Wednesday, October 27, 2021

ធ្លាប់ជួបទេ! ស្លៀកឯកសណ្ឋាន​ទាហាន​ ជិះ​ឡាន​ដើរ​លក់​ម៉ាសុីន​ភ្លើង​ក្លែង​ក្លាយ​ថា​ជា​របស់​រដ្ឋ​ចែក​ឲ្យ តែ​ពេល​ទាញ​កាមេរ៉ា​ថត ស្រាប់​រត់​ប្រសាច…

នេះជារឿងមួយគួរឲ្យភ្ញាក់ផ្អើល ខណៈបានដឹងថាមនុស្សប្រុសមួយក្រុម ស្លៀកឯកសណ្ឋានជាទាហាន ជិះឡានទំនើបដើរលក់ម៉ាស៊ីនភ្លើងក្លែងក្លាយ នៅតាមបុរី ដោយអះអាងថាជារបស់រដ្ឋចែកឲ្យ ប៉ុន្តែ ត្រូវបានប្រជាពលរដ្ឋដែលបានដឹងច្បាស់ពីទង្វើរដើរបោកប្រាស់នេះ ទាញកាមេរ៉ាថត ស្រាប់តែនាំគ្នាឡើងឡានចាកចេញយ៉ាងលឿនតែម្តង។

នេះបើតាមគណនីហ្វេសប៊ុកឈ្មោះ Tony Sous បានបង្ហោះវីដេអូ និងសរសេរបញ្ជាក់ឲ្យដឹងថា៖ មកលេងខុសមនុស្សហើយ ពួកអាបោក ក្លែងឯកសណ្ឋានទាហ៊ានដើរលក់ម៉ាស៊ីនភ្លើងក្លែងក្លាយ ថាជារបស់រដ្ឋគេចែកអោយ ដំបូងចង់ខ្លាំងចុះពីឡានមក៤នាក់រកសារ៉េឯង សុទ្ធតែឯកសណ្ឋានទាហ៊ាន ទាញ Camera ថត រត់ប្រសាច (ម្យ៉ាងដែរសម័យនេះមាន Smart Phone ម្នាក់ឯងអាចស៊ូបានជាមួយពួកអាបោក៤នាក់)។ មានលេខឡាន សូមសមត្ថកិច្ជំនាញស្រាវជ្រាវ 2J-7388 ជាពិសេសអ្នកធ្លាប់ចាញ់បោកគេ។ 01 តុលា 2021។

ក្រោយគណនីខាងលើបានបង្ហោះឲ្យដឹងបែបនេះ ក៏ស្រាប់តែមានអ្នកលេងបណ្តាញសង្គមជាច្រើន បានចេញមកប្រាប់ឲ្យដឹងថា ពួកគាត់សុទ្ធតែធ្លាប់បានជួបក្រុមពាក់ឯកសណ្ឋានទាហានបែបនេះ ដើរលក់ម៉ាស៊ីនភ្លើងស្ទើរគ្រប់ខេត្ត ។ ក្នុងនោះ ពួកគេប្រាប់គួរឲ្យភ្ញាក់ផ្អើលថា «ចុម ពួកហ្នឹងងដេីរគ្រប់កន្លែង ឡាន Lexus 300 ហ្នឹង ថ្ងៃមុនយកមកលក់អោយខ្ញុំដែរនៅកំពង់ថ្ម ខេត្តកំពង់ធំ, ថ្ងៃមុន មិត្តភក្កិខ្ញុំចាញ់បោកទិញម៉ាសុីន២គ្រឿង​ អស់៩០០$​ សំខាន់វាសួរទៀតថានៅក្នុងផ្ទះមានលុយទៀតអត់, ខ្ញុំធ្លាប់ជួបអាបែបហ្នឹងដែរកាលមុន ពួកអាជេីងល្អអស់ទាំងហ្នឹង វាលក់ថោកទេ គឺបោកហេីយ ម៉ាស៊ីនតំលៃវា​ត្រឹម ២៧០$​ ទៅ ៣០០$​ វាយកមកលក់ ៥០០$​ ទៅ ៧០០$​។ ហេីយពួកទាំងនោះវាលេីកខ្លួនវាថាទាហានចឹងដែរ។ រីឯអ្នកខ្លះទៀត បានប្រាប់គួរឲ្យប្រុងប្រយ័ត្នថា ពួកអាលក់ម៉ាសុីនភ្លើងហ្នឹងហេីយបង នៅខេត្ដរតនះគិរី វាចុះមកធ្វេីយកម៉ាសុីនភ្លេីងមកលក់អោយ តែមានអីវាដាក់ថ្នាំទះស្មាសួរយកលុយអស់1000$ជាង ហេីយវានាំគ្នាឡេីងឡានទៅបាត់។ នៅមានការចែករំលែកជាច្រើនទៀត ពីបងប្អូនអ្នកលេងហ្វេសប៊ុកដែលធ្លាប់បានជួបករណីនេះ ដែលលើកយកមករៀបរាប់មិនអស់។

តាមរយៈភិនភាគមុខមាត់មនុស្ស និងស្លាកលេខឡានយ៉ាងច្បាស់ៗ ប្រជាពលរដ្ឋនឹងរង់ចាំមើលថា តើសមត្ថកិច្ចនឹងអាចនាំយកពួកក្រុមនេះ ដើម្បីបកស្រាយការពិតទាក់ទងករណីចោទប្រកាន់ដើរលក់ម៉ាស៊ីនភ្លើងបោកប្រាស់នេះបានដែរ ឬយ៉ាងណា!៕ រក្សាសិទ្ធិដោយ៖ លឹម ហុង