ភ្នំពេញ៖ “យុវសិស្សដែលទទួលជោគជ័យក្នុងការសិក្សា ដោយទទួលបានជ័យលាភីថ្នាក់ជាតិ ថ្នាក់អន្តរជាតិ ថ្នាក់រាជធានី និងជាសិស្សពូកែប្រចាំសាលា បានអះអាងពីភាពជោគជ័យរបស់ខ្លួនថា នៅពេលនេះហើយដែលភាពជឿជាក់ប្រកបដោយសុទិដ្ឋិនិយម សុច្ឆន្ទៈ បានប្រតិស្ធក្នុងសន្តានចិត្តយើងខ្ញុំ ឲ្យក្លាយទៅជាកម្លាំងចលករក៏ស្រួលស្រាល់ ជំរុញឲ្យយើងខ្ញុំអាចនឹងឈានទៅសម្រេចនូវអនាគតដ៏រុងរឿង។ រាល់បុរេវិនិច្ឆ័យខុសឆ្គង ពហុចិត្តទាបដែលធ្លាប់មានក្នុងអារម្មណ៍ពីមុនមកត្រូវលុបបំបាត់ទាំងស្រុងនាពេលនេះ”។ នេះបើតាមចំណាប់អារម្មណ៍របស់ជ័យលាភីតំណាងឲ្យសិស្សពូកែទូទាំងរាជធានី យុវតី ហឹង មណីរត្ន សិស្សថ្នាក់ទី៩ ផ្នែកអក្សរសិល្ប៍ខ្មែរ នៃវិទ្យាល័យហ៊ុនសែនប៊ុនរ៉ានី ផ្សារដើមថ្កូវ ដែលជាជ័យលាភីមេដាយមាសពីរ ។
យុវតី ហឹង មណីរត្ន បានថ្លែងចំណាប់អារម្មណ៍ កាលពីព្រឹកថ្ងៃទី២៨ខែតុលាឆ្នាំ២០១៧ នៅវិទ្យាល័យសម្តេចហ៊ុនសែនភ្នំពេញថ្មី បានបញ្ជាក់ថា យើងខ្ញុំមិនអាចរីករាយនឹងមានមោទនភាពចំពោះជោគជ័យនេះរហុតភ្លេចខ្លួន ឬព្រងើយកន្តើយ ចំពោះការសិក្សាទៅមុខទៀតនោះទេ ហើយជម្រាបថាជោគជ័យនេះក៏មិនមែនបានមកដោយចែដន្យនោះដែរ វាគឺជាលទ្ធផលនៃការខិតខំប្រឹងប្រែងព្យាយាម សិក្សារបស់យើងខ្ញុំផង គួបផ្សំនឹងការគ្រប់គ្រងរបស់គណៈនាយក និងការណែនាំអប់រំបង្ហាត់ពីអ្នកគ្រូ លោកគ្រុ ការទូន្មានប្រៀនប្រដៅពីអ្នកមានគុណទាំងទ្វេ ព្រមទាំងរៀមច្បងមិត្តភក្តិបានផ្តល់ឯកសារផ្សេងៗ សម្រាប់សិក្សាស្រាវជ្រាវរៀនសូត្រ រហូតយើងខ្ញុំទទួលបានលទ្ធផលដ៏ធំធេងនេះ។ ទោះជាដូចនេះក៏ដោយ ក្នុងនាមអ្នករៀនពូកែ យើងខ្ញុំមិនដែលមានចរិតអួតអាងស្ពប់ខ្ពើមរើសអើង ឬបន្តុះបង្អាប់មិនរាប់អានអ្នករៀនខ្សោយ រៀនអន់ជាងខ្លួននោះទេ គឺមានតែខិតខំលើកទឹកចិត្តណែនាំបង្ហាញពីវិធីរៀនសូត្រ ដើម្បីទទួលបានលទ្ធផលល្អដូចយើងខ្ញុំ។
យុវតីដែលជាសិស្សពូកែរូបនេះ បានលើកឡើងថាចំពោះលទ្ធផលដែលទទួលបាននាពេលនេះ ក៏ឆ្លុះបញ្ចាំងឲ្យឃើញច្បាស់ផងដែរ នូវកាតព្វកិច្ចយើងខ្ញុំបាននិងកំពុងបំពេញចំពោះខ្លួនឯងផង ចំពោះគ្រួសារផង ចំពោះសាលារៀនផង និងចំពោះជាតិមាតុភូមិជាទីស្រឡាញ់របស់យើងខ្ញុំផងដែរ។ យុវតីរូបនេះ ក៏បានផ្តាំផ្ញើដល់ប្រិយមិត្ត