ភ្នំពេញ ៖ ក្រសួងសុខាភិបាល នៅយប់ថ្ងៃទី២៨ ខែសីហា ឆ្នាំ២០២១ បានចេញសេចក្ដីប្រកាសព័ត៌មាន ឱ្យដឹងថា បានរកឃើញមេរោគបំប្លែងថ្មី Delta សរុប ចំនួន ១៧៥២នាក់ គិតចាប់ពីថ្ងៃទី៣១ ខែមីនា ដល់ ថ្ងៃទី២៨ ខែសីហា ឆ្នាំ២០២១ កើតឡើងនៅក្នុងរាជធានី -ខេត្តចំនួន ២៣ លើកលែងតែ ខេត្តកែប និងក្រចេះ ដោយរាជធានីភ្នំពេញ មានចំនួនអ្នកឆ្លងច្រើនជាងគេ។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានក្រើនរំលឹកម្ដងហើយម្ដងទៀត និងសូមឱ្យសាធារណជនប្រុងប្រយ័ត្នខ្ពស់ ការពារខ្លួន កុំភ្លេចខ្លួនឱ្យសោះ ដោយត្រូវចេះផ្លាស់ប្ដូរទម្លាប់ រស់នៅរបស់ខ្លួនឱ្យស្របតាមពាក្យស្លោកដែលថា «រៀនរស់នៅធម្មតាជាមួយវីរុសកូវីដ-១៩ តាមបែបគន្លងប្រក្រតីភាពថ្មី ក្នុងបរិបទប្រយុទ្ធនឹងជំងឺកូវីដ-១៩» ដូចជា ពាក់ម៉ាស់ រក្សាគម្លាតសុវត្ថិភាព បាញ់អាកុលសម្លាប់ប់មេរោគ គោរពវិធានការសុខាភិបាល។
ការធ្វើបែបនេះ សំដៅបង្ការ គ្រប់គ្រង និងកាត់ផ្តាច់នូវខ្សែចម្លងនៃវីរុសកូវីដ-១៩ ជាពិសេស ពពួកប្រភេទ Delta ឬក៏ ប្រភេទថ្មីផ្សេងទៀត ដែលអាចកើតមានក្នុងព្រះរាជាណាចក្រកម្ពុជាយើង ជាយថាហេតុណាមួយ៕ រក្សាសិទ្ធិដោយ ៖ ពិសិដ្ឋ CEN