បាត់ដំបង ៖ កងរាជអាវុធហត្ថស្រុកសំពៅលូន ឃាត់ខ្លួនស្ត្រីម្នាក់ ជាគ្រូអាយអំពាយ ចេះទស្សន៍ទាយ និងចេះដកអំពើ ចេញពីខ្លួនប្រាណ ពីបទឆបោកលុយពីជនរងគ្រោះជាង១៦ម៉ឺនបាត។
ការឃាត់ខ្លួននេះបានធ្វើឡើងនា ថ្ងៃទី៩ ខែមេសា ឆ្នាំ២០១៨ វេលាម៉ោង៦ ល្ងាច នៅចំណុចភូមិកណ្តោល ឃុំសន្តិភាព ស្រុកសំពៅលូន ខេត្តបាត់ដំបង ទៅតាមពាក្យបណ្តឹងរបស់ជនរងគ្រោះឈ្មោះ ហ៊យ ណាត ភេទស្រី អាយុ៥១ឆ្នាំរស់នៅភូមិអូរ ឃុំសន្តិភាព ស្រុកសំពៅលូន ពីបទឆបោក រំលោភលើទំនុកចិត្ត។ គ្រូអាយអំពាយនោះមានឈ្មោះ កាំង លាង ហៅ តាំងគីមមួយហេង អាយុ ៣៧ឆ្នាំ ។
ជនរងគ្រោះបានអោយដឹងថា ដោយសារតែខ្លួនចេះតែមានអការៈឈឺចាប់នៅក្នុងខ្លួន ទើបបានមកឲ្យគ្រូហោទស្សន៍មើលឲ្យ ក្រែងមានខុសអ្វីមួយ ។ ភ្លាមៗនោះដែរ គ្រូហោបាននិយាយថា ខ្លួនត្រូវអំពើគេហើយ ដោយនៅក្នុងខ្លួនមានសសៃលួសច្រើនណាស់ ហើយគ្រូហោបានសន្យាថាគេអាចដកលួសទាំងនេះចេញពីខ្លួនប្រាណរបស់ខ្លួនបាន ប៉ុន្តែកំណល់គ្រូរាងថ្លៃបន្តិច ទើបពូកែស័ក្តិសិទ្ធ និងអាចទាញចេញឲ្យអស់ពីក្នុងខ្លួន ។ ដោយសារមានការភ័យខ្លាច ខ្លួនក៏យល់ព្រមឲ្យគ្រូហោនោះជួយដោះអំពើចេញពីខ្លួន ប៉ុន្តែជំហានដំបូងគ្រូទាមទារប្រាក់ចំនួនជាង ១៧០០០ បាត មកតម្កល់លើអសនៈ ដើម្បីឲ្យការធ្វើនេះបានពូកែ ។
ប៉ុន្តែក្រោយពីគ្រូទាយបានព្យាបាលតាមរយៈមន្តអាគមរបស់ខ្លួន គ្រូដោះអំពើរូបនេះបានប្រាប់អ្នកជំងឺថា គ្រូបានដោះអំពើចេញខ្លះៗហើយមានទាំងដេកគោល និងរបស់ផ្សេងទៀត តែដោះមិនទាន់អស់ទេ ។ ពេលនោះគ្រូទាយរូបនេះ បានបង្គាប់ឱ្យអ្នកជំងឺតម្កល់លុយជាង១៥ម៉ឺនបាតបន្ថែមទៀតគម្រប់១៦ម៉ឺនបាត ដើម្បីឲ្យកាន់តែពូកែស័ក្តិសិទ្ធ ហើយអ្នកជំងឺក៏រកលុយយកមកឲ្យគ្រូបន្ថែមទៀត ។
ប៉ុន្តែក្រោយពីរកលុយមកប្រគល់ឲ្យគ្រូទាយរូបនេះគ្រប់ចំនួនហើយ គ្រូទាយហាក់បង្ហាញពីសកម្មភាពបោកប្រាស់ ទើបជនរងគ្រោះមានការសង្ស័យ ក៏សួរនាំរហូតមានការឈ្លោះប្រកែកគ្នាបែកផ្សែង ។ ពេលដែលផ្ទុះរឿងនេះស្ត្រីគ្រូទាយបានយល់ព្រមសងលុយអ្នកជំងឺវិញ តែបានចេញជាសែក ដែលមានទឹកប្រាក់ចំនួនជាង៣ម៉ឺនដុល្លារ ឱ្យទៅជនរងគ្រោះ។ គ្រូទាយរូបនេះបានបញ្ជាក់ប្រាប់អ្នកជំងឺថា អាចយកសែកនោះទៅដូរលុយនៅធនាគារចាយសិនទៅ។ ព្រោះមិនអាចដកលុយជាង១៦ម៉ឺន ដែលតម្កល់លើអាសន:គ្រូនេះឱ្យវិញភ្លាមៗបានទេ ខុសតំណមគ្រូ លុះចាយលុយក្នុងសែកនោះអស់ហើយ ទើបដកបាន។ ប៉ុន្តែនៅពេលជនរងគ្រោះយកសែកដែលមានទឹកលុយជាង៣ម៉ឺនដុល្លារនោះទៅដូរនៅធនាគារ ហើយខាងធនាគារប្រាប់ថា ជាសែកគ្មានទឹកប្រាក់ ទើបអ្នកជំងឺរូបនេះប្ដឹងសមត្ថកិច្ចឲ្យឃាត់ខ្លួនស្ត្រីគ្រូទាយបោកប្រាស់នេះតែម្ដងទៅ ។
សមត្ថកិច្ចកំពុងកសាងសំណុំរឿងដើម្បីបញ្ជូនខ្លួនគ្រូអាយអំពាយទៅបញ្ជាការដ្ឋាន ចាត់ការបន្ត ជាមួយនឹងការឆបោកសរុបជាទឹកប្រាក់ ១៦៧០០០បាត ស្នើនឹងជាង ៥៣០០ ដុល្លារ ៕ ដោយ ៖ បញ្ញាស័ក្តិ