ភ្នំពេញ ÷ អគ្គិភ័យ បានឆាបឆេះផ្ទះមួយកន្លែង បង្កឡើងដោយរឿងជម្លោះទាស់ទែង ប្តីប្រពន្ធ២នាក់ ដោយប្រពន្ធបានយកសាំងទៅដុតពូក បណ្តាលឲ្យឆាបឆេះផ្អើលពលរដ្ឋជិតខាង សុំអន្តគមន៍រថយន្តពន្លត់អគ្គិភ័យមកជួយបន្ទាន់។
ហេតុការណ៍គ្រោះអគ្គិភ័យនេះដែរ បានកើតឡើងកាលពីវេលាម៉ោង១ និង១៥នាទីរសៀលថ្ងៃទី១៨ ខែសីហា ឆ្នាំ២០២១ ចំណុចជិតនិងស្ពានអាកាសស្ទឹងមានជ័យ ស្ថិតនៅតាមបណ្តោយផ្លូវព្រះមុន្នីរ៉េត ក្នុងសង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។
ម្ចាស់ផ្ទះជាប្តីឈ្មោះ គឹម វាសនា ភេទប្រុស អាយុ ៣៦ឆ្នាំមុខរបរ កម្មករ ។ ប្រពន្ធឈ្មោះ ជុំ រំដួល ភេទស្រី អាយុ ៣៣ឆ្នាំ មុខរបរ អ្នកលក់ខោអាវ។ ហេតុការណ៍នេះកើតឡើង ដោយមូលហេតុ ប្រពន្ធដុតពូក។
យោងតាមប្រភពព័ត៌មានពីពលរដ្ឋ នៅជាប់កន្លែងកើតហេតុ បានឲ្យដឹងថាដោយឃើញប្តីប្រពន្ធ២នាក់ បានឈ្លោះទាស់ទែងនិងប្រកែកគ្នាខ្លាំងៗ បន្ទាប់មកប្រពន្ធចិត្តធំ បានចុះទៅទិញសាំងចាក់លើពូក រួចបានដុតឆេះអណ្តាលភ្លើងឡើងសន្ធោសន្ធៅ បន្ទាប់់មកពលរដ្ឋជិតខាង បានទាញបំពង់ពន្លតអគ្គិភ័យបាញ់ទប់ស្កាត់ រួចក៏រាយការណ៍ទៅសមត្ថកិច្ចមូលដ្ឋាន សុំរថយន្តពន្លត់អគ្គិភ័យមកជួយបាញ់ពន្លត់ជាបន្ទាន់។
បន្ទាប់ពីរថយន្តបង្កាពន្ត់អគ្គិភ័យ ទទួលដំណឹងថា មានឆេះផ្ទះពលរដ្ឋមួយកន្លែង នៅខណ្ឌបឹងកេងកង ក៏បានចេញរថយន្តមកជួយបាញ់ពន្លត់ ចំនួន៤គ្រឿងមកជួយបាញ់ពន្លត់ភ្លាមៗផងដែរ។
ក្រោយបាញ់ពន្លត់ចប់ឃើញថា មិនមានរាលដាលទៅលើផ្ទះពលរដ្ឋ ជិតខាងនោះទេ មិនមានអ្នករបួស និងមិនមានអ្នកស្លាប់ រងការខូចខាត អស់ពួក១ទាំងស្រុង និងសម្ភារមួយចំនួន។ ត្រូវសមត្ថកិច្ចឃាត់ខ្លួន យកទៅប៉ុស្តិ៍នគរបាលរដ្ឋបាលសង្កាត់ទំនប់ទឹក ដើម្បីធ្វើការសួរនាំបន្ត៕ រក្សាសិទ្ធិដោយ៖ សា មេត
