ភ្នំពេញ ៖ ថ្ងៃ៣០មីនា ឆ្នាំ២០១៥-ថ្ងៃ៣០មីនា ឆ្នាំ២០១៨ ថ្ងៃនេះ ជាខួបគម្រប់ ៣ឆ្នាំ នៃមរណភាពលោក ប៉ែន សមិទ្ធិ។ លោក ប៉ែន សមិទ្ធិ ជានិពន្ធនាយកនៃកាសែតរស្មីកម្ពុជា និងជាប្រធានសារព័ត៌មានអេឡិចត្រូនិច CEN ព្រមទាំងជាប្រធានក្លឹបអ្នកកាសែតកម្ពុជា (ក.អ.ក) បានទទួលមរណភាព ក្នុងជន្មាយុ ៥៥ ឆ្នាំ កាលពីវេលាម៉ោង ៧:២០ នាទីព្រឹក ថ្ងៃទី៣០ ខែមីនា ឆ្នាំ២០១៥ ដោយរោគាពាធ។
លោក ប៉ែន សមិទ្ធិ គឺជាអ្នកសារព័ត៌មានកម្ពុជាដ៏មានស្នាដៃលេចធ្លោបំផុតមួយរូប ហើយលោកបានចូលរួមចំណែកយ៉ាងសំខាន់ នៅក្នុងការធ្វើឲ្យមានភាពរីកចម្រើននៃវិស័យសារព័ត៌មាន នៅក្នុងប្រទេសកម្ពុជា។
អ្នកសារព័ត៌មានជាតិ និងអន្តរជាតិទាំងអស់ តែងតែស្គាល់ និងគោរពរូបលោក ដោយសារតែលោក ប៉ែន សមិទ្ធិ ជាអ្នកសារព័ត៌មាន និងជាមេដឹកនាំប្រកបដោយសមត្ថភាព និងចំណេះដឹងខ្ពង់ខ្ពស់ ហើយបានចូលរួមសកម្មភាពជាច្រើន ដើម្បីផលប្រយោជន៍អ្នកកាសែត និងសង្គមទាំងមូល។
ក្នុងពេលតែមួយ លោក ប៉ែន សមិទ្ធិ គឺជាស្ថាបនិកនៃកាសែតរស្មីកម្ពុជា ក្លឹបអ្នកកាសែតកម្ពុជា និងសារព័ត៌មានអេឡិចត្រូនិច CEN។ លោកបានប្រើពេលវេលាពេញមួយជីវិត ដើម្បីការអភិវឌ្ឍក្នុងវិស័យសារព័ត៌មាននៅកម្ពុជា។
អ្នកកាសែតគ្រប់រូប ចាត់ទុកមរណភាពរបស់លោក ប៉ែន សមិទ្ធិ គឺជាការបាត់បង់ដ៏សែនធំធេងនៃវិស័យព័ត៌មាននៅកម្ពុជា និងជាការបាត់បង់មេដឹកនាំ ប្រកបដោយសមត្ថភាព ការទទួលខុសត្រូវ និងព្រហ្មវិហារធម៌។
អ្នកសារព័ត៌មានទាំងអស់ ពិសេសបុគ្គលិកកាសែតរស្មីកម្ពុជា បុគ្គលិកវេបសាយសារព័ត៌មានអេឡិចត្រូនិក CEN និងគណៈកម្មាធិការនាយក ព្រមទាំងសមាជិកក្លឹបអ្នកកាសែតកម្ពុជាទាំងអស់ សូមសម្តែងនូវការសោកស្តាយដ៏ជ្រាលជ្រៅ និងចូលរួមរំលែកទុក្ខយ៉ាងក្រៀមក្រំបំផុត ជាមួយក្រុមគ្រួសារនៃសពលោក ប៉ែន សមិទ្ធិ និងសូមឲ្យវិញ្ញាណក្ខន្ធលោកទៅកាន់សុគតិភព។
លោក ប៉ែន សមិទ្ធិ កើតនៅថ្ងៃទី១៦ ខែតុលា ឆ្នាំ១៩៦០ នៅភូមិកំពង់ចាម ឃុំកំពង់ចាម ស្រុកកំពង់សៀម ខេត្តកំពង់ចាម ក្នុងគ្រួសារកសិករមួយ ដែលមានប្រវត្តិ ជាអ្នកសិក្សារៀនសូត្រ។
កាលពីកុមារភាព លោក ប៉ែន សមិទ្ធិ បានសិក្សានៅសាលាបឋមសិក្សាវត្តដីដុះ ក្នុងស្រុកកំពង់សៀម ខេត្តកំពង់ចាម។ បន្ទាប់មក សិក្សានៅវិទ្យាល័យ ឥន្ទ្រទេវី ទួលគោក ភ្នំពេញ រហូតដល់ឆ្នាំ១៩៧៥។ លោកត្រូវបានចាត់ទុកជាសិស្សឆ្នើម នៅក្នុងថ្នាក់រៀន។
