បាត់ដំបង ៖ មេខ្យល់ម្នាក់ដែលបម្រុងនាំពលករ ១២ នាក់ ឆ្លងដែនទៅប្រទេសថៃខុសច្បាប់ ត្រូវបានសមត្ថកិច្ចខេត្តបាត់ដំបងឃាត់ខ្លួន នៅចំណុចក្រុមទី៧ ភូមិត្រពាំងព្រលិត ឃុំសន្តិភាព ស្រុកសំពៅលូន នៅថ្ងៃទី ៥ វិច្ឆិកា។
គេហទំព័រអគ្គស្នងការដ្ឋាននគរបាលជាតិបានឱ្យដឹងនៅថ្ងៃទី ៥ ខែវិច្ឆិកាថា៖ «ក្នុងកិច្ចប្រតិបត្តិការនេះ សមត្ថកិច្ចបានធ្វើការទប់ស្កាត់ពលករបម្រុងឆ្លងដែនទៅប្រទេសថៃ ខុសច្បាប់ចំនួន ១២ នាក់ (ស្រីចំនួន ៥នាក់ អនីតិជនចំនួន ២ នាក់) និងឃាត់ខ្លួនជនសង្ស័យជាមេខ្យល់ម្នាក់»។
បុរសជាមេខ្យល់មានអាយុ ៣៨ ឆ្នាំ មានទីលំនៅនៅភូមិសាលាឆេះ ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។
ជននេះ បានសារភាពប្រាប់សមត្ថកិច្ចថា ការនាំមនុស្សចេញទៅប្រទេសថៃនេះ ខ្លួនបានយកប្រាក់ថ្លៃធ្វើដំណើរពីពលករក្នុងម្នាក់ពី ៦ ៥០០ បាត (១៩៥ ដុល្លារ) ទៅ ១១ ៥០០ បាត (៣៤៥ ដុល្លារ)។
សមត្ថកិច្ចនគរបាលស្រុក សំពៅលូន បានកសាងសំណុំរឿងបញ្ជូនមេខ្យល់រូបនេះទៅកាន់ការិយាល័យជំនាញ ដើម្បីអនុវត្តតាមច្បាប់ រីឯប្រជាពលរដ្ឋត្រូវបានអប់រំណែនាំឱ្យវិលទៅលំនៅឋានវិញ៕