នៅថ្ងៃទី ៣០ មីនា ក្រសួងការបរទសរុស្ស៊ីបានកោះអញ្ជើញបណ្តាប្រទេសដែលបានបណ្តេញអ្នកការទូតរុស្ស៊ី ដើម្បីប្រគល់សារប្រឆាំង និងធ្វើការប្រកាសព័ត៌មានអំពីវិធានការទាំងឡាយជាការឆ្លើយតបផ្នែកការទូតរបស់រុស្ស៊ី ។
ភ្នាក់ងារសន្តិសុខកំពុងយាមនៅក្រៅស្ថានកុងស៊ុលអាមេរិក ប្រចាំក្រុង Saint Petersburg
សេចក្តីថ្លែងការណ៍របស់ក្រសួងការបរទេសរុស្ស៊ី នៅថ្ងៃ ៣០មីនា បានលើកឡើងច្បាស់ៗថា ក្រសួងការបរទេសរុស្ស៊ីបានកោះអញ្ជើញឯកអគ្គរដ្ឋទូតនៃបណ្តាប្រទេសដែលមានទង្វើមិនស្និទ្ធស្នាលជាមួយរុស្ស៊ី ឬអាចហៅថា “គាំទ្រអង់គ្លេសទាក់ទិនដល់ករណីអតីតចារបុរស
Skripal និងកូនស្រីរងការបំពុល”។
ប្រភពពី Reuterឲ្យដឹងថា ឯកអគ្គរដ្ឋទូតនៃបណ្តាប្រទេសលោកខាងលិចជាអាទិ៍ អាល្លឺម៉ង់ អ៊ីតាលី ។ល។ បានបង្ហាញវត្តមានជាបន្តបន្ទាប់នៅក្រសួងការបរទេសរុស្ស៊ី ។ មុននោះនៅថ្ងៃទី ២៩មីនា រុស្ស៊ីបានប្រកាសបណ្តេញបុគ្គលិកការទូតអាមេរិក ៥៨ និងដកហូតលិខិតអនុញ្ញាតច្បាប់បើកអគ្គកុងស៊ុលអាមេរិក នៅ Saint Petersburg ។
អ្នកនាំពាក្យប្រធានាធិបតីរុស្ស៊ី Dmitry Peskov និយាយថា រុស្ស៊ីបង្ខំចិត្តត្រូវតបតចំពោះការដែលអាមេរិកបណ្តេញអ្នកការទូតរុស្ស៊ី ប៉ុន្តែក្រុងមូស្គូ នៅតែត្រៀមខ្លួនជាស្រេចដើម្បីកសាងទំនាក់ទំនងល្អជាមួយបណ្តាប្រទេសក្នុងនោះមានអាមេរិក។
រុស្ស៊ីពុំបានចាប់ផ្តើមបង្កសង្គ្រាមការទូតណាមួយ ហើយក៏គ្មានពេលណាដែលនឹងបង្កឲ្យមានសង្គ្រាមដាក់ទណ្ឌកម្មគ្នាទៅវិញទៅមក ដូចជាការបណ្តេញអ្នកការទូតជាដើម។
រុស្ស៊ីបង្ខំចិត្តត្រូវមានវិធានការឆ្លើយតបចំពោះបណ្តាទង្វើពុំស្របច្បាប់ និងពុំស្និទ្ធស្នាលក្នុងនោះមានទាំងការដែលអាមេរិកបណ្តេញអ្នកការទូតរុស្ស៊ី និងបិទទ្វារស្ថាប័នកុងស៊ុល ។
សំដៅបង្ហាញសាមគ្គីភាពជាមួយអង់គ្លេស ក្នុងករណីដែលអតីតចារបុរស Sergei និងកូនស្រី Yulia ដែលត្រូវបានបំពុលនៅ Salisbury ប្រទេសអង់គ្លេសកាលពីថ្ងៃ ៤ ខែមីនា កន្លងមកដោយអាមេរិកប្រកាសបណ្តេញអ្នកការទូត ៦០នាក់ របស់រុស្ស៊ី និងបិទទ្វារស្ថានអគ្គកុងស៊ុលរុស្ស៊ីនៅ Seatle ។ ក្រៅពីអាមេរិក មានប្រទេសចំនួន ២៤ នៃសហគមន៍អឺរ៉ុប ក៏បានសម្រេចចិត្តបណ្តេញបុគ្គលិកការទូតសរុប ៦៣ នាក់ របស់រុស្ស៊ីផងដែរ ។
រីឯអង្គការសន្ធិសញ្ញាអាត្លង់ទិកខាងជើង (NATO) ក៏បានកាត់បន្ថយប្រតិភូបុគ្គលិករុស្ស៊ីប្រចាំនៅអង្គការនេះចំនួន ១/៣ ផងដែរ ៕ សូយន