ភ្នំពេញ៖ ក្រុមហ៊ុនអចលនទ្រព្យ LSCG និង ក្រុមហ៊ុន Milky-Way Realty Investment PLC បានបោះទុនដំបូងរួមគ្នា ១លានដុល្លារ បង្កើតវគ្គបណ្តុះបណ្តាលភ្នាក់ងារអចលនទ្រព្យស្តង់ដាចំនួន ១០០០នាក់ តាមបច្ចេកវិទ្យាទំនើប របស់ប្រទេសចិន និងបច្ចេកវិទ្យារបស់ខ្មែរ ដើម្បីឆ្លើយតបទៅនឹងតំរូវការទីផ្សារអចលនទ្រព្យជាតិ និង អន្តរជាតិនាពេល បច្ចុប្បន្ន និង អនាគត ខណៈដែលពិភពលោក ក៏ដូចជាកម្ពុជា កំពុងតែរងនូវការរាតត្បាតពីជំងឺឆ្លងកូវីដ១៩។
លោក លី សុខឆាយ អ្នកជំនួញវ័យក្មេង និងអគ្គនាយកក្រុមហ៊ុន LSCG បានមានប្រសាសន៍ថា ការសហការបោះទុន បង្កើតវគ្គបណ្តុះបណ្តាលភ្នាក់ងារអចលនទ្រព្យស្តង់ដាចំនួន ១០០០នាក់នេះឡើង គឺជាចំណុចចាប់ផ្តើមដំបូងដែលក្រុមហ៊ុនទាំងពីរ បានគិតគួរតាំងពីជាង ២ឆ្នាំមុន កូវីដកើតមកម្លេះ តែដោយសារតែស្ថានភាពនៃជំងឺរាតត្បាតកូវីត ១៩ ចេះតែបន្តអូសបន្លាយយូ បានជម្រុញឱ្យ ក្រុមហ៊ុនទាំងពីរ ពន្យាពេលចាប់ផ្តើមមគំរោងរហូតមកទល់ពេលបច្ចុប្បន្ននេះ ។
អ្នកជំនួញវ័យក្មេង ដែលមានជំនាញខ្ពស់ ក្នុងវិស័យអចលនទ្រព្យ រូបនេះ ធ្លាប់បានបង្ហើបឱ្យដឹងថា ដោយយោងតាមការសង្កេត មើលពីស្ថានភាពសេដ្ឋកិច្ច និង អចលនទ្រព្យ នាពេលបច្ចុប្បន្ន គឺហាក់ដូចជាមានស្ថានភាពមិនសូវល្អនោះទេ ពោលគឺការទិញលក់អចលនទ្រព្យ ភាគច្រើន មានការធ្លាក់ចុះជាគំហុក ប៉ុន្តែ សម្រាប់លោកផ្ទាល់បែរជាមើលឃើញថា នៅក្នុងកាលៈទេសៈ បែបនេះ វាជា ឱកាសមាសដ៏កម្រមួយ ដែលកំពុងតែបង្កប់ នៅក្នុងស្ថានភាព ដែលមិនសូវអំណោយផលនេះទៅវិញ ជាពិសេស គឺឱកាស ក្នុងការបោះទុនវិនិយោគលើការផ្គត់ផ្គង់គម្រោងអចលនទ្រព្យធំៗ មួយចំនួននេះតែម្ដង។ បើទោះបីមានការរំខានពីជំងឺរាតត្បាតកូវីដ១៩ វិស័យអចលនទ្រព្យបានដើរតួនាទីយ៉ាងសកម្ម ជាឆ្អឹងខ្នងសេច្ឋកិច្ចរបស់ជាតិ ដោយមិនអាចខ្វះបាន។
លោក ប៉ាត់ ចំណាន សហស្ថាបនិកក្រុមហ៊ុនអចលនទ្រព្យ Milky-Way Realty Investment PLC បានឱ្យដឹងដែរថា ក្រុមហ៊ុន បានផ្តោតទៅលើបច្ចេកវិទ្យា ផ្សារភ្ជាប់ជាមួយអចលនទ្រព្យ ដោយបង្វឹកភ្នាក់ងារអចលនវត្ថុឲ្យមានជំនាញច្បាស់លាស់ ឆ្លើយតបចំពោះទីផ្សារបច្ចុប្បន្ន៕
