ករណីអ្នកលក់រកស៊ីគំនិតអាក្រក់ប្រើល្បិចបោកប្រាស់អតិថិជន តាមរយៈអនឡាញ គឺយើងធ្លាប់តែឮនៅពេលទទួលបានលុយវេឲ្យហើយ គឺថាអត់អុីវ៉ាន់ផ្ញើឲ្យអ្នកទិញជារឿយៗ ប៉ុន្តែ អ្វីដែលយើងពិតជាមិននឹកស្មានដល់ទាល់តែសោះនោះ គឺគ្រាដែលថ្មីៗនេះ អ្នកលក់បានផ្ញើឲ្យអ្នកទិញម្នាក់ជាមួយ «ដុំឥដ្ឋ» ដាក់ក្នុងឡាំង ដោយមិនដឹងថាជាការលេងសើច ឬយ៉ាងណានោះទេ។
តែយ៉ាងណាមិញ ករណីខាងលើនេះ មិនបានរំលងផុតប៉ុន្មានថ្ងៃផង ក៏ស្រាប់តែកើតមានរឿងដ៏សែនហួសចិត្តបែបនេះទៀត ដោយអ្នកលក់បានផ្ញើខោអាវឡើងគគ្រេចប្រឡាក់សុទ្ធតែកំអែលក្អួត ដែលធ្វើឲ្យគាត់ជាអតិថិជនរន្ធត់ចិត្តឡើងយំតែម្តង ព្រោះតែមិននឹកស្មានថាអ្នកលក់មើលងាយគាត់ដល់ថ្នាក់នេះសោះឡើយ។
ស្រ្តីជាអតិថិជន បានរៀបរាប់ឲ្យដឹងថា គាត់បានកុម្ម៉ង់ទិញខោខូវប៊យ និងអាវយឺត តាមរយៈ IG online និងឲ្យអ្នកលក់ផ្ញើឲ្យតាមរយៈ J&T។ ប៉ុន្តែ អ្វីដែលមិននឹកស្មានដល់នោះ គឺថាខោអាវគឺប្រឡាក់សុទ្ធតែកំអួត។ ដំបូង គាត់បានគិតថា អ្នកលក់ផ្ញើអុីវ៉ាន់ឲ្យច្រឡំ ប៉ុន្តែ នៅពេលពិនិត្យលេខអ្នកទទួល គឺជាលេខទូរស័ព្ទរបស់គាត់យ៉ាងច្បាស់តែម្តង។
ចំពោះករណីនេះផងដែរ បងប្អូនអ្នកប្រើប្រាស់បណ្តាញសង្គម ដែលពោរពេញដោយកំហឹងឈឺចាប់ជំនួស បានឲ្យស្រ្តីរងគ្រោះព្រោះចាញ់បោកអ្នកលក់តាម IG online ទៅស្នើសុំសាខា J&T ឆែកកាមេរ៉ា ឬតាមរយៈកុង ABA ដើម្បីរកមុខអ្នកផ្ញើមើល នឹងដឹងច្បាស់ថានរណាជាមនុស្សចង្រៃថោកទាបអុីចឹងហើយ។
ជាមួយគ្នានេះផងដែរ ស្រ្តីរងគ្រោះក៏បានផ្តាំផ្ញើដល់បងប្អូនទាំងអស់គ្នា សូមមានការប្រុងប្រយ័ត្ន កុំឲ្យចាញ់បោកគេដូចរូបគាត់តាម IG online ទៀត៕ រក្សាសិទ្ធិដោយ៖ លឹម ហុង
