Thursday, March 28, 2024

ទំនាក់ទំនង : 0716140005

Address : #16 (Borey New World) St. 6A sk . Phnom Penh Thmey kh. Sen Sok ct., Phnom Penh 120913 Office: +85523232725 Tel: 017 93 61 91

រដ្ឋមន្ត្រី​ពាណិជ្ជកម្ម​៖ ស្ថានីយ​ចំណតរថយន្ត​មិត្តភាព​កម្ពុជា​-​ជប៉ុន នឹង​ជួយ​ពង្រឹង​វិស័យ​សេដ្ឋកិច្ច ហេដ្ឋារចនាសម្ព័ន្ធ និង​ទេសចរណ៍​ខេត្ត​កំពង់ឆ្នាំង​

spot_img

​កំពង់ឆ្នាំង​ ៖ លោក ប៉ាន សូរ​ស័ក្តិ រដ្ឋមន្ត្រី​ក្រសួង​ពាណិជ្ជកម្ម បានបង្ហាញ​ជំនឿ​ថា វត្តមាន​ស្ថានីយ​ចំណត រថយន្ត​មិត្តភាព​កម្ពុជា​-​ជប៉ុន ខេត្ត​កំពង់ឆ្នាំង នឹង​ជួយ​ពង្រឹង​សេដ្ឋកិច្ច និង​ហេដ្ឋារចនាសម្ព័ន្ធ​ខេត្ត ព្រមទាំង​បង្កើត​មុខរបរ និង​ប្រាក់​ចំណូល​បន្ថែម​ដល់​ប្រជាជន​ក្នុង​មូលដ្ឋាន​។ លើសពីនេះ ស្ថានីយ​ថ្មី​ក៏​នឹង​ជួយ​លើកកម្ពស់​វិស័យ​ទេសចរណ៍ តាមរយៈ​ការបម្រើ​សេវាកម្ម​ម្ហូបអាហារ ការលក់​វត្ថុ​អនុស្សាវរីយ៍ ឬ​ផលិតផល​ប្រចាំ​ភូមិ​/​តំបន់​ថែមទៀត​។​

​ការ​ថ្លែង​របស់ លោក​រដ្ឋមន្ត្រី បាន​ធ្វើ​នៅក្នុង​ពិធី​ប្រគល់​-​ទទួល និង​សម្ពោធ​ស្ថានីយ​ចំណតរថយន្ត​មិត្តភាព​កម្ពុជា​-​ជប៉ុន ខេត្ត​កំពង់ឆ្នាំង និង​ទិវា​ជាតិ​លើកកម្ពស់​ការប្រើប្រាស់​ផលិតផល​ខ្មែរ លើក​ទី​១ នៃ​យុទ្ធនាកា​រទិញ​ផលិតផល​ខ្មែរ រដូវ​កាល​ទី​៣ ដែល​រៀបចំឡើង​ក្រោម​គណៈអធិបតី​ភាព​របស់ លោក យឹម ឆៃលី ឧបនាយករដ្ឋមន្ត្រី ប្រធាន​ក្រុមប្រឹក្សា​ស្ដារ​អភិវឌ្ឍន៍​វិស័យ​កសិកម្ម និង​ជនបទ និង​ជា​ប្រធាន​គណៈកម្មាធិការ​ជាតិ ជំរុញ​ចលនា​ភូមិ​មួយ​ផលិត ផល​មួយ និង​លោក ហ៊ិ​ដេ​ហិ​សា ហូ​រី​នូ​ឈិ (Hidehisa HORINOUCHI) ឯកអគ្គរាជទូត​ជប៉ុន​ប្រចាំ​នៅ​កម្ពុជា​។​

​នៅក្នុង​ឱកាស​នោះ លោក ប៉ាន សូរ​ស័ក្តិ បានលើកឡើង​ពី​គម្រោង​ពង្រីក​ជាតិ​លេខ​៥ របស់​រាជរដ្ឋាភិបាល ឲ្យក្លាយ​ជា​ផ្លូវ​ដ៏​ធំ​ក្នុង​តំបន់​អាស៊ាន (ASEAN High Way) សំដៅ​បម្រើ​វិស័យ​ទេសចរណ៍ និង​សម្រួល​ពាណិជ្ជកម្ម ហើយ​ស្ថានីយ​ចំណតរថយន្ត​ថ្មី​នេះ នឹង​អាច​ឆ្លើយតប​តម្រូវការ​ឈប់​សំចត​របស់​អ្នកដំណើរ​គ្រប់​ជាតិ​សាសន៍ ព្រមទាំង​សម្រួល​ដល់​ការដឹកជញ្ជូន និង​ការ​ចែកចាយ​ទំនិញ ទៅកាន់​ច្រករបៀង​សេដ្ឋកិច្ច​ខាងត្បូង និង​ច្រករបៀង​ខាងកើត​-​លិច ផងដែរ​។​

