ភ្នំពេញ ៖ បេឡាជាតិសន្តិសុខសង្គមសម្រាប់មន្រ្តីរាជការ បានចេញសេចក្តីជូនដំណឹង នៅថ្ងៃទី២៥ ខែសីហា ឆ្នាំ២០២១ បញ្ជាក់ថា ការបើកប្រាក់គោលនយោបាយរបបសន្តិសុខសង្គម ប្រចាំខែសីហា សម្រាប់២សប្តាហ៍លើកទី២ ជូននិវត្តជន និងជនបាត់បង់សម្បទាវិជ្ជាជីវៈ និងអតីតមន្ត្រីរាជការស៊ីវិល នឹងត្រូវធ្វើឡើងចាប់ពីថ្ងៃទី២៧ ខែសីហា ឆ្នាំ២០២១ តទៅ។
បេឡាជាតិសន្តិសុខសង្គមសម្រាប់មន្រ្តីរាជការ បានឲ្យដឹងទៀតថា ការបើកប្រាក់នេះ គឺចាប់ពីថ្ងៃទី២៧ ខែសីហា ឆ្នាំ២០២១ តទៅ តាមប្រព័ន្ធធនាគារកាណាឌីយ៉ា និងធនាគារអេស៊ីលីដា នៅ២៥ រាជធានី-ខេត្ត ទូទាំងប្រទេស, និវត្តជន និងអតីតមន្រ្តីរាជការស៊ីវិលទាំងអស់ ត្រូវយកភ្ជាប់មកជាមួយនូវសៀវភៅគណនី និងអត្តសញ្ញាណបណ្ណសញ្ជាតិខ្មែរ ឬកាត ATM ដើម្បីប្រើប្រាស់ បើកនៅតាមទូរ ATM របស់ធនាគារដៃគូខាងលើ នៅទូទាំងប្រទេស។
ក្នុងករណីមានបញ្ហាផ្សេងៗ សូមមេត្តាជូនដំណឹងមកកាន់បេឡាជាតិសន្តិសុខសង្គម សម្រាប់មន្រ្តីរាជការស៊ីវិល តាមប្រព័ន្ធទូរស័ព្ទលេខ ÷ ០២៣ ៧២៦ ៤៩១, ០២៣ ៩៨៧ ៥១២ និង ០២៣ ៩៨៧ ៥២៣៕ រក្សាសិទ្ធិដោយ ៖ ពិសិដ្ឋ CEN
