បន្ទាយមានជ័យ៖ ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានណែនាំឱ្យបងប្អូនពលករខ្មែរទាំងអស់ ត្រូវមានការប្រុងប្រយ័ត្នខ្ពស់ និងមិនត្រូវប្រថុយប្រថាន ឬធ្វើដំណើរឆ្លងកាត់ចូលទៅតំបន់ដែលមិនស្គាល់ទីតាំងភូមិសាស្រ្តច្បាស់លាស់ជាដាច់ខាត ដែលអាចបណ្តាលឱ្យមានគ្រោះថ្នាក់ជាយថាហេតុណាមួយដោយសារមីន និងសំណល់ជាតិផ្ទុះពីសង្រ្គាម។
ព្រឹកថ្ងៃទី០៣ ខែវិច្ឆិកា ឆ្នាំ២០២១ ឯកឧត្ដម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន អមដំណើរដោយ ឯកឧត្តម លី សារី អភិបាលរងខេត្តបន្ទាយមានជ័យ បានចុះជួបសំណេះសំណាលជាមួយពលករខ្មែរមកពីប្រទេសថៃតាមច្រកបឹងត្រួន ស្ថិតក្នុងឃុំគោករមៀត ស្រុកថ្មពួក ខេត្តបន្ទាយមានជ័យ ក្នុងឱកាសអញ្ជើញចូលរួមក្នុងពិធីតម្លើងផ្ទាំងប៉ាណូផ្សព្វផ្សាយការអប់រំយល់ដឹងអំពីមីន និងសំណល់ជាតិផ្ទុះពីសង្គ្រាម។
ឯកឧត្តម ទេសរដ្ឋមន្រ្តី បានណែនាំឲ្យបងប្អូនពលករខ្មែរទាំងអស់ ត្រូវមានការប្រុងប្រយ័ត្នខ្ពស់ និងមិនត្រូវប្រថុយប្រថាន ឬធ្វើដំណើរឆ្លងកាត់ចូលទៅតំបន់ដែលមិនស្គាល់ទីតាំងភូមិសាស្រ្តច្បាស់លាស់ជាដាច់ខាត ដែលអាចបណ្តាលឲ្យមានគ្រោះថ្នាក់ជាយថាហេតុណាមួយដោយសារមីន និងសំណល់ជាតិផ្ទុះពីសង្រ្គាម។
ក្នុងឱកាសនោះ លោកទេសរដ្ឋមន្រ្តី បានណែនាំឲ្យបងប្អូនពលករទាំងអស់ ត្រូវមានការប្រុងប្រយ័ត្នខ្ពស់ពីការឆ្លងជំងឺកូវីដ-១៩ ត្រូវរក្សាអនាម័យជាប្រចាំ លាងដៃជាមួយទឹកសាប៊ូ ទឹកអាកុល និងពាក់ម៉ាស ទោះបីយើងបានចាក់វ៉ាក់សាំងហើយក៏ដោយ និងសូមអនុវត្តនូវវិធានការ ៣កុំ ៣ការពារ តាមការណែនាំរបស់ក្រសួងសុខាភិបាលឲ្យបានខ្ជាប់ ក៏ដូចជាត្រូវតែទៅចាក់វ៉ាក់សាំងបង្ការកូវីដ-១៩ អោយបានគ្រប់ៗគ្នា ដែលសម្តេចតេជោ នាយករដ្ឋមន្ត្រី បានត្រៀមរួចជាស្រេចសម្រាប់ពលករខ្មែរ និងកូនខ្មែរទាំងអស់គ្នា៕ រក្សាសិទ្ធិដោយ ៖ កូលាប
