ភ្នំពេញ ៖ បន្ទាប់ពីប្រមុខរាជរដ្ឋាភិបាលកម្ពុជា សម្តេចតេជោនាយករដ្ឋមន្ត្រីហ៊ុន សែន បានប្រកាសនៅព្រឹកថ្ងៃទី០១ ខែវិច្ឆិកា ឆ្នាំ២០២១ ឱ្យបើកប្រទេសដំណើរការគ្រប់វិស័យពេញលេញឡើងវិញនោះ នគរបាលទេសចរណ៍នៃស្នងការដ្ឋាននគរបាលរាជធានីភ្នំពេញ បានប្រជុំដាក់ផែនការការពារពង្រឹងសន្តិសុខ រក្សាសណ្តាប់ធ្នាប់ ជូនភ្ញៀវទេសចរជាតិ និងអន្តរជាតិធ្វើដំណើរកម្សាន្តក្នុងរាជធានីភ្នំពេញឱ្យបានសុខសុវត្ថិភាពគ្រប់គ្រាន់។
កិច្ចប្រជុំបានធ្វើឡើងនៅស្នងការដ្ឋាននគរបាលរាជធានីភ្នំពេញ នាព្រឹកថ្ងៃទី០១ ខែវិច្ឆិកា ឆ្នាំ២០២១ ដឹកនាំដោយលោកឧត្តមសេនីយ៍ត្រី លី ប៊ុនអេង ស្នងការរងទទួលជំនួយដឹកនាំការិយាល័យនគរបាលទេសចរណ៍ ។
លោកឧត្តមសេនីយ៍ត្រី លី ប៊ុនអេង ស្នងការរងបានលើកឡើងក្នុងកិច្ចប្រជុំនោះថា អនុវត្តតាមទិសដៅការងាររបស់ឯកឧត្តម ឧត្តមសេនីយ៍នីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ខណៈប្រទេសកម្ពុជាបើកដំណើរការគ្រប់វិស័យឡើងវិញ បានជំរុញឱ្យកម្លាំងនៃការិយាល័យនគរបាលទេសចរណ៍ត្រូវចាប់ផ្តើមចេញការពារ និងពង្រឹងសន្តិសុខ ថែរក្សាសណ្តាប់ធ្នាប់ឱ្យបានគត់មត់ នៅគោលដៅដែលមានភ្ញៀវទេសចរជាតិ និងអន្តរជាតិពេញនិយមទៅដើរលេងកម្សាន្តនៅក្នុងរាជធានីភ្នំពេញ ដែលធ្វើយ៉ាងណាធានាឱ្យបានសុខសុវត្ថិភាពគ្រប់គ្រាន់ជូនភ្ញៀវទេសចរ ដូចជា ពង្រឹងយកចិត្តទុកដាក់តាមគោលដៅរមណីយដ្ឋានប្រវត្តិសាស្ត្រវត្តភ្នំ, ផែទូកទេសចរណ៍ និងផ្សារាត្រី, គោលដៅព្រះគម្លង់, គោលដៅខាងមុខព្រះបរមរាជវាំង, មជ្ឈមណ្ឌលជើងឯក , គោលដៅមណ្ឌលព័ត៌មានចុងក្រោយ និងគោលដៅវិមានឯករាជ្យ ដែលគោលដៅទេសចរណ៍កម្សាន្តទាំងនេះជាគោលដៅសំខាន់មានភ្ញៀវទេសចរមកកម្សាន្តលេង ។
លោកឧត្តមសេនីយ៍ស្នងការរង ក៏បានលើកឡើងណែនាំដល់លោក-លោកស្រីនាយ នាយរងការិយាល័យ និងមន្ត្រីនៃការិយាល័យនគរបាលទេសចរណ៍ត្រូវសហការឱ្យបានល្អជាមួយនឹងអាជ្ញាធរសមត្ថកិច្ចពាក់ព័ន្ធនៅតាមបណ្តាខណ្ឌនានាក្នុងតំបន់កម្សាន្តខាងលើ ដើម្បីដាក់ចេញនូវវិធានការបង្ការទប់ស្កាត់បទល្មើសផ្សេងឱ្យមានប្រសិទ្ធភាព និងចេញដោះស្រាយឱ្យទាន់ពេលវេលានៅពេលកើតឡើងនូវបញ្ហាណាមួយចំពោះភ្ញៀវទេសចរ ។ ក្នុងនោះក៏ត្រូវរង់ចាំទទួលពាក្យបណ្តឹងផ្ទាល់មាត់ពីភ្ញៀវទេសចរដែលកើតឡើងបាតុភាពផ្សេងៗ ដើម្បីចេញអន្តរាគមន៍ ស្រាវជ្រាវស្វែងរកបង្ក្រាបចាប់ខ្លួនចំពោះជនណាដែលបង្កប៉ះពាល់ដល់ភ្ញៀវទេសចរ, ការរៀបចំសណ្តាប់ធ្នាប់ចរាចរណ៍ជុំវិញគោលដៅឈរជើងឱ្យបានល្អសម្រួលដល់ភ្ញៀវទេសចរដើរកម្សាន្ត, សហការត្រួតពិនិត្យចំពោះមគ្គុទេសចរណ៍ដែលមិនអនុវត្តតាមការណែនាំរបស់ក្រសួងទេសចរណ៍ ,ជួយផ្តល់ព័ត៌មានចង្អុលបង្ហាញផ្លូវចំពោះភ្ញៀវទេសចរ ជាដើមនោះ។
លោកឧត្តមសេនីយ៍ត្រី លី ប៊ុនអេង ស្នងការរងក៏បានលើកឡើងទៀតថា ក្រៅពីកម្លាំងដាក់ពង្រាយការគោលដៅឈរជើង ក៏ត្រួវប្រើប្រាស់កម្លាំងចេញល្បាតត្រួតពិនិត្យទៅលើគោលដៅកម្សាន្តនោះផងដែរ ជាមួយការប្រើប្រាស់មធ្យោបាយម៉ូតូ និងរថយន្តក្នុងការចេញល្បាតដើម្បីចាត់វិធានការទប់ស្កាត់ និងបង្ក្រាបរាល់សកម្មភាពប៉ះពាល់សុវត្ថិភាពដល់ភ្ញៀវទេសចរ ៕ រក្សាសិទ្ធិដោយ ៖ កូលាប
