ជាការពិតណាស់ នៅតាមស្រុកភូមិ ជារៀងរាល់ថ្ងៃ ប្រជាពលរដ្ឋតែងតែលេចឮពីការបាត់សត្វឆ្កែចិញ្ចឹមខណៈបើក្រឡេកមកមើលតាមកន្លែងលក់ «សាច់ពិសេស» វិញ គឺលក់គ្មានថ្ងៃស្បើយនោះទេ។
ករណីបាត់សត្វឆ្កែនេះផងដែរ ក៏ត្រូវបានប្រជាពលរដ្ឋនិយាយថា គឺគ្មានអ្នកណាក្រៅពីពួកចោរដើរទាក់ឆ្កែនោះឡើយ។ ជាក់ស្តែង ថ្មីៗនេះ ចោរទាក់ឆ្កែតាមភូមិម្នាក់ បានត្រូវប្រជាពលរដ្ឋចាប់បាននៅនិងកន្លែងតែម្តង ខណៈកំពុងរៀបចំអន្ទាក់ ដើម្បីទាក់ឆ្កែរបស់អ្នកភូមិ នៅទីកន្លែងដែលរូបគេតែងមកធ្វើសកម្មភាព។
ដំបូង ចោររូបនេះដែលលើកហេតុផលថាគ្មានការងារធ្វើ បើទៅធ្វើសំណង់ពិបាកបើកលុយ បានបដិសេធថា រូបគេមកទាក់ទន្សាយប៉ុណ្ណោះ ប៉ុន្តែ ដោយសារតែអ្នកភូមិបានស្គាល់ច្បាស់ឧបករណ៍ទាក់ឆ្កែ នៅទីបំផុត ចោររូបនេះ ក៏បានសារភាពថា បានមកទាក់ឆ្កែនៅទីនេះ២ដងហើយ។
នេះបើតាមគណនីហ្វេសប៊ុកឈ្មោះ Ya Ri Nit ដែលជាម្ចាស់ឆ្កែ បានបង្ហោះវីដេអូបង្ហាញមុខមាត់ចោរនិងបញ្ជាក់ឲ្យបងប្អូនបានដឹងថា៖ មើលមុខអាអ្នកដើរទាក់ឆ្កែគេទៅ តើគួរត្រូវធ្វើយ៉ាងម៉េចអោយសម នឹងទោសរបស់វា បើវាទាក់អស់ឆ្កែមួយដែរហើយ ឆ្កែគេជិតៗហ្នឹង ក៏អស់ប្រហែល ៦ ទៅ ៧ ក្បាលដែរ ហើយក៏បានទាន់ពេលឆ្កែជាប់អន្ទាក់២ផងដែរ៕ រក្សាសិទ្ធិដោយ៖ លឹម ហុង
