ឯកឧត្តម ហ៊ុន ម៉ានី ៖ គណបក្សប្រជាជនកម្ពុជា ប្តេជ្ញាបន្តបេសកកម្មរបស់ខ្លួន ក្នុងនាមជាអ្នកបម្រើដ៏ស្មោះត្រង់ របស់ព្រះរាជាណាចក្រកម្ពុជា និងប្រជាជនកម្ពុជា

ភ្នំពេញ ៖ ឯកឧត្តម ហ៊ុន ម៉ានី តំណាងរាស្ត្រមណ្ឌលកំពង់ស្ពឺ និងជាប្រធានសហភាពសហព័ន្ធយុជនកម្ពុជា បានបញ្ជាក់ថា គណបក្សប្រជាជនកម្ពុជា (CPP) ប្តេជ្ញាបន្តបេសកកម្មរបស់ខ្លួន ក្នុងនាមជាអ្នកបម្រើដ៏ស្មោះត្រង់ របស់ព្រះរាជាណាចក្រកម្ពុជា និងប្រជាជនកម្ពុជា កន្លងមក នាពេលបច្ចុប្បន្ន និងតទៅអនាគតសម្រាប់កូនខ្មែរគ្រប់ជំនាន់។ ការបញ្ជាក់របស់ឯកឧត្តម ហ៊ុន ម៉ានី បានធ្វើឡើងតាមរយៈហ្វេសប៊ុកផ្លូវការរបស់ឯកឧត្តម នៅរសៀថ្ងៃទី៣ ខែកញ្ញា ឆ្នាំ២០២១ នេះ។

ឯកឧត្តម បានបញ្ជាក់ថា “គណបក្សប្រជាជនកម្ពុជា (CPP) បានសម្រេចការងាររាប់មិនអស់ ជំរុញភាពរីកចម្រើនរបស់ប្រទេសជាតិ លើវិស័យនយោបាយ សេដ្ឋកិច្ច សង្គម ដោយលើកកម្ពស់ជីវភាពរបស់ប្រជាជនទូទាំងប្រទេស”។

តំណាងរាស្ត្ររូបនេះបានបន្តថា ខ្លួនជាអ្នកនយោបាយក្នុងក្របខ័ណ្ឌគណបក្សប្រជាជនកម្ពុជា ដែលមានបេសកកម្មបម្រើប្រទេស និងប្រជាជនកម្ពុជា។ បេសកកម្មក្នុងការរំដោះជាតិ ស្វែងរកសន្តិភាព បង្រួបបង្រួមជាតិក្រោមរដ្ឋធម្មនុញតែមួយ អភិវឌ្ឍប្រទេសជាតិគ្រប់ដំណាក់កាលដោយចេញពីបាតដៃទទេ និងការនៅជាមួយប្រជាជនគ្រប់គ្រា និងគ្រប់កាលៈទេសៈជាពិសេសក្នុងគ្រាលំបាកមិនថាគ្រោះមហន្តរាយទឹកជំនន់ ឬក្នុងដំណាក់កាលកូវីដ១៩ គណបក្សប្រជាជននៅជាមួយប្រជាជន និងរួមដោះស្រាយបញ្ហា និងផ្តល់ការផ្គត់ផ្គង់ជូនប្រជាជន។

ឯកឧត្តម ហ៊ុន ម៉ានី បានលើកឡើងថា លោកបានស្តាប់ដោយយកចិត្តទុកដាក់ នូវបទយកការណ៍របស់ RFI ជាពិសេសការវិភាគនីមួយៗ។ ឯកឧត្តម ចាត់ទុកថាវាជាមេរៀនបន្ថែម សម្រាប់លោកក្នុងនាមជាអ្នកនយោបាយ ដែលត្រៀមទទួលមតិ និងគំនិតដែលអាចបង្កើនការយល់ដឹងរបស់ឯកឧត្តម ដូចដែលពុកតែងតែអប់រំណែនាំ ជាពិសេសគំនិតដែលឲ្យរូបខ្ញុំបានយល់ច្បាស់ថា អ្វីដែលត្រូវការសម្រាប់ការធ្វើនយោបាយក្នុងក្របខ័ណ្ឌ “នយោបាយដែលមានលក្ខណៈសមស្របទៅនឹងបរិបទ real politik (ដែលកត្តាខាងក្នុងជាកត្តាកំណត់ ក្រោមការជះឥទ្ធិពលពីកត្តាខាងក្រៅ) របស់កម្ពុជាក្នុងនាមជាអ្នកនយោ បាយមកពីគណបក្សដឹកនាំប្រទេសជាតិ។ លោកឈ្មោះ ហ៊ុន ម៉ានី ជាពលរដ្ឋខ្មែរដែលជឿជាក់ ជ្រើសរើស និងបោះឆ្នោតគាំទ្រគណបក្សប្រជាជនកម្ពុជា ដូចប្រជាពលរដ្ឋរាប់លានអ្នក ដែលបានបោះឆ្នោតលើសលប់គាំទ្រCPPគ្រប់ការបោះឆ្នោត។ សំឡេងរបស់ខ្ញុំ ជាសំឡេងពលរដ្ឋខ្មែរមួយរូប”៕ រក្សាសិទ្ធិដោយ ៖ ចេស្តារ