ខេត្តព្រះសីហនុ ៖ ប្រជាពលរដ្ឋរស់នៅទីប្រជុំជនក្នុងក្រុង ព្រះសីហនុភាគច្រើន បានរអ៊ូរទាំចំពោះការដាច់ចរន្តអគ្គិសនី និងប្រព័ន្ធទឹកស្ទើរជារៀងរាល់យប់ថ្ងៃ ដែលនាំឲ្យពួកគេជួបផលវិបាកទាំងការរស់នៅ និងប្រកបរបរចិញ្ចឹមជីវិត។
ផ្តើមពីបញ្ហានេះ ប្រជាពលរដ្ឋ បានសំណូមពរឲ្យ លោក ហេង ពិសិដ្ឋ ប្រធានអគ្គិសនីខេត្តព្រះសីហនុ និងថ្នាក់ដឹកនាំស្ថាប័នរដ្ឋាករទឹកខេត្តនេះ ជាពិសេស លោក យន្ត មីន អភិបាលខេត្តព្រះសីហនុ ឲ្យជួយអន្តរាគមន៍ ធ្វើយ៉ាងណាឲ្យទីក្រុងទេសចរណ៍មួយនេះ មានទឹកភ្លើង ដើម្បីផ្គត់ផ្គង់ជូនប្រជាពលរដ្ឋ និងភ្ញៀវទេសចរប្រើប្រាស់ឲ្យបានគ្រប់គ្រាន់ឡើងវិញ។
ប្រជាពលរដ្ឋមួយចំនួនរស់ក្រុងព្រះសីហនុ បានរអ៊ូរទាំថា ក្រៅពីចរន្តអគ្គិសនីបានដាច់ស្ទើរជារៀងរាល់យប់ថ្ងៃ ក្រុងទេសចរណ៍មួយនេះ ក៏មិនមានទឹកសម្រាប់ប្រើប្រាស់ប្រចាំថ្ងៃឲ្យបានគ្រប់ចំនួននោះដែរ។ ពោលគឺ ប្រព័ន្ធចែកចាយទឹក បានកាត់ផ្តាច់ បើកទឹកមិនចេញ ឬមានទឹកប្រើដែរ ប៉ុន្តែក្នុងមួយថ្ងៃមានទឹកប្រើប្រាស់ចន្លោះពី ២ ទៅ ៣ម៉ោង ឬបើកទឹកចេញនៅពេលយប់ជ្រៅជាដើម។
បញ្ហានេះ ប្រជាពលរដ្ឋ មានចម្ងល់ថា ហេតុអ្វីបានជាទីប្រជុំជនក្នុងក្រុងព្រះសីហនុ ដែលជាក្រុងទេសចរណ៍ទើបឈ្នះជ័យលាភីទីក្រុងស្អាតទទួលបាន “ផ្ការំដួលបីទង” ពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាថ្មីៗនេះ ប៉ុន្តែបែរជាក្នុងក្រុងស្ទើរទាំងមូល មិនមានទឹកភ្លើង ឬដាច់ប្រព័ន្ធទឹក និងចរន្តអគ្គិសនីស្ទើររាល់ថ្ងៃបែបនេះទៅវិញទេ។
ក្រុមប្រជាពលរដ្ឋ ឲ្យដឹងទៀតថា នៅគ្រាខេត្តព្រះសីហនុ មានរោងចក្រអគ្គីសនីដ៏ធំមួយកន្លែង មានទីតាំងនៅឃុំអូរត្រេះ ស្រុកស្ទឹងហាវ និងមានអាងស្តុកទឹកដ៏ធំមួយទៀត នៅតំបន់ក្បាលឆាយ ដែលពលរដ្ឋរស់នៅមូលដ្ឋាននេះ រំពឹងថា មានទឹកភ្លើង សម្រាប់ផ្តល់ជូនប្រជាពលរដ្ឋ រស់នៅទីប្រជុំជនក្នុងក្រុងព្រះសីហនុ បានគ្រប់គ្រាន់តាមតម្រូវការ ប៉ុន្តែហេតុអ្វីបានជាក្រុងទេសចរណ៍ជាប់បាត់សមុទ្រមួយនេះ បែរជាខ្វះទឹកភ្លើង សម្រាប់ផ្តល់ជូនពលរដ្ឋប្រើប្រាស់ទៅវិញ។
ត្រង់ចំណុចនេះ ប្រជាពលរដ្ឋមួយចំនួន រស់នៅក្នុងក្រុងព្រះសីហនុ បង្ហាញចម្ងល់ថា ហេតុអ្វីបានជាការផ្គត់ផ្គង់ទឹកភ្លើងក្នុងក្រុងទេសចរណ៍មួយនេះ បែរជាមិនបានគ្រប់គ្រាន់ តាមតម្រូវការប្រើប្រាស់ប្រចាំថ្ងៃ របស់ប្រជាពលរដ្ឋ ឬមួយមានអ្វីនៅពីក្រោយការផ្តាច់ប្រព័ន្ធទឹកភ្លើង នាទីប្រជុំជនក្នុងព្រះសីហនុនាពេលបច្ចុប្បន្ននេះ។
