ព្រះសីហនុ ៖ មានករណីគ្រោះថ្នាក់ចរាចរណ៍ រវាងរថយន្ដម៉ាកឡិចស៊ីសពាក់ផ្លាកលេខខេមរភូមិន្ទ 01 2-6945 បានបុកម៉ូតូមួយគ្រឿងម៉ាហុងដា ពណ៌ខ្មៅពុំមានផ្លាកលេខ ដែលនៅបណ្ដោយផ្លូវឯករាជ បត់កែងឡើងទៅបេនឡាន មហោស្របចាស់ ទល់មុខស្ថានីយ៍ប្រេងឥន្ទនៈកាល់តិច ស្ថិតក្នុងភូមិ ២ សង្កាត់លេខ២ ក្រុង / ខេត្តព្រះសីហនុ នៅវេលាម៉ោង ១០និង ៥៥នាទីយប់ ថ្ងៃទី២២ ខែសីហា ឆ្នាំ២០២១។
តាមប្រភពព័ត៌មានកន្លែងកើតហេតុ ឲ្យដឹងថា គាត់បានឃើញរថយន្ដទំនើបម៉ាកឡិចស៊ីសមួយគ្រឿង ពាក់ផ្លាកលេខខេមរភូមិន្ទ បើកតាមបណ្ដោយផ្លូវឯករាជ មកដល់ត្រង់ចំណុចកើតហេតុ បានបុកម៉ូតូម៉ាកហុងដាពណ៌ខ្មៅ បានបើកចុះពីផ្លូវបេនឡានមហោស្របចាស់ ឌុបគ្នាពីរនាក់ជិះក្រោយជាស្រ្តី បង្កឲ្យមានរបួសនិងខូចខាតម៉ូតូ មិនបានចុះមើលភ្លាមៗនោះ ក៏ព្យាយាមបើករថយន្ដរត់គេច បុគ្គលិកដឹកជញ្ជូនដេញតាមហៅឲ្យមកជួយ ចេញសងកាខូចខាត ពេលស្ទាក់គាត់ជាប់ បែរជាគាត់ជេរប្រមាថគេឯង នៅទីសាធារណៈសុទ្ធតែ អាកញ្ជះគេ សូម្បីតែអ្នកសាព័ត៌មានក៏ជននោះជេរប្រមាថដែរ ។
យោងតាមប្រភពនោះដែរ បានឲ្យដឹងថា បុគ្គលដែលជេរប្រមាថគេឯងនោះ ឈ្មោះ កុសល់ ជាមន្រ្តីកងរាជអាវុធហត្ថខេត្តព្រះសីហនុ មានឋានន្ដរស័ក្តអនុសេនីយ៍ឯក គាត់អាងស័ក្ត អាងខ្លួនជាមន្រ្តីអញ្ចឹង បានជាដើរជេរគេជេរឯង ប្រើពាក្យមិនសមរម្យជាសាធារណៈ ដូច្នេះមិនត្រឹមតែប៉ុណ្ណោះ ប្រើពាក្យថា អញបុកមួយអញសងមួយ អញបុកពីរអញសងពីរ គាត់អាងទឹកលុយច្រើន ហើយមើលទៅ និយាយបែបជាជនពាល មិនស័ក្តិសមជាពាក្យសំដីមន្រ្តីការពារផលប្រយោជន៍ ឲ្យប្រពលរដ្ឋសោះ។ ទង្វើនិងអាកប្បកិរិយានេះ វាពិតធ្វើប៉ះពាល់យ៉ាងធ្ងន់ធ្ងរ ដល់សិទ្ធិអ្នកដទៃ ក៏ដូចជាប៉ះពាល់មន្រ្តីកងរាជអាវុធហត្ថដទៃទៀត ជាពិសេសវាប៉ះពាលយ៉ាងធ្ងន់ធ្ងរ ដល់មេបញ្ជាការកងរាជអាវុធហត្ថ គឺឯកឧត្តមឧត្តមសេនីយ៍ត្រី ហេង ប៊ុនទី នេះតែម្ដង ដែលឯកឧត្តមមានរគោរពស្រឡាញ់ ពីមហាជនទាំងក្នុងខេត្ត និងក្រៅខេត្ត ព្រោះឯកឧត្តមជាថ្នាក់ដឹកនាំ មានគុណធម៌ សុជីវធម៌ និងវិន័យថ្លៃថ្លូ ប៉ុន្តែបែរជាមានមន្ត្រីក្រោមឱវាទ យករថយន្ដអង្គភាព មកជិះហើយប្រើអាកប្បកិរិយា ច្រងេងច្រងាង អួតក្អេងក្អាង ខ្វះក្រមសីលធម៌មិនស័ក្តិសមជាមន្ត្រីកងរាជអាវុហត្ថទល់តែសោះ ។
ប្រភពដដែលបានបន្តថា បើមានកងរាជអាវុធហត្ថ មានបុគ្គលបែបនេះម្នាក់ ពីរនាក់ទៀត ប្រជាពលរដ្ឋពិតជាអស់ជំនឿ ជឿជាក់ជាពុំខាន ។ ដូចនេះក្នុងនាមពួកគាត់ជាប្រជាពលរដ្ឋ សង្ឃឹមថា ឯកឧត្តមមេបញ្ជាការកងរាជអាវុធហត្ថខេត្ត នឹងចាត់វិធានការលើបុគ្គលបែបនេះជាក់ជាមិនខាន ។
សូមបញ្ជាក់ដែរថា គិតមកដល់ព្រឹកថ្ងៃទី២៣សីហារនេះ ឯកឧត្តម ឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថ បានបញ្ជាក់ថា ចំពោះមន្ត្រីដែលបានប្រើចរិតមិនសមរម្យ នៅតាមទីសាធារណៈនេះ លោកមិនលើកលែងទេ ត្រូវតែអនុវត្តវិន័យ របស់កងយោធពលខេមរភូមិន្ទ៕រក្សាសិទ្ធិដោយ៖CEN
