅ៥ឆ្នាំ ប្រសិនបើរកឃើញពីពិរុទ្ធភាព។
ជនជាប់ចោទត្រូវបាន ចាប់ឃាត់ខ្លួនដោយកម្លាំងសមត្ថកិច្ច អង្គភាពប្រឆាំងអំពើពុករលួយ (ACU) កាលពីថ្ងៃ ទី ១១ សីហា បន្ទាប់ពីជននេះ តែងបានដើរតួធ្វើជាមន្ត្រីបម្រើការងារនៅអង្គភាព ACU ដោយ បានយកតួនាទីនោះ ទៅគំរាមយកប្រាក់ពីមន្ត្រីរាជការសាធារណៈថ្នាក់ស្រុក-ខេត្ត រហូតបែកធ្លាយមានពាក្យបណ្តឹងប្តឹងផ្តល់ទៅអង្គភាពប្រឆាំងអំពើពុករលួយ ទើបឈានដល់ការចាប់ខ្លួនរបស់គាត់តែម្តងទៅ៕រក្សាសិទ្ធិដោយ ចន្ទា ភា
