ខេត្តបាត់ដំបង ៖ អាហារដ្ឋានចំនួន០២កន្លែង ក្នុងក្រុងបាត់ដំបងត្រូវបានមន្ត្រីជំនាញចុះដកហូតអាជ្ញាប័ណ្ណទេសចរណ៍ និងបិទអាជីវកម្ម ក្រោយបានបើកទទួលភ្ញៀវផឹកស៊ី និងលួចលាក់បើកដំណើរការខារ៉ាអូខេល្មើសផ្ទុយពីការណែនាំ បំពានវិធានការទប់ស្កាត់ការឆ្លងជំងឺកូវីដ។
សេចក្តីសម្រេចដែលចុះហត្ថលេខាដោយឯកឧត្តម ងួន រតនៈ អភិបាលខេត្តបាត់ដំបង ចុះថ្ងៃទី ២៨ ខែ កញ្ញា ឆ្នាំ ២០២១ ដែលត្រូវបានផ្សព្វផ្សាយជាសាធារណៈនៅថ្ងៃទី ៣ ខែតុលានេះ បានឱ្យដឹងថា រដ្ឋបាលខេត្តបាត់ដំបងបានពិនិត្យឃើញថា អាហារដ្ឋានចំនួន ០២ ទីតាំងនេះ បានបើកទទួលភ្ញៀវចូលទទួលទានគ្រឿងស្រវឹង និងលួចលាក់ បើកដំណើរការខារ៉ាអូខេបង្កប់ក្នុងទីតាំងអាជីវកម្ម ដែលបំពានទៅនឹងវិធានការការពារទប់ស្កាត់ការឆ្លងរាលដាលជំងឺកូវីដ ១៩ របស់រាជរដ្ឋាភិបាល និងរដ្ឋបាលខេត្ត។
ដើម្បីពង្រឹងនូវវិធានការរដ្ឋបាល និងចូលរួមការពារទប់ស្កាត់ការឆ្លងរាលដាលជំងឺកូវីដ ១៩ រដ្ឋបាលខេត្ត សូមធ្វើការដកហូតអាជ្ញាបណ្ណទេសចរណ៍ មូលដ្ឋានអាជីវកម្ម អាហារដ្ឋាន គោដុតម្លប់ដូង និងអាហារដ្ឋាន ហង្ស ៩៩៩៩ ចាប់ពីថ្ងៃជូនដំណឹងនេះ។ ម្ចាស់អាហារដ្ឋានទាំង ២ ទីតាំង ក៏ត្រូវទទួលរងការផាកពិន័យតាមគោលការណ៍ច្បាប់ជាធរមានផងដែរ។
ការសម្រេចដកហូតអាជ្ញាបណ្ណនេះ បន្ទាប់ពីប្រធានមន្ទីរទេសចរណ៍ខេត្តបាត់ដំបង លោក អ៊ុច អ៊ុំភីនីស្សារ៉ា បានធ្វើរបាយការណ៍ដាក់ជូនអភិបាលខេត្តបាត់ដំបង កាលពីថ្ងៃទី ២០ ខែ កញ្ញា ឆ្នាំ ២០២១ ពាក់ព័ន្ធការចុះពិនិត្យទីតាំងទាំងពីរខាងលើនេះ។ ក្នុងរបាយការណ៍បានលើកឡើងថា ក្រុមការងារអធិការកិច្ចមន្ទីរទេសចរណ៍ខេត្តបាត់ដំបង បានសហការជាមួយនគរបាលទេសចរណ៍នៃស្នងការនគរបាលខេត្ត បានចុះត្រួតពិនិត្យនៅតាមភោជនីយដ្ឋាន អាហារដ្ឋានទេសចរណ៍ និងតូបលក់អាហារតាមវិថីលក់ម្ហូបអាហារទូទាំងក្រុងបាត់ដំបង។ ជាលទ្ធផលសង្កេតឃើញថា អាហារដ្ឋានពីរទីតាំងរួមមាន អាហារដ្ឋាន ហង្ស ៩៩៩៩ និង គោដុតម្លប់ដូង បានបើកទទួលភ្ញៀវឱ្យចូលទទួលទានគ្រឿងស្រវឹង និងលួចបើកដំណើរខារ៉ាអូខេ ដែលបំពានទៅនឹងសេចក្តីសម្រេចរបស់រាជរដ្ឋាភិបាល។
