នេះជារឿងមួយដ៏មិនធម្មតានោះទេ និងសូមកោតសរសើរផងដែរ គ្រាដែលស្រីស្អាត២នាក់ បានជិះម៉ូតូយ៉ាងលឿន និងស្រែកថាចោរៗ ដេញតាមជនសង្ស័យ២នាក់ បន្ទាប់ពីបានធ្វើសកម្មភាពឆក់យកទូរស័ព្ទរបស់នាងម៉ាក iphone 8 plus។
បើតាមនារីម្នាក់ជាម្ចាស់ទូរស័ព្ទ បានប្រាប់ឲ្យដឹងថា ខណៈពួកនាងកំពុងជិះម៉ូតូឌុបគ្នា ត្រឡប់មកពីហូបស៊ុបវិញ គាប់ជូនពេលនោះ ម្តាយរបស់នាងបានតេមក ហើយនាងក៏បានលើកនិយាយបណ្តើរ ជិះម៉ូតូបណ្តើរ ប៉ុន្តែ ខណៈពេលនោះ ក៏ស្រាប់តែលេចមុខជនសង្ស័យ២នាក់ ជិះម៉ូតូ១គ្រឿងម៉ាកសេ125 មកធ្វើសកម្មភាពឆក់យកទូរស័ព្ទពីដៃរបស់នាងបានសម្រេច រួចបន្ថែមល្បឿនម៉ូតូបើករត់បើករួចខ្លួនតែម្តង។
តែទោះជាយ៉ាងណា ដោយសារស្មារតីមិនតក់ស្លុត ភ្លាមៗនោះ ពួកនាងក៏បានជិះម៉ូតូប្រដេញតាមយ៉ាងប្រផាប់ប្រភីង និងស្រែកឆោឡោថា «ចោរៗ» ឡើងផ្អើលពេញផ្លូវ ជាហេតុធ្វើឲ្យជនសង្ស័យទាំងពីរនាក់នោះ ភ័យស្លន់ស្លោជិះម៉ូតូទៅបុ.កខឿនសួនច្បារ បណ្តាលឲ្យដួ.ល រួចក៏នាំគ្នារត់យករួចខ្លួនឡើងប្រាស់ក្រញ៉ាំតែម្តង។ ហេតុការណ៍បង្កការភ្ញាក់ផ្អើលនេះ បានកើតឡើងកាលពីយប់ថ្ងៃទី៤ ខែវិច្ឆិកា ឆ្នាំ២០២១ ស្ថិតនៅចំណុចក្បែររង្វង់មូលគួចកាណុងក្នុងសង្កាត់ស្រះចកខណ្ឌដូនពេញរាជធានីភ្នំពេញ។
ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍ស្រះចក ក៏បានចុះមកដល់កន្លែងកើតហេតុ ដកយកម៉ូតូរបស់ជនសង្ស័យម៉ាកសេ125 ១គ្រឿងនោះ និងនាំពួកនាងទៅដាក់ពាក្យបណ្ដឹងដើម្បីធ្វើការស្រាវជ្រាវរកមុខសញ្ញា និងព្រមទាំងស្លាកលេខម៉ូតូ ដែលជាសញ្ញាមួយអាចឈានទៅចាប់ក្រុមជនសង្ស័យយកមកផ្តន្ទាទោសតាមផ្លូវច្បាប់៕ រក្សាសិទ្ធិដោយ៖ លឹម ហុង