ងាកមក ស្ថាប័នរដ្ឋាករទឹកខេត្តព្រះសីហនុឯណោះវិញ ប្រជាពលរដ្ឋមួយចំនួន រស់នៅទីប្រជុំជនក្នុងក្រុងព្រះសីហនុ ក៏រិះគន់ថ្នាក់ ដឹកនាំស្ថាប័ននេះ ចំពោះការដាច់ប្រព័ន្ធទឹក ឬគ្មានទឹកប្រើប្រាស់ជាប្រចាំថ្ងៃ ឲ្យបានគ្រប់ចំនួន នៅតាមតំបន់ខ្លះក្នុងប៉ុន្មានខែចុង ក្រោយនេះ។ ប្រជាពលរដ្ឋអះអាងថា ប្រព័ន្ធផ្គត់ផ្គង់ទឹកស្អាតនាទីក្រុងព្រះសីហនុពេលបច្ចុប្បន្ន គឺបានដាច់ស្ទើរជារៀងរាល់ថ្ងៃ ហើយពួកគេគ្មានទឹកសម្រាប់ងូត និងបោកគត់សម្លៀកបំពាក់ជាប្រចាំថ្ងៃឲ្យបានគ្រប់ចំនួនដូចពេលមុនទៀតទេ។
យ៉ាងណាក៏ដោយចុះ អ្នកយកព័ត៌មានគេហទំព័រ CEN.COM.KH ប្រចាំខេត្តព្រះសីហនុ មិនទាន់អាចទាក់ទង លោក ហេង ពិសិដ្ឋ ប្រធានអគ្គិសនីខេត្តព្រះសីហនុ និងថ្នាក់ដឹកនាំអង្គភាពរដ្ឋាករទឹកខេត្តនេះ ដើម្បីបំភ្លឺបន្ថែម ជុំវិញមូលហេតុនាំឲ្យមូលដ្ឋាននេះ ដាច់ចរន្តអគ្គិសនី និងប្រព័ន្ធទឹកស្ទើររាល់យប់ថ្ងៃ មិនអាចផ្តល់ជូនប្រជាពលរដ្ឋឲ្យបានគ្រប់ចំនួនតាមតម្រូវការបានទេ នៅរសៀលថ្ងៃព្រហស្បតិ៍ ទី២៩ ខែមីនា ឆ្នាំ២០១៨។ ប៉ុន្តែយោងតាមសេចក្តីជូនដំណឹង មានចុះហត្ថលេខា និងបោះត្រាដោយ លោក ហេង ពិសិដ្ឋ ប្រធានអគ្គីសនីខេត្តព្រះសីហនុ បានចេញសេចក្តីជូនដំណឹងជាបន្តបន្ទាប់ អំពីមូលហេតុនៃការផ្តាច់ចរន្តអគ្គិសនី ឬផ្អាកការផ្គត់ផ្គង់ចរន្តអគ្គិសនីនេះជាបណ្តោះអាសន្ននៅតាមតំបន់ ឬទីតាំងមួយចំនួននៅក្នុងទីប្រជុំជនក្រុងព្រះសីហនុ និងតាមស្រុកមួយចំនួនទៀត។
សេចក្តីជូនដំណឹងនេះ របស់អគ្គិសនីខេត្តព្រះសីហនុ ជុំវិញការផ្អាកការផ្គត់ផ្គង់ចរន្តអគ្គិសនីនៅតាមតំបន់មួយចំនួនខាងលើនេះ គឺបានបង្ហោះ នៅលើគេហទំព័រ ឬផេក (PAGE) របស់អគ្គិសនីខេត្តព្រះសីហនុ។ បន្ថែមលើនេះ លោក ហេង ពិសិដ្ឋ ក៏បានស្នើការយោគ យល់ពីសំណាក់មន្ត្រីរាជការ វិស័យេកជន និងបងប្អូនប្រជាពលរដ្ឋទូទៅ ចំពោះការកាត់ផ្តាច់ចរន្តអគ្គិសនីនៅតាមតំបន់មួយចំនួន ដើម្បីឲ្យអ្នកបច្ចេកទេសតម្លើង ឬជួសជុលប្រព័ន្ធភ្លើង ឬចរន្តអគ្គិសនីខេត្តនេះឲ្យបានល្អ និងឈានទៅអាចផ្គត់ផ្គង់ចរន្តអគ្គិសនីជូនប្រជាពលរដ្ឋ នៅមូលដ្ឋានខេត្តព្រះសីហនុ ឲ្យបានប្រសើរនាថ្ងៃខាងមុខ៕ ដែន សីមា
