កំពង់ឆ្នាំង ៖ មានករណីបើករថយន្តប្រដេញគៀរគ្នា និង ផ្ទុះអាវុធជាច្រើនគ្រាប់ នៅក្នុងឃុំខ្នាឆ្មា ស្រុកសាមគ្គីមានជ័យ កាលពីវេលាម៉ោង១១ថ្ងៃទី២៨ ខែតុលា ឆ្នាំ២០១៧ បង្ករការភ្ញាក់ផ្អើលដល់ប្រជាពលរដ្ឋពេញភូមិ និង ធ្វើអោយអ្នកដំណើរតាមដងផ្លូវរត់គេចចេញទាំងព្រលឹងចុងសក់។ ករណីនេះសមត្ថកិច្ចមូលដ្ឋានបានត្រឹមតែទៅរើសសំបកកាទូសយកមកធ្វើរបាយការណ៍ជូនថ្នាក់លើតែប៉ុណ្ណោះ។ ប្រភពពីកន្លែងកើតហេតុបានអោយដឹងថា នៅវេលាកើតហេតុខាងលើគេឃើញមានរថយន្តចំនួន៣គ្រឿង បានបើកប្រដេញគ្នាក្នុងល្បឿនលឿនដូចហោះ និង បានបើកជែងគៀរគ្នាប្រសេកប្រសាចតាមផ្លូវលំចេញពីឃុំធ្លកវៀន មកឃុំខ្នឆ្មា ស្រុកសាមគ្គីមានជ័យ។ ក្នុងនោះមានរថយន្តម៉ាកកាមរីបាឡែនពណ៍សចំនួន២គ្រឿង និងរថយន្តម៉ាកតាកូម៉ា១គ្រឿងទៀតពណ៍ទឹកប្រាក់ ។
ប្រភពបានអោយដឹងទៀតថា នៅក្នុងហេតុការណ៍នេះគេឃើញរថយន្តម៉ាកកាមរីបាឡែនមួយគ្រឿងពាក់ស្លាកលេខ (នប) ៣០ ៦៣ ដែលបើកដេញពីក្រោយបានទាញកាំភ្លើងអាកាបាញ់ជាច្រើនគ្រាប់គឺ បាញ់នៅមុខប៉ុស្តិ៍ធ្លកវៀន៣គ្រាប់ បាញ់នៅមុខប៉ុស្តិ៍ខ្នាឆ្មា២គ្រាប់ និង បាញ់តាមផ្លូវបន្តៗជាច្រើនគ្រាប់ទៀត ធ្វើអោយប្រជាពលរដ្ឋភ័យខ្លាចយ៉ាងខ្លាំង មិនដឹងថា ការបាញ់នេះបង្ក្រាបបទល្មើសអ្វីពិតប្រាកដនោះទេ? ។ ករណីនេះមិនបានរំខានដល់សមត្ថកិច្ចមូលដ្ឋានឡើយ ក្រោយពេលកើតហេតុបានត្រឹមតែទៅរើសសំបកកាទូសយកមកធ្វើរបាយការណ៍ជូនថ្នាក់លើតែប៉ុណ្ណោះ។
ការបើករថយន្តប្រដេញគ្នានិងបាញ់បោះសេរីនេះ ប្រជាពលរដ្ឋសូមសំណូមពរ ទៅដល់លោកឧត្តមសេនីយ៍ ឡុច វណ្ណារ៉ា ស្នងការនគរបាលខេត្ត លោកឧត្តមសេនីយ៍ សាក់ សារ៉ាង មេបញ្ជាការអាវុធហត្ថខេត្ត ជាពិសេសលោកឈួរ ច័ន្ទឌឿន ដែលជាអភិបាលខេត្តនិងជាប្រធានគណបញ្ជាការឯកខេត្តកំពង់ឆ្នាំង សូមមេត្តាជួយចុះស្រាវជ្រាវវែកមុខ ក្រុមបាញ់បោះដោយសេរីនេះផង តើពួកគាត់មានតួនាទីជាអ្វីខ្លះ បានហ៊ានបើករថយន្តដេញបាញ់រថយន្ត ហើយតើរថយន្តដែលពួកគេដេញបាញ់នោះ មានបទល្មើសអ្វីខ្លះ។
ប្រភពពីសមត្ថកិច្ចដែលមិនសប្បាយចិត្តបានអោយដឹងថាក្នុងរយៈពេលចុងក្រោយនេះ ការដឹកជញ្ជូនឈើប្រណិតនិងសត្វព្រៃ តាមផ្លូវជាតិលេខ៥និងតាមផ្លូវមួយចំនួនទៀត ក្នុងភូមិសាស្ត្រខេត្តកំពង់ឆ្នាំង បានចាប់ផ្តើមកម្រើកឡើងវិញ ហើយគេសង្កេតឃើញមានមន្ត្រីជំនាញ និង សមត្ថកិច្ចមួយចំនួនបានបើករថយន្តប៉ាទ្រុយ និង ប្រដេញស្ទាក់ចាប់រថយន្តដឹកបទល្មើសទាំងយប់ទាំងថ្ងៃ បង្ករការភ័យខ្លាចដល់ប្រជាពលរដ្ឋយ៉ាងខ្លាំង ។ ប៉ុន្តែការបើករថយន្តប្រដេញចាប់បទល្មើសនេះ គឺគេធ្វើឡើងតែរថយន្តណាដែលមិនបានបង់លុយអោយពួកគេប៉ុណ្ណោះ ។ ករណីនេះគួរតែថ្នាក់លើជួយពិនិត្យមើលនិងមានវិធានការអោយមានប្រសិទ្ធភាពផង កុំអោយប្រជាពលរដ្ឋរិះគន់តទៅទៀត ៕ ដោយ៖ ចៅ សន
