វីដេអូថ្មីមួយ ឃើញថាបានកំពុងមានការចាប់អារម្មណ៍ និងអស់សំណើចយ៉ាងខ្លាំងតែម្តង ពីសំណាក់អ្នកលេងបណ្តាញសង្គម នៅពេលបានឃើញប៉ូលីសម្នាក់ ខណៈកំពុងឈរសុខៗនៅក្បែរបង្គោលភ្លើង លើខឿនពុះចែកទ្រូងផ្លូវ ស្រាប់តែរថយន្តធុនទំនើប១គ្រឿង បានបើកសំដៅចំតែម្តង ហាក់ដូចចងគំនុំពីអង្កាល់ ប៉ុន្តែ សំណាងណាស់ ដែលប៉ូលីសរូបនោះ បានរត់គេចទាន់។
តាមរយៈវីដេអូ ហេតុការណ៍ដ៏ញាក់សាច់នេះ បានកើតឡើងនៅវេលាម៉ោង ២ និង ៥៩ នាទី រសៀល ថ្ងៃទី១៦ ខែសីហា ឆ្នាំ២០២១។ ប៉ុន្តែ គេពុំបានបញ្ជាក់ឲ្យដឹង ពីទីកន្លែងកើតហេតុស្ថិតនៅទីកន្លែងណានោះទេ។
ក្រោយពេលបង្កហេតុ រថយន្តនោះបានព្យាយាមបើករត់គេចទាំងស្លន់ស្លោ សឹងតែបុកយានយន្តអ្នកដំណើរដទៃ ដោយគេចខ្លួនយ៉ាងលឿនទាំងធ្លាក់កាងខាងមុខរថយន្តតែម្តង។ តែទោះយ៉ាងណា ក្នុងករណីនេះផងដែរ អាចប្រហែលដោយសារអ្នកបើកបរខ្វះការប្រុងប្រយ័ត្ន ទើបបណ្តាលឲ្យរ៉េចង្កូត បុកបង្គោលភ្លើងចំកន្លែងប៉ូលីសកំពុងឈរបែបនេះ។
ដោយឡែក អ្នកលេងបណ្តាញសង្គមវិញ ជាពិសេសអ្នកចែករំលេកវីដេអូ ដែលប្រហែលធ្លាប់ត្រូវប៉ូលីសពួនចាប់ផាកពិន័យ ក៏បានដាក់ Caption ដាក់ឡើងចំៗថា៖ «រកសុីអោយថ្លៃថ្នូរផង ចេញមុខចំៗទៅ ធ្វេីតាមស្តង់ដារទៅកុំទម្លាប់រកសុីនពួនៗអុីចឹង តាគេខឹងគេដេញបុកអត់ទុកមុខអោយទេ Video នេះមេីលហេីយហាមសេីច»៕ រក្សាសិទ្ធិដោយ៖ លឹម ហុង
