យោងតាមទិន្នន័យពីផ្សារមូលបត្រកម្ពុជា លើកលែងតែភាគហ៊ុន រដ្ឋាករស្វយ័តក្រុងភ្នំពេញ កំពង់ផែស្វយ័តក្រុងភ្នំពេញ និង ផេសថិក ដែលបានរក្សាថ្លៃថេរត្រឹមពេលផ្សារបិទថ្ងៃពុធម្សិលមិញនេះ ភាគហ៊ុនផ្សេងៗទៀត នៅលើទីផ្សារបានធ្លាក់ចុះដោយមាន កំពង់ផែស្វយ័តក្រុងព្រះសីហនុ នាំមុខជាមួយនឹងការថយចុះចំនួន ១០០រៀលមកបិទត្រឹម ១៣.៥០០រៀលក្នុងមួយហ៊ុន។ ភាគហ៊ុនអេស៊ីលីដា និងហ្ក្រេនធ្វីន និង តំបន់សេដ្ឋកិច្ចពិសេសភ្នំពេញ បានធ្លាក់ចុះ ៦០រៀល ៤០រៀល និង ១០រៀលរៀងគ្នា។
ចំណែក ភាគហ៊ុនឌីប៊ីឌី ដែលជាភាគហ៊ុនស្ថិតក្នុងទីផ្សារកំណើនវិញ បានធ្លាក់ចុះ ១០រៀល ផងដែរមកត្រឹម ២.១៩០រៀល ក្នុងមួយហ៊ុន ដោយមានតម្លៃជួញដូរ ៤៥.៣លានរៀល។ តម្លៃជួញដូរសរុបរបស់ទីផ្សារទាំងពីរមានចំនួន ៤៨១,១៦ លានរៀល ខណៈដែលសន្ទស្សន៍ផ្សារមូលបត្រកម្ពុជា បានធ្លាក់ចុះ០,៥០ភាគរយ មកត្រឹម ៤៨៤,៦១ពិន្ទុ៕
