ភ្នំពេញៈ ប៉ូលិសអន្តោប្រវេសន៍កម្ពុជា បានបញ្ជូនក្រុមសង្គមងងឹតចិនចំនួន៦១នាក់ (ស្រី១៣នាក់) ពាក់ព័ន្ធការជម្រិតទារប្រាក់តាមប្រព័ន្ធអ៊ីនធើណេត ទៅប្រទេសចិន នៅព្រឹកថ្ងៃទី២៨ ខែតុលា ឆ្នាំ២០១៧។ ការបញ្ជូនចិនចំនួន៦១នាក់នេះ គឺមានប៉ូលិសចិនមកទទួលយកពីប៉ូលិសកម្ពុជា។
មន្ត្រីជាន់ខ្ពស់អគ្គនាយកដ្ឋានអន្តោប្រវេសន៍ បានឲ្យដឹងថា ការបណ្តេញជនជាតិចិនទាំង៦១នាក់ ចេញពីព្រះរាជាណាចក្រកម្ពុជា តាមប្រកាសរបស់ក្រសួងមហាផ្ទៃ ដោយមានការសហការពីក្រសួងសន្តិសុខជាតិ នៃសាធារណរដ្ឋប្រជាមានិតចិន យកយន្តហោះមួយគ្រឿងមកទទួលយក។
មន្ត្រីដដែលបានបន្តថា ជនសង្ស័យទាំង៦១នាក់ ត្រូវបានធ្វើការបង្ក្រាបកាលពីថ្ងៃទី១៧-២១ ខែតុលា ឆ្នាំ២០១៧ នៅទីតាំងរាជធានីភ្នំពេញ ខេត្តកណ្តាល ខេត្តព្រះសីហនុ ពាក់ព័ន្ធករណីឆបោកគំរាមកំហែង ជម្រិតទារប្រាក់តាមប្រព័ន្ធបច្ចេកវិទ្យា (VOIP)។
សូមជម្រាបថា ជនជាតិចិនទាំង៦១នាក់ ត្រូវបានប៉ូលិសអន្តោប្រវសេន៍កម្ពុជា និងប៉ូលិសចិនចុះបង្ក្រាបកាលពីរសៀលថ្ងៃទី១៧ ខែតុលា ឆ្នាំ២០១៧ នៅក្នុងរាជធានីភ្នំពេញ និងនៅខេត្តកណ្តាល។
ការចុះបង្ក្រាបក្រុមជនជាតិចិនទាំង៦៩នាក់ គឺបានធ្វើនៅទីតាំងពីផ្សេងគ្នា គឺគោលដៅរាជធានីភ្នំពេញ ៦ទីតាំង ធ្វើការឃាត់ខ្លួនជនជាតិចិនបានចំនួន៤៩នាក់ ស្រី៩នាក់ និងនៅគោលដៅខេត្តកណ្តល ចំនួន១ទីតាំង នៅផ្ទះវីឡាមួយកន្លែង ស្ថិតនៅជាប់នឹងផ្លូវជាតិលេខ២១A ស្ថិតក្នុងភូមិសិត្បូ ឃុំសិត្បូ ស្រុកស្អាង ដោយបានឃាត់ខ្លួនជនជាតិចិនចំនួន២០នាក់ ស្រីចំនួន២នាក់៕ ដោយៈ មុនីរាជ
