ភ្នំពេញ ÷ បុរសម្នាក់បានបើករថយន្តកូរ៉េដឹកទំនិញមួយគ្រឿង ក្នុងល្បឿនលឿនដាច់ហ្រ្វាំងមុខ ជាន់មិនជាប់បួងចង្កូត ជ្រុលទៅបុកម៉ូតូជិះដោយប្តីប្រពន្ធឌុបគ្នា កិនពីលើអូសទៅមុខជាច្រើនម៉ែត្រ រួចទៅបុករថយន្តក្រឡុកសុីម៉ងត៍ចតនៅចិញ្ចើមផ្លូវមួយគ្រឿងទៀត រងការខូចខាតយ៉ាងដំណំ។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង៨ និង២០នាទីយប់ថ្ងៃទី២១ ខែសីហាឆ្នាំ ២០២១ ចំណុចរង្វង់មូលទួលគោកចាស់ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។
ជនរងគ្រោះប្តីប្រពន្ធនៅមិនទាន់ស្គាលឈ្មោះនៅឡើយ។
យោងតាមប្រភពព័ត៌មានពីពលរដ្ឋនៅកន្លែងកើតហេតុ បានប្រាប់ឲ្យដឹងថា នៅមុនកើតហេតុគេបានឃើញប្តីប្រពន្ធ បានជិះម៉ូតូម៉ាកហុងដាទ្រីមសង់ សេ១២៥ ពណ៌ក្រហមមួយគ្រឿង ពាក់ផ្លាកលេខ ភ្នំពេញ 1AG- 6901 បានឌុបគ្នាដើរលក់ពងទាជិះតាមបណ្តោយផ្លូវ៥៩២ ក្នុងទិសដៅពីជើងមកត្បូងក្នុងល្បឿនមធ្យម ខណៈពេលជិះមកដល់ចំណុចកើតហេតុ នៅរង្វង់មូលទួលគោកចាស់ ស្រាប់តែគេឃើញបុរសម្នាក់ បានបើករថយន្តកូរ៉េដឹកទំនិញមួយគ្រឿង ពណ៌សពាក់ផ្លាកលេខ ភ្នំពេញ 2AU- 9226 បើកបរតាមបណ្តោយផ្លូវម៉ៅសេទុង ក្នុងទិសដៅពីត្បូងមកជើងក្នុងល្បឿនលឿន ខណៈមកដល់ចំណុចកើតហេតុខាងលើ បានដាច់ហ្រ្វាំងមុខជាន់មិនជាប់បួងចង្កូតជ្រុលទៅបុកម៉ូតូ ប្តីប្រពន្ធ២នាក់ បានដឹកពងទាលក់ ចំពីមុខពេញទំហឹងរួចកិនពីលើអូសទៅមុខ ទៅបុករថយន្តក្រឡុកសុីម៉ងត៍មួយគ្រឿងទៀត ចតនៅចិញ្ចើមផ្លូវបណ្តាលឲ្យស្រ្តីម្នាក់ ជាម្ចាស់ម៉ូតូរងរបួសធ្ងន់ ត្រូវបានរថយន្តសាម៉ុយ ដឹកយកទៅសង្រ្គោះបន្ទាន់ភ្លាមៗ រីឯរថយន្តក្រឡុកសុីម៉ងត៍រងការខូចខាតផ្នែកខាងមុខតិចតួច។ ចំណែកតៃកុងរថយន្តបង្ក ត្រូវសមត្ថកិច្ចឃាត់បានឲ្យនៅដោះស្រាយ នៅកន្លែងកើតហេតុ។
ក្រោយពេលកើតហេតុ សមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ ចុះទៅដល់រួចពិនិត្យ និងធ្វើការវាស់វែង នឹងធ្វើកំណត់ហេតុយករថយន្តបង្កនិងម៉ូតូ ទៅរក្សាទុកនៅអធិការដ្ឋានខណ្ឌទួលគោក រង់ចាំឲ្យភាគីទាំងពីរ ដោះស្រាយនៅពេលក្រោយ៕ រក្សាសិទ្ធិដោយ៖ សា មេត
