បន្ទាយមានជ័យ ៖ មានករណី រន្ទះបាញ់ បណ្តាលឲ្យបុរសម្នាក់ស្លាប់នៅក្បែរផ្ទះ កាលពីថ្ងៃទី៥ ខែមេសា ឆ្នាំ២០១៨ វេលាម៉ោង២៣និង៣០នាទីយប់ នៅចំណុចគោកត្បែង ភូមិក្បាលទន្សោង ឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ។
យោងរបាយការណ៍របស់មូលដ្ឋានកងរាជអាវុធហត្ថស្រុកថ្មពួក បានឲ្យដឹងថា ជនរងគ្រោះមាន ឈ្មោះ ហ៊ុល សឿល អាយុ៥១ឆ្នាំ មានទីលំនៅភូមិស្វាយសរ ឃុំពន្លៃ ស្រុកភ្នំស្រុក ខេត្តបន្ទាយមានជ័យ ស្នាក់នៅបណ្តោះអាសន្ន ធ្វើស្រែចំការនៅចំណុចគោកត្បែង ភូមិក្បាលទន្សោង ឃុំបន្ទាយឆ្មារ ស្រុកថ្មពួក ។ ករណីនេះ គឺមូលហេតុ នៅពេលដែលមានភ្លៀងធ្លាក់ ជនរងគ្រោះខាងលើ បានចុះត្រងទឹកភ្លៀងហើយ ត្រូវបានរន្ទះបាញ់ស្លាប់ នៅនឹងកន្លែងកើតហេតុតែម្តង។ សាកសពជនរងគ្រោះ ត្រូវ បានសាច់ញាតិយកទៅធ្វើបុណ្យតាមប្រពៃណីនៅស្រុកកំណើត៕ ដោយ៖បញ្ញាស័ក្តិ