លោក អ៊ុច អ៊ុភីនីស្សារា ប្រធានមន្ទីរទេសចរណ៍ខេត្តបាត់ដំបងបានប្រាប់ឲ្យដឹងនៅថ្ងៃទី ៣ ខែតុលា ឆ្នាំ ២០២១នេះថា ថ្មីៗនេះដោយសារម្ចាស់អាជីវកម្ម និងអាហារដ្ឋានចំនួន ០២ទីតាំងបានបើកទទួលភ្ញៀវឲ្យមានការសេពគ្រឿងស្រវឹង និងបើកដំណើរការខារ៉ាអូខេបង្កប់ក្នុងទីតាំងអាជីវកម្មរបស់ខ្លួន បំពានទៅនឹងវិធានការការការពារទប់ស្កាត់បញ្ហារាលដាលជំងឺកូវីដ-១៩ របស់រាជរដ្ឋាភិបាល ក៏ដូចជារដ្ឋបាលខេត្ត ដែលមានមន្ត្រី រួមទាំងសមត្ថកិច្ចជំនាញជាសេនាធិការបានសម្រេចចុះបិទផ្អាកដំណើរធ្វើអាជីវកម្មទាំង ០២កន្លែងខាងលើជាបណ្តោះអាសន្នចាប់តាំងពីថ្ងៃជូនដំណឹងតទៅ។
ទីតាំងអាជីវកម្មអាហារដ្ឋានទាំង ០២កន្លែងនេះមានយ៉ីហោ គោដុតម្លប់ដូង និងមួយទៀតមានយ៉ីហោ អាហារដ្ឋាន ហង្ស ៩៩៩៩ ស្ថិតនៅក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង ហើយដើម្បីពង្រឹងវិធានការរដ្ឋបាល និងពង្រឹងការ ការពារទប់ស្កាត់ការឆ្លងរីករាលដាលនូវជំងឺកូវីដ-១៩ ឲ្យកាន់តែមានប្រសិទ្ធភាព មន្ត្រីអនុវត្តច្បាប់ថែមទាំងបានដកហូតអាជ្ញាបណ្ណទេសចរណ៍ របស់ម្ចាស់អាជីវកម្ម អាហារដ្ឋាន គោដុតម្លប់ដូង និងអាហារដ្ឋាន ហង្ស ៩៩៩៩ជាបណ្តោះអាសន្ន ហើយម្ចាស់អាហារដ្ឋានទាំង ២ ត្រូវទទួលរងការផាកពិន័យតាមគោលការណ៍ច្បាប់ជាធរមាន។
មន្ត្រីអធិការកិច្ច នៃមន្ទីរទេសចរណ៍ បានបញ្ជាក់បន្តថា ការចុះអនុវត្តច្បាប់នេះទៀតសោតធ្វើឡើងបន្ទាប់ពីក្រសួងទេសចរណ៍បានប្រកាសជូនដំណឹងចុងក្រោយសារជាថ្មីទៀត ស្តីពីការបន្តបិទសកម្មភាពអាជីវកម្ម KTV ក្លឹបកម្សាន្តនានា និងក្លឹបហាត់ប្រាណក្នុង និងក្រៅសណ្ឋាគារទូទាំងរាជធានីខេត្ត ក៏ដូចជាការផ្អាកជាបណ្តោះអាសន្នចំពោះសកម្មភាពការងារ មុខរបរ អាជីវកម្ម ផ្តើមដោយការប្រមូលផ្តុំមនុស្សច្រើនដែលមានហានិភ័យឆ្លងជំងឺខ្ពស់ សំដៅចូលរួមអនុវត្តការពង្រឹងវិធានការប្រយុទ្ធ និងទប់ស្កាត់ការរាលឆ្លងនូវជំងឺកូវីដ-១៩៕ រក្សាសិទ្ធិដោយ ៖ បញ្ញាស័ក្តិ
