ភ្នំពេញ ៖ មន្ត្រីអង្គការសង្គមស៊ីវិល និងអ្នកនយោបាយ បានលើកឡើងថា ការទទួលយកជនភៀសខ្លួនអាហ្គានីស្ថាន ចំនួន៣០០នាក់ ដើម្បីស្នាក់នៅជាបណ្តោះអាសន្ននៅកម្ពុជា មុននឹងឆ្ពោះទៅកាន់ប្រទេសទី៣ គឺបង្ហាញពីកាយវិការមនុស្សធម៌ជាអន្តរជាតិ និងជាកាយវិការមួយដ៏ល្អ សម្រាប់ប្រជាជាតិកម្ពុជា ជួយគ្នានៅក្នុងគ្រាលំបាក។
លោកជិន ម៉ាលីន អនុប្រធាន និងជាអ្នកនាំពាក្យគណៈកម្មាធិការសិទ្ធិមនុស្សកម្ពុជា បានមានប្រសាសន៍ថា ការសម្រេចទទួលយកជនភៀសខ្លួនអាហ្គានីស្ថានចំនួន ៣០០នាក់ ឲ្យស្នាក់នៅបណ្តោះអាសន្ននៅកម្ពុជា គឺបង្ហាញពីកាយវិការមនុស្សធម៌ជាអន្តរជាតិ ដែលកម្ពុជាតែងតែប្រកាន់ភ្ជាប់ នាពេលកន្លងមកដូចជា ទទួលយកកប៉ាល់ Westerdam ឲ្យចូលចតនៅកំពង់ផែកម្ពុជានាពេលកន្លងមកនេះ ។ ហើយការសម្រេចនេះ ក៏ជាការចូលរួមក្នុងការលើកស្ទួយ និងការការពារសិទ្ធិមនុស្សជាអន្តរជាតិផងដែរ ពាក់ព័ន្ធទៅនិងសិទ្ធិរបស់ជនភៀសខ្លួននេះ។
ចំណែកលោកខឺយ ស៊ីនឿន អនុប្រធានគណបក្សខ្មែរស្រឡាញ់ជាតិ បានថ្លែងថា នៅពេលដែលបានឃើញការសម្រេចចិត្ត របស់រដ្ឋាភិបាលកម្ពុជាទទួលយកជនភៀសខ្លួន អាហ្គានីស្ថានចំនួន ៣០០នាក់ ឲ្យស្នាក់នៅបណ្តោះអាសន្ននៅកម្ពុជា នេះគឺជាកាយវិការមួយដ៏ល្អសម្រាប់ប្រជាជាតិកម្ពុជា ដែលរដ្ឋាភិបាលធ្វើដោយក្នុងនាមមនុស្សធម៌ ដើម្បីជួយគ្នានៅពេលដែលពិភពលោក ឬក៏ប្រទេសដទៃមានគ្រោះអាសន្ន និងមានបញ្ហា ដែលយើងត្រូវតែជួយគ្នានៅក្នុងគ្រាលំបាក។
រីឯលោកស្រី ពោធីតី សាវត្ថី ប្រធានគណបក្សធម្មាធិបតី បានមានប្រសាសន៍ថា ការជួយជនភៀសខ្លួនអាហ្គានីស្ថានចំនួន ៣០០នាក់ សម្រាប់សុំចត សម្រាប់ត្រៀមឯកសារទៅប្រទេសទី៣ គឺជារឿងល្អ ពីព្រោះជួយគ្នាក្នុងគ្រាអាសន្ន ហើយរាជរដ្ឋាភិបាលធ្វើកកិច្ចការដ៏ត្រឹមត្រូវមួយ ពីព្រោះប្រទេសកម្ពុជា មានចុះហត្ថលេខាកិច្ចព្រមព្រៀងទទួលស្គាល់ ជនភៀសខ្លួនឆ្នាំ១៩៥១ ដូច្នេះត្រូវតែធ្វើខានមិនបានទេ ហើយនេះជាអំពើល្អសម្រាប់មនុស្សធម៌ និងសម្រាប់កេរ្តិ៍របស់ប្រទេសកម្ពុជាផង។
លោក អំ សំអាត នាយករងអង្គការលីកាដូយល់ថា រាជរដ្ឋាភិបាលយល់ព្រម ទទួលយកជនភៀសខ្លួនអាហ្វហ្គានីស្ថាន ចំនួន៣០០នាក់ដើម្បីស្នាក់នៅ បណ្តោះអាសន្ននៅក្នុងប្រទេសកម្ពុជា មុនដែលពួកគេឆ្ពោះទៅប្រទេសទី៣ គឺជារឿងមនុស្សធម៌មួយ ដែលស្ថានការណ៍មួយកំពុងតែមិនល្អនោះ ។
