ថ្មីៗនេះ វីដេអូដ៏ស្រៀវរន្ធ.ត់មួយ បង្ហាញរថយន្តតូច១គ្រឿង បើកលឿនដូចយន្តហោះ និងជាលទ្ធផល ទៅព្រលះចូលរថយន្តធំ១គ្រឿង ស្ថិតលើផ្លូវមួយកន្លែង នៅក្នុងប្រទេសម៉ាឡេស៊ី បានកំពុងរីករាលនៅលើបណ្តាញសង្គម។ ហើយករណីដ៏សាហា.វនេះផងដែរ ត្រូវបានគេរាយការណ៍ថា បានកើតឡើងនៅលើផ្លូវ Jalan Ulu Yam កាលពីវេលាម៉ោង ៧ នាទី និង៤១ នាទី ព្រឹកថ្ងៃទី១០ ខែតុលា ឆ្នាំ២០២១។
បើតាមប្រធាននាយកដ្ឋានស៊ើបអង្កេត និងអនុវត្តច្បាប់ចរាចរណ៍សាំងឡេងហ្គ័រ (JSPT) លោក Azman Shariat បាននិយាយថា នៅពេលឆ្លងកាត់កន្លែងកើតហេតុ អ្នកបើកបររថយន្ត Mitsubishi Lancer បានព្យាយាមបើកជែងរថយន្ត Perodua Bezza ប៉ុន្តែធ្វើមិនបានសំរេច ក៏បានបុកជាមួយឡានដឹកទំនិញ ដែលកំពុងបើកបរទិសដៅផ្ទុយគ្នាយ៉ាងទំហឹងតែម្តង។
លោកក៏បានបញ្ជាក់ឲ្យដឹងថា គ្រោះថ្នាក់នេះ ក៏ពាក់ព័ន្ធនិងរថយន្ត Volkswagen ១គ្រឿងទៀតផងដែរ។
ជាលទ្ធផល អ្នកបើកបរ និងជនជាតិវៀតណាម២នាក់ ដែលជាអ្នកដំណើរក្នុងរថយន្ត Perodua Bezza អាយុពី ២៤ ទៅ ៣០ ឆ្នាំ បានរងរបួស។ ចំណែកអ្នកបើករថយន្ត Perodua Bezza បានបាក់ស្មា និងជើង ខណៈអ្នកដំណើរម្នាក់ក្នុងចំណោមនោះបានរងរបួសបាក់ក។
យោងតាមលោក Azman ពួកគេទាំងបីនាក់ បច្ចុប្បន្នកំពុងទទួលការព្យាបាលនៅមន្ទីរពេទ្យសេឡាយ៉ាង។
លោក Azman បានបន្ថែមថា អ្នកបើកបររថយន្ត Mitsubishi Lancer និង Volkswagen អាយុ ៣២ ឆ្នាំ មិនមានរងរបួសអ្វីនោះទេ ខណៈដែលអ្នកបើកបររថយន្តដឹកទំនិញអាយុ ៥១ ឆ្នាំ បានរងរបួសនៅជើង។
ទោះយ៉ាងណា គ្រប់ភាគីដែលពាក់ព័ន្ធ គឺត្រូវបានដាក់បញ្ចូលក្នុងរបាយការណ៍ប៉ូលីស ដោយលើកលែងតែអ្នកជិះរថយន្ត Perodua Bezza ពីព្រោះពួកគេកំពុងទទួលការព្យាបាលនៅមន្ទីរពេទ្យ។ ហើយការស៊ើបអង្កេតលើឧប្បត្តិហេតុនេះ នឹងត្រូវបានធ្វើឡើងស្របតាមច្បាប់ស្តីពីការដឹកជញ្ជូនផ្លូវគោកឆ្នាំ១៩៨៧៕ រក្សាសិទ្ធិដោយ៖ លឹមហុង