ចាប់ពីឆ្នាំ១៩៧៥-១៩៧៩ លោករស់នៅក្នុងរបបប៉ុលពត នៅភូមិកន្សោមអក ឃុំកន្សោមអក ស្រុកកំពង់ត្របែក ខេត្តព្រៃវែង។
ឆ្នាំ១៩៧៩-១៩៨០ គឺក្រោយរបបប៉ុលពត លោកបានសាងផ្នួសជាសាមណេរ នៅវត្តកំរែង ស្ថិតនៅក្នុងស្រុកបាភ្នំ ខេត្តព្រៃវែង។
ចំពោះការសិក្សាជាន់ខ្ពស់វិញ លោក ប៉ែន សមិទ្ធិ បានទទួលការសិក្សាជាន់ខ្ពស់ជាច្រើន ដូចជា៖
– បានទទួលសញ្ញាបត្រស្រាវជ្រាវវប្បធម៌ខ្មែរ រាជធានីភ្នំពេញ (១៩៨០-១៩៨១)។
-បានទទួលសញ្ញាបត្រជាន់ខ្ពស់ផ្នែកវិទ្យាសាស្ត្រនយោបាយ នៅវិទ្យាស្ថាន ង្វៀនអាយគួក ទី៧ នៃប្រទេសវៀតណាម (១៩៨៤-១៩៨៦)។
– បានទទួលបរិញ្ញាបត្រផ្នែកសារព័ត៌មាន នៅអតីតសហភាពសូវៀត នាឆ្នាំ១៩៨៧។
បទពិសោធន៍ការងារ៖
លោក ប៉ែន សមិទ្ធិ ត្រូវបានចាត់ទុកជាអ្នកសារព័ត៌មានវិជ្ជាជីវ: មានសមត្ថភាពខ្ពស់ និងបានចូលរួមចំណែកយ៉ាងធំធេងបំផុត ធ្វើឲ្យវិស័យសារព័ត៌មាននៅប្រទេសកម្ពុជា មានការរីកចម្រើន។
-ពីឆ្នាំ១៩៧៩-១៩៨១: បុគ្គលិកមន្ទីរឃោសនាការ និងព័ត៌មាន រាជធានីភ្នំពេញ។
-ពីឆ្នាំ១៩៨១-១៩៨៦: ជាអ្នកយកព័ត៌មាន និងក្រោយមក ជាអ្នកនិពន្ធកាសែតភ្នំពេញ
-ពីឆ្នាំ១៩៨៦-១៩៩៣: និពន្ធនាយកកាសែតភ្នំពេញ។
-អនុប្រធានសម្ព័ន្ធអ្នកសារព័ត៌មានកម្ពុជា (១៩៩៦-១៩៩៨)។
-ខែមេសា ឆ្នាំ១៩៩៣ រហូតដល់ឥឡូវនេះ: លោកជាស្ថាបនិក និងជានិពន្ធនាយកកាសែតរស្មីកម្ពុជា។
-ចាប់ពីខែសីហា ឆ្នាំ២០០០មក លោកជាស្ថាបនិក និងប្រធានក្លឹបអ្នកកាសែតកម្ពុជា ដែលដើរតួនាទីយ៉ាងសំខាន់ សម្រាប់ការរីកចម្រើនវិស័យសារព័ត៌មាន នៅកម្ពុជា។
-ខែកក្កដា ឆ្នាំ២០០៨ រហូតមកដល់បច្ចុប្បន្ននេះ: ជាអគ្គនាយកនៃគេហទំព័រ CEN ដែលជាវេបសាយព័ត៌មានខេមរភាសាដ៏លេចធ្លោមួយនៅក្នុងប្រទេសកម្ពុជា។ ក្រោយមក លោកបង្កើតវេបសាយភាសាអង់គ្លេស ដែលមានឈ្មោះថា The Cambodia Herald ដែលមានអាស័យដ្ឋាន www.thecambodiaherald.com។
-ខែកញ្ញា ឆ្នាំ២០០៨ រហូតដល់ឆ្នាំ២០១៥៖ លោកប៉ែនសមិទ្ធិ ជាសាស្ដ្រាចារ្យ នៅដេប៉ាតឺម៉ង់ ប្រព័ន្ធផ្សព្វផ្សាយ និងសារគមនាគមន៍ នៃសាកលវិទ្យាល័យភូមិន្ទភ្នំពេញ DMC៕ ដោយ៖ FB: Ly Menghour