ការយល់ព្រមទទួលជនភៀសខ្លួននេះក៏រាជរដ្ឋាភិបាលកម្ពុជាចង់បង្ហាញពីកាយវិការមនុស្សធម៌មួយ។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានយល់ព្រមទទួលយកជនភៀសខ្លួនអាហ្គានីស្ថាន ចំនួន៣០០នាក់ ដើម្បីស្នាក់នៅជាបណ្តោះអាសន្ន មុននឹងឆ្ពោះទៅកាន់ប្រទេសទី៣។ នេះបើយោងតាមប្រសាសន៍សម្តេចតេជោ ហ៊ុន សែន ថ្លែងប្រាប់បណ្តាញព័ត៌មាន កាលពីថ្ងៃទី២៨ ខែសីហា ឆ្នាំ២០២១ ។
ការយល់ព្រមទទួលយកជនភៀសខ្លួនក្នុងគោលការណ៍មនុស្សធម៌ ដើម្បីស្នាក់នៅកម្ពុជាបណ្តោះអាសន្ននេះ ធ្វើឡើងតាមការស្នើសុំរបស់អង្គការ The Asia Foundation ប្រចាំកម្ពុជា មកកាន់ក្រសួងការបរទេសកម្ពុជា នៅថ្ងៃទី២៨ ខែសីហា ឆ្នាំ២០២១។
អង្គការ The Asia Foundation បានស្នើសុំមករាជរដ្ឋាភិបាលកម្ពុជា ដោយបញ្ជាក់ថា «ដោយផ្អែកលើគោលការណ៍មនុស្សធម៌ មេត្តាពិនិត្យនូវលទ្ធភាពផ្តល់ទិដ្ឋាការ ចូលព្រះរាជាណាចក្រកម្ពុជាដល់បុគ្គលិកអង្គការ The Asia Foundation ប្រចាំប្រទេសអាហ្វហ្កានីស្ថាន ដែលជាពលរដ្ឋអាហ្វហ្កានីស្ថាន និងក្រុមគ្រួសារ សម្រាប់រយៈពេលជាបណ្តោះអាសន្នក្នុងអំឡុងពេល ដែលពាក្យស្នើសុំជាជនភៀសខ្លួនកំពុងតែដំណើរការ»។
ពាក់ព័ន្ធនឹងសំណើខាងលើនេះ សម្តេចតេជោ ហ៊ុន សែន បានសម្រេច៖
១៖ ឯកភាពទទួលយកជនភៀសខ្លួនអាហ្វហ្គានីស្ថាន ក្នុងចំនួនមិនលើសពី៣០០នាក់
២៖ ផ្តល់ទិដ្ឋាការ នៅពេលមកដល់ (Visa on arrival) ដល់ជនភៀសខ្លួនខាងលើ និងអនុញ្ញាតឱ្យជនភៀសខ្លួនទាំងនោះ ប្រើប្រាស់អត្តសញ្ញាណប័ណ្ណសម្គាល់ខ្លួន សម្រាប់ធ្វើជាឯកសារធ្វើដំណើរ និង
៣៖ លើកលែងវិធានសុខាភិបាល សម្រាប់ការធ្វើដំណើរចូលមកកម្ពុជា ដល់ជនភៀសខ្លួនទាំងនោះ ដើម្បីពួកគេអាចធ្វើដំណើរមកកម្ពុជាបាន តែត្រូវអនុវត្តទៅតាមវិធានសុខាភិបាលនានា (ធ្វើតេស្ត និងធ្វើចត្តាឡីស័ក ជាដើម) ដែលបានដាក់ចេញដោយរាជរដ្ឋាភិបាល នៅពេលពួកគេចូលមកក្នុងព្រះរាជាណាចក្រកម្ពុជា។
ដោយឡែកពាក់ព័ន្ធនឹងការស្នាក់នៅរយៈពេលប៉ុន្មានថ្ងៃ ឬប៉ុន្មានខែ ក្រសួងការបរទសកម្ពុជា បាននឹងកំពុងពិភាក្សាបន្ថែមជាមួយការអង្គការ The Asia Foundation ជាបន្តទៀត៕ រក្សាសិទ្ធិដោយ ៖ ចេស្តារ