យុវជន យុវនារី ប្អូនៗទាំងឡាយណាដែលចូលចិត្តដើរលេងសេពគប់ជាមួយក្រុមក្មេងទំនើង និងមិត្តភក្តិដែលប្រើប្រាស់គ្រឿងញៀន តាមកន្លែងកម្សាន្យនានានោះ ចូរកុំខ្ជះខ្ជាយពេលវេលាឥតប្រយោជន៍ គួរយកពេលវេលាដ៏មានតម្លៃទាំងនោះ សម្រាប់ធ្វើអំពើល្អជួយដល់សង្គមនិងសម្រាប់ការរៀនសូត្រ ដើម្បីទទួលបានលទ្ធផលល្អប្រសើរ នៅដំណាច់ឆ្នាំសិក្សា នៅពេលប្រឡងសញ្ញាបត្រជាពិសេសឲ្យក្លាយទៅជាសិស្សល្អ មិត្តល្អ កូនល្អ ពលរដ្ឋល្អសម្រាប់គ្រួសារនិងសង្គមជាតិ។
យុវតី ហឹង មណីរត្ន ក៏បានសម្តែងនូវអំណរគុណប្រកបដោយកតញ្ញូតាធម៌យ៉ាងជ្រាលជ្រៅបំផុត ចំពោះសម្តេចតេជោ ហ៊ុន សែន នាយករដ្ឋមន្ត្រី ដែលបានគាំទ្រការធ្វើកំណែទម្រង់លើវិស័យអប់រំ ក្នុងនោះមានការបង្កើនគុណភាព និងប្រសិទ្ធភាពនៃសេវាអប់រំ ពង្រឹងការប្រឡងគ្រប់ប្រភេទ អ្នកចេះគឺជាប់ ជាពិសេសការលើកទឹកចិត្តពួកយើងខ្ញុំទាំងអស់គ្នា ឲ្យស្គាល់ពីតម្លៃនៃការសិក្សានិងផលប្រយោជន៍ជាដើម។
ឆ្លើយតបនឹងដំបូន្មានដ៏វិសេសវិសាលរបស់លោកគ្រូអ្នកគ្រូនោះ យុវតី ហឹង មណីរត្ន បានប្តេជ្ញាខិតខំកសាងសមត្ថភាព ដើម្បីក្លាយខ្លួនជាធនធានដ៏សំខាន់ សម្រាប់អភិវឌ្ឍមាតុភូមិយើងឲ្យសម្បូររុងរឿង ប្តេជ្ញាខិតខំកសាងខ្លួនឲ្យក្លាយជាអ្នកស្នងជំនាន់ឲ្យបានជោគជ័យ។
សូមបញ្ជាក់ថា លោកឃួង ស្រេង អភិបាលរាជធានីភ្នំពេញ បានប្រគល់រង្វាន់ជ័យលាភីដល់សិក្សាពូកែថ្នាក់អន្តរជាតិចំនួន៦នាក់, សិស្សពូកែថ្នាក់រាជធានីភ្នំពេញ ជាប់ជ័យលាភីទូទាំងប្រទេសចំនួន១៨នាក់ ដែលក្មួយៗទាំងនេះ, ទទួលបានមេដាយមាស២នាក់ ,មេដាយប្រាក់២នាក់, មេដាយសំរឹទ្ធិ២នាក់ ,វិញ្ញាបនបត្រសិស្សពូកែទូទាំងប្រទេសចំនួន១២នាក់។ សិស្សពូកែទូទាំងរាជធានីភ្នំពេញចំនួន៣០នាក់ សិស្សប្រឡងសញ្ញាបត្រមធ្យមសិក្សាទុតិយភូមិទទួលបាននិន្ទេស A ចំនួន១៩៤នាក់។ ប្រគល់រង្វាន់សិស្សទទួលចំណាត់ថ្នាក់លេខ១ ចំនួន១១៣១នាក់, លេខ២ ចំនួន១១១៧នាក់, លេខ៣ ចំនួន១១៤០នាក់ ដែលសិស្សទាំងអស់ ក៏បានទទួលអំណោយសម្ដេចតេជោហ៊ុនសែន និងសម្ដេចកិតិ្តព្រឹទ្ធបណ្ឌិតប៊ុន រ៉ានីហ៊ុសែន មានសៀវភៅ ប៊ិច កាតាបស្ពាយ និងថវិកាមួយចំនួន ជាការលើកទឹកចិត្តដល់សិស្សឲ្យខិតខំរៀនសូត្រ៕ ដោយ៖កូឡាប
