លោក ហ៊ុន ម៉ានី : ហេតុអីស្ថាប័នបរទេស ឬក៏ស្ថាប័នមិនមែនរដ្ឋាភិបាល មួយចំនួនផ្តល់បរិយាកាស ឲ្យជនមួយចំនួន អាចប្រព្រឹត្តទៅគ្រប់ទិដ្ឋភាពទាំងអស់ ដោយមិនគោរពច្បាប់ទាល់តែសោះ?

ភ្នំពេញ ៖ លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ របស់គណបក្សប្រជាជនកម្ពុជា បានចោទសួរទៅស្ថាប័នបរទេសមួយចំនួន ឬក៏ស្ថាប័នមិនមែនរាជរដ្ឋាភិបាលមួយចំនួន បានផ្តល់យាកាសឲ្យក្រុមជនមួយចំនួនអាចប្រព្រឹត្តទៅ គ្រប់ទិដ្ឋភាពទាំងអស់ ដោយមិនគោរពច្បាប់ ក្នុងការវាយប្រហារមកលើរដ្ឋាភិបាល ក៏ដូចជាការញុះញង់បំភ្លៃបំប៉ោងព័ត៌មានមិនពិត និងជាពិសេសប៉ុនប៉ង ចង់បំបែកបំបាក់សាមគ្គីភាព ឯកភាពផ្ទៃក្នុង របស់គណបក្សប្រជាជនកម្ពុជា។

ការចោទសួររបស់លោកហ៊ុន ម៉ានី គឺមិនបានបង្ហាញឈ្មោះស្ថាប័នបរទេសណាមួយ ឬក៏ស្ថាប័នមិនមែនរដ្ឋាភិបាល ណាមួយនោះទេ?។
លោក ហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាប្រធានសហភាពសហព័ន្ធយុវជនកកម្ពុជា បានចោទជាសំណួរថា ហេតុអីស្ថាប័នបរទេសមួយចំនួន ឬក៏ស្ថាប័នមិនមែនរាជរដ្ឋាភិបាលមួយចំនួន ផ្តល់បរិយាកាសឲ្យជនមួយចំនួន អាចប្រព្រឹត្តទៅគ្រប់ទិដ្ឋភាពទាំងអស់ ដោយមិនគោរពច្បាប់ទាល់តែសោះ? ហាក់បីដូចជាផ្តល់បរិយាកាសឲ្យពួកនេះ ទទួលនៅអភ័យឯកសិទ្ធិ ដើម្បីធ្វើកិច្ចការងារដោយមិនគោរពទៅ តាមអ្វីដែលជាច្បាប់មានជាធរមាន នៅក្នុងព្រះរាជាណាចក្រកម្ពុជា តើជាហេតុផលអ្វី? ហើយតើជាចេតនាដែរឬទេ?។

ការចោទសួររបស់លោក ហ៊ុន ម៉ានី បានធ្វើឡើងនៅក្នុងពិធីអញ្ជើញ ប្រគល់អំណោយជាថវិកា អង្ករជាង ១៤តោន អាវភ្លៀង រួមទាំងអំណោយផ្សេងៗមួយចំនួនទៀត ជូនដល់ស្នងការដ្ឋាននគរបាលរាជធានីភ្នំពេញ នៅព្រឹកថ្ងៃទី០១ ខែកញ្ញា ឆ្នាំ២០២១នេះ។

ការចោទសួរនេះ បានធ្វើឡើងបន្ទាប់ពីក្រុមមន្ត្រី នៃអតីតគណបក្សប្រឆាំង នៅក្រៅប្រទេស រួមទាំងមេឧទ្ទាមក្រៅច្បាប់ បានធ្វើការផ្សព្វផ្សាយព័ត៌មាន មិនពិតពាក់ព័ន្ធនិងកម្ពុជា ជាពិសេសនាពេលថ្មីៗនេះ បានផ្សព្វផ្សាយព័ត៌មានកុហក បោកប្រាស់បំភ្លៃការពិតថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជួបមន្ត្រីអតីតគណបក្សសង្គ្រោះជាតិ នៅប្រទេសបារាំង។

លោក ហ៊ុន ម៉ានី បានមានប្រសាសន៍បញ្ជាក់ថា “ប៉ុនប៉ងចង់បំបែកបំបាក់សាមគ្គីភាព ឯកភាពផ្ទៃក្នុងរបស់ស៊ីភីភី (CPP) ទៅមិនរួចនោះទេ ដូចខ្ញុំបញ្ជាក់មិនមែនលើកទី១ ទេ គេធ្វើកន្លងមក គេធ្វើជាប្រចាំ គេធ្វើរួចស្រេចទៅហើយ ប៉ុន្តែមិនអាចធ្វើរួចនោះទេ។ ហើយចុងក្រោយម្សិលមិញឯកឧត្តម ស សុខា ក៏ចេញក្នុងនាមក្រុមគ្រួសារ ក៏ដូចជាក្នុងនាមជាកូនផង ដើម្បីធ្វើយ៉ាងណាឲ្យមានការពន្យល់ ឲ្យបានច្បាស់លាស់ ហើយអំពាវនាវ ចំពោះអ្វីដែលជាការធ្វើនយោបាយប្រជាភិថុតិនេះ គួរតែឈប់ទៅ សង្គមអភិវឌ្ឍន៍រីកចម្រើន មិនមែនផ្អែកជាល្បិចកំប៉ិចកំប៉ុក ឬក៏ធ្វើជាលក្ខណៈបំផ្លិចបំផ្លាញ ស្ថេរភាពសង្គមជាតិនោះទេ”។