​ទន្ទឹម​គ្នា​នោះ លោក​រដ្ឋមន្ត្រី ក៏​បាន​អំពាវនាវ​ដល់​ប្រជាពលរដ្ឋ និង​អ្នកធ្វើ​ដំណើរ​ទាំងអស់ ចូលរួម​ថែរក្សា​សម្ភារៈ​បរិក្ខារ និង​បរិស្ថាន​នៅ​ក្នុង​ស្ថានីយ​ឲ្យបាន​ល្អ និង​បាន​សំណូមពរ​ដល់​អាជ្ញាធរខេត្ត​គ្រប់​លំដាប់ថ្នាក់ ជួយ​សហការ​គ្រប់គ្រង​សន្តិសុខ និង​ថែរក្សា​សុវត្ថិភាព​ជូន​ភ្ញៀវទេសចរ​ជាតិ និង​អន្តរជាតិ ដើម្បី​ថ្លែងអំណរគុណ និង​ផ្តល់​កម្លាំងចិត្ត​ដល់​ប្រទេស​ជប៉ុន ដែល​ជា​ម្ចាស់​ជំនួយ​។​

​បន្ថែម​លើ​នេះ លោក​រដ្ឋមន្ត្រី ក៏​បាន​ថ្លែងអំណរគុណ​យ៉ាង​ជ្រាលជ្រៅ​ដល់​រដ្ឋាភិបាល និង​ប្រជាជន​ជប៉ុន ដែល​កន្លងមក​បាន​ជួយ​កសាង​ហេដ្ឋារចនាសម្ព័ន្ធ​រូបវន្ត​យ៉ាងច្រើន​នៅ​កម្ពុជា តួយ៉ាង​ដូចជា​ចំណតរថយន្ត​មិត្តភាព​កម្ពុជា​-​ជប៉ុន ដែល​បាន​ដាក់​សម្ពោធ​ថ្ងៃនេះ ព្រម​ទាំង​អាជ្ញាធរ​ខេត្ត និង​ស្ថាប័ន​ពាក់ព័ន្ធ ដែល​បាន​សហការ និង​គាំទ្រ​ការអនុវត្ត​គម្រោង​កសាង​ស្ថានីយ​រថយន្ត​នេះ តាំងពី​ដើម​រហូត​ដល់​ចប់​ជា​ស្ថាពរ​។​

​សូមជម្រាបថា ស្ថានីយ​ចំណតរថយន្ត​មិត្តភាព​កម្ពុជា​-​ជប៉ុន ខេត្ត​កំពង់ឆ្នាំង​នេះ គឺជា​សមិទ្ធផល ទី​២ ដែល​ត្រូវបាន​សាងសង់​តាម​លក្ខណៈ​ស្តង់ដារ​អន្តរជាតិ ក្រោម​ជំនួយ​ឥត​សំណង​របស់​រដ្ឋាភិបាល​ជប៉ុន តាមរយៈ​មូលនិធិ​សមាហរណកម្ម​ជប៉ុន​-​អាស៊ាន (JAIF) និង​មាន​ការចូលរួម​ថវិកា​បដិភាគ​ពី​រាជរដ្ឋាភិបាល​កម្ពុជា​។ មូលធិ​និ JAIF ត្រូវបាន​បង្កើតឡើង​នៅ​ក្នុង​កិច្ចប្រជុំ​កំពូល​អាស៊ាន​-​ជប៉ុន កាលពី​ថ្ងៃ​ទី​២៦ ខែ​ធ្នូ ឆ្នាំ​២០០៧ ដើម្បី​ជួយ​អភិវឌ្ឍន៍​ហេដ្ឋារចនាសម្ព័ន្ធ និង​សម្របសម្រួល​ពាណិជ្ជកម្ម នៅក្នុង​ប្រទេស​តំបន់​ទន្លេមេគង្គ​។​

​ដោយឡែក​ចំពោះ​យុទ្ធនាការ​ទិញ​ផលិតផល​ខ្មែរ រដូវ​កាល​ទី​៣ នឹង​ចាប់ផ្តើម​ពី​ខេត្ត​កំពង់ឆ្នាំង បន្ត​ទៅកាន់​ខេត្ត​បន្ទាយមានជ័យ ព្រៃវែង កោះកុង និង​រាជធានី​ភ្នំពេញ ដើម្បី​ទាក់ទាញ​ប្រជា​ពលរដ្ឋ​ខ្មែរ ឲ្យ​ងាក​មក​គាំទ្រ និង​ប្រើប្រាស់​ទំនិញ​ក្នុងស្រុក​កាន់តែច្រើន សំដៅ​កាត់បន្ថយ​ការនាំ​ចូល​ទំនិញ​ពី​បរទេស​។ សម្រាប់​ពិព័រណ៍​ខេត្ត​កំពង់ឆ្នាំង ក៏​ចូលរួម​ពី​ផលិតករ អាជីវករ សមាគម អង្គការ​នានា និង​ក្រុមហ៊ុន​ចំនួន ៦៩ ដែល​មាន​ស្តង់​សរុប ៧៧​ស្តង់ មាន​ដាក់លក់​ផលិតផល​ក​សិ​-​ពាណិជ្ជកម្ម សិប្បកម្ម គ្រឿង​សំណង់ វត្ថុ​អនុស្សាវរីយ៍ ម្ហូបអាហារ និង​ភេសជ្ជៈ ផលិតផល​សុខភាព និង​សម្រស់ សេវា​ទេសចរណ៍ និង​អប់រំ​៕ ​ដោយ ​៖​ បញ្ញា​ស័ក្តិ​

     

spot_img
×