កណ្តាល៖ នគរបាលមូលដ្ឋានស្រុកល្វាឯម បានឲ្យដឹងថា មានករណីគ្រោះថ្នាក់ចរាចរ រវាងម៉ូតូនិងក្មេងថ្មើរជើងបណ្តាលឲ្យក្មេងនោះស្លាប់នៅនឹងកន្លែងកើតហេតុ នៅថ្ងៃអង្គារ ទី១៧ ខែមេសា ឆ្នាំ២០១៨ វេលាម៉ោង១៨ នៅលើកំណាត់ផ្លូវលំ ចំណុចមុខផ្ទះឈ្មោះហ៊ី ឡា ស្ថិតនៅក្នុងភូមិព្រែកចារ ឃុំសំបួរ ស្រុកល្វាឯម ខេត្តកណ្ដាល ។
នគរបាលមូលដ្ឋាន បានបញ្ជាក់ពីសភាពនៃរឿងហេតុនេះថា មុនពេលកើតហេតុមានម៉ូតូមួយគ្រឿងម៉ាកHonda dream C១២៥ ផលិតឆ្នាំ២០០៨ ពណ៌ខ្មៅ ពាក់ស្លាកលេខ ភ្នំពេញ 1AH-3841 បើកបរដោយឈ្មោះធី វ៉ាន់ឆាត ភេទប្រុស អាយុ១៨ឆ្នាំ មុខរបរកសិករ មានទីលំនៅបច្ចុប្បន្នភូមិសំបួរ ឃុំសំបួរ ស្រុកល្វាឯម ខេត្តកណ្ដាល។
បើកបរមានទិសដៅពីជើងទៅត្បូង ពេលបើកបរមកដល់ចំណុចកើតហេតុខាងលើ បានបុកក្មេងប្រុសម្នាក់អូសប្រហែល៣០ម៉ែត្រ បែកមុខមាត់ និងដាច់បំពងកលៀនចេញមកក្រៅតាមមាត់ ស្លាប់នៅនឹងកន្លែងកើតហេតុ។ ដែលក្មេងនោះឈ្មោះថា ថេនា អាយុ១ឆ្នាំ១០ខែ មានទីលំនៅបច្ចុប្បន្នភូមិភូមិព្រែកចារ ឃុំសំបួរ ស្រុកល្វាឯម ខេត្តកណ្ដាល។
ករណីគ្រោះថ្នាក់នេះ បណ្ដាលឲ្យខូចខាតម៉ូតូ១គ្រឿង ហើយសមត្ថកិច្ចយកមករក្សាទុក ដើម្បីរង់ចាំការតាមនីតិវិធីច្បាប់។
ចំណែកជនបង្ក ត្រូវបានសមត្ថកិច្ចឃាត់ខ្លួនបណ្ដោះអាសន្ន នៅប៉ុស្ដិ៍នគរបាលរដ្ឋបាលសំបួរ នៃអធិការដ្ឋាននគរបាលស្រុកល្វាឯម៕ ដោយ៖បញ្ញាស័ក្តិ
