ស្វាយរៀង ៖ នាយរងប៉ុស្តិ៍នគរបាលរដ្ឋបាលក្រួស បានចេញល្បាតក្នុងមូលដ្ឋាននៅពេលយប់ តាមគោលដៅ បណ្តាលឲ្យម៉ូតូរេចង្កូតធ្លាក់ចូលក្នុងប្រឡាយអមសងខាងផ្លូវស្លាប់ ស្ថិតនៅភូមិថ្នា ឃុំក្រួស ស្រុកស្វាយជ្រំ ខេត្តស្វាយរៀង ថ្ងៃទី១៦ ខែមេសា ឆ្នាំ២០១៨ ។ ជនរងគ្រោះស្លាប់ ដោយឱបកាំភ្លើងអាកាជាប់នឹងដើមទ្រូង។
លោកអនុសេនីយ៍ទោ ព្រាប សាភួន ហៅសឿន អាយុ៥០ឆ្នាំ ជានាយរងប៉ុស្តិ៍នគរបាលរដ្ឋបាលឃុំគ្រួស ស្រុកស្វាយជ្រំ ជិះម៉ូតូចេញល្បាតចល័តតាមគោលដៅក្នុងមូលដ្ឋានក្នុងឱកាសនៃពិធីបុណ្យចូលឆ្នាំថ្មី ហើយជួបគ្រោះថ្នាក់ចរាចរដួលដោយខ្លួនឯង ចូលក្នុងប្រឡាយអមសងខាងផ្លូវ។
បើតាមសាក្សីដែលដឹងហេតុការណ៍នេះថា មុនពេលកើតហេតុ ជនរងគ្រោះបានផឹកស៊ីជាមួយក្រុមការងាររបស់ខ្លួន នៅនឹងប៉ុស្តិ៍នគរបាលដែលជនរងគ្រោះធ្វើការជារៀងរាល់ថ្ងៃ ប៉ុន្តែនៅក្នុងអំឡុងម៉ោងប្រហែលជា៧យប់ ជនរងគ្រោះក៏បានសុំការអនុញ្ញាតពីមេនគរបាលប៉ុស្តិ៍ថា សុំចេញទៅក្រៅមួយភ្លែត នឹងវិលត្រឡប់មកវិញ ដោយមានទាំងស្លៀកពាក់ឯកសណ្ឋានជានគរបាលត្រឹមត្រូវ និងមានស្ពាយកាំភ្លើងអាកាមួយដើមពីខាងមុខផងដែរ។ ប៉ុន្តែរហូតដល់ម៉ោង១០យប់ ក៏មិនឃើញជនរងគ្រោះវិលត្រឡប់ចូលមកប៉ុស្តិ៍នោះទេ ហើយលោកមេប៉ុស្តិ៍ និងមន្ត្រីនគរបាលប៉ុស្តិ៍ ក៏មិនបានចាប់អារម្មណ៍នឹងមានគ្រោះថ្នាក់ដែរ ដោយសង្ស័យថា ទំនងជាគាត់ស្រវឹងស្រា ហើយវិលត្រឡប់ទៅផ្ទះវិញហើយ ទើបបានជាមិនមកប៉ុស្តិ៍ដើម្បីប្រចាំការវិញ។ សាក្សី បានបន្ថែមថា នៅកន្លែងកើតហេតុ ជាផ្លូវកោង ហើយផ្លូវលំទើបស្ថាបនាថ្មីមានសភាពរលោងស្អាតល្អ ដែលអាចឲ្យបើកម៉ូតូលឿន ដូច្នេះទំនងជាយកចង្កូតនៅចំណុចកោង ក៏ជ្រុលធ្លាក់ចេញពីថ្នល់ ចូលប្រឡាយអត់ទឹក បណ្តាលឲ្យដួលបោកក្បាលដីផ្កាប់មុខស្លាប់តែម្តង រហូតទាល់តែព្រឹកព្រលឹមស្រាងៗ ទើបអ្នកលក់សាច់ជ្រូកបានប្រទះឃើញសពជនរងគ្រោះ ក៏ស្រែកហៅឲ្យអ្នកជិតខាងមកជួយ លើកសពនិងហៅសមត្ថកិច្ចមកធ្វើកោសល្យវិច័យ។ បើតាមក្រុមគ្រួសារសព បានបញ្ជាក់ថា នេះមិនមែនជាគ្រោះថ្នាក់លើកទី១នោះទេ ដែលជនរងគ្រោះជួបគ្រោះថ្នាក់ធ្ងន់ ក្នុងឱកាសបុណ្យចូលឆ្នាំថ្មីជារៀងរាល់ឆ្នាំ គឺលើកទី១ បានជួបគ្រោះថ្នាក់បើកម៉ូតូបុកដល់ប្រេងខ្យល់ រងរបួសធ្ងន់ និងលើកទី២ ជួបគ្រោះថ្នាក់ចរាចរជាមួយម៉ូតូកង់បី ក្នុងភូមិជាមួយគ្នា បណ្តាលឲ្យរបួសធ្ងន់ ហើយលើកទី៣ គឺគ្រោះថ្នាក់ដោយខ្លួនឯង នៅក្បែរកន្លែងធ្វើការ ស្លាប់តែម្តង។
កម្លាំងអធិការដ្ឋាននគរបាលស្រុកស្វាយជ្រំ សហការជាមួយកម្លាំងជំនាញខេត្ត និងគ្រូពេទ្យស្រាវជ្រាវជុំវិញកន្លែងកើតហេតុ និងធ្វើកោសលវិច័យលើសាកសពឃើញមានស្នាមទ្រុតចំដើមទ្រូងចំនួន២កន្លែង និងសៀតផ្កាខាងឆ្វេង១កន្លែង ដួលបុកនឹងកាំភ្លើង ដែលស្ពាយពីខាងមុខជាប់នឹងដើមទ្រូង។ ជនរងគ្រោះដួលផ្កាប់មុខ បុកនឹងដី បែកមុខ ចេញឈាម បណ្តាលឲ្យស្លាប់ ៕ ដោយ ៖ បញ្ញាស័ក្តិ