លោក ស សុខា រដ្ឋលេខាធិការក្រសួងអប់រំ យុវជន និងកីឡា បានសរសេរលើហ្វេសប៊ុកផ្លូវការថា ជាបន្តបន្ទាប់ក្រុមអ្នកនយោបាយ ប្រឆាំងមួយចំនួន ដែលធ្វើនយោបាយ តែដើម្បីដូរបាយនោះ បាន និងកំពុងផ្តិតយក ឬភ្ជាប់ជាមួយសម្តេចក្រឡាហោម ស ខេង ដើម្បីស្តារស្ថានភាព និងប្រជាប្រិយភាពរបស់ខ្លួន ឃោសនាកុហកបោកប្រាស់បំភាន់ ក្នុងន័យបំបែកបំបាក់ផ្ទៃក្នុង គណបក្សប្រជាជនកម្ពុជា ដែលកំពុងមាននយោបាយល្អ ទាំងក្នុងប្រទេស និងលើឆាកអន្តរជាតិ ។
លោកបន្តថា ជាមួយគ្នានេះអ្នកវិភាគមួយចំនួន បានលើកយកវត្តមាន សម្តេចក្រឡាហោម អញ្ជើញទៅប្រទេសបារាំង ដើម្បីពិនិត្យសុខភាព ទាញចេញទៅជារឿងបែបនេះ បែបនោះ បំភាន់មតិជាតិ-អន្តរជាតិ ឲ្យយល់ច្រឡំថា គណបក្សប្រជាជនកម្ពុជា កំពុងបែកបាក់ផ្ទៃក្នុង ផ្ទុយស្រឡះពីការពិត ។ គណបក្សប្រជាជនកម្ពុជា គឺជាគណបក្សតែមួយគត់ដែលមានជំហរ និងរក្សាបាននូវសាមគ្គីភាពផ្ទៃក្នុងល្អ រឹងមាំមិនអាចអ្នកណា ឬក្រុមណាមួយបំបែកបាន និងជាក្តីសង្ឃឹមតែមួយគត់របស់ប្រជាជនកម្ពុជា តរៀងទៅ ។

លោក ស សុខា បន្តទៀតថា ក្នុងនាមជាយុវជនជំនាន់ក្រោយមួយរូប និងក្នុងនាមជាក្រុមគ្រួសារ របស់សម្តេចក្រឡាហោម ផងនោះ ខ្ញុំសុំទទូចឲ្យអ្នកនយោបាយប្រឆាំងទាំងនោះ ល្មមចប់សព្វគ្រប់ និងល្មមបញ្ឈប់អត្តចរិតរំលោភបំពានទៅលើគេ ពិសេសទៅលើសម្តេចក្រឡាហោម ស ខេង ដែលគ្រប់យ៉ាងមិនមែន ជាការពិត ព្រោះថា “ល្បែងបោកប្រាស់ តាមយន្តការប្រជាភិថុតិ” របស់ក្រុមអស់លោក គ្មានអ្នកណាជឿទៀតទេ ។

លោកបាបបញ្ជាក់ថា សម្តេចក្រឡាហោម ក៏ដូចជាថ្នាក់ដឹកនាំគណបក្សប្រជាជនកម្ពុជា ផ្សេងៗទៀត គឺបាន និងកំពុងលះបង់ទាំងកម្លាំងកាយ ចិត្ត ដើម្បីកសាងប្រទេសជាតិ ដែលផ្ទុយស្រឡះពីក្រុមអ្នកនយោបាយប្រឆាំងមួយចំនួន បានត្រឹមតែស្រែកបំភាន់ ញុះញង់ បំបែកបំបាក់ ដើម្បីតែផលប្រយោជន៍ខ្លួនឯង និងបក្ខពួករបស់ខ្លួននោះ ។ ក្នុងនាមអ្នកនយោបាយជំនាន់មុន គួរគប្បីធ្វើជាគំរូវិជ្ជមាន សម្រាប់អ្នកនយោបាយជំនាន់ក្រោយ រៀនសូត្រតាម ពិសេសបណ្ដុះមនសិការស្រឡាញ់ជាតិ ជ្រោមជ្រែងជាតិពិតប្រាកដ ចៀសវាងការធ្វេីប្រជាភិថុតិយុវជន ប្រជាជន៕ រក្សាសិទ្ធិដោយ ៖ ចេស្តារ