ភ្នំពេញ ៖ ចៅក្រមស៊ើបសួរ សាលាដំបូងរាជធានីភ្នំពេញ កាលពីល្ងាច ថ្ងៃទី ១៥ ខែ វិច្ឆិកា ឆ្នាំ ២០២១ បានបង្គាប់ឲ្យឃុំខ្លួន ជនត្រូវចោទ ជនជាតិកាណាដា ដើមកំណើតចិនម្នាក់ នៅក្នុងពន្ធនាគារ ជាបណ្ដោះអាសន្ន ជាប់ពាក់ព័ន្ធនឹងការដឹកជញ្ជូន, រក្សាទុក និង ជួញដូរគ្រឿងញៀនឆ្លងដែនចំនួន ជិត១៧០ គីឡូក្រាម ប្រព្រឹត្តនៅក្នុងរាជធានីភ្នំពេញ ។
មន្ត្រីសមត្ថកិច្ចនគរបាលប្រឆាំងគ្រឿងញៀន បានឲ្យដឹងថា ជនសង្ស័យរូបនេះ មានឈ្មោះ FU YONG QING ភេទប្រុស អាយុ ៥២ ឆ្នាំ សញ្ជាតិកាណាដា ដើមកំណើតចិន។
ឈ្មោះ Fu Young Qing ត្រូវបានតំណាងអយ្យការ ចោទប្រកាន់ពីបទ « ដឹកជញ្ជូន , ក្សាទុក និង ជួញដូរ ដោយខុសច្បាប់ នូវសារធាតុញៀន » តាមមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន និង អាចប្រឈមនឹងការជាប់ពន្ធនាគាររហូតអស់មួយជីវិត ប្រសិនបើតុលាការរកឃើញ ពី ពិរុទ្ធភាព។
ឈ្មោះ Fu Young Qing ត្រូវបានសមត្ថកិច្ចនគរបាលចាប់ខ្លួនកាលពីថ្ងៃទី១០ ខែ វិច្ឆិកា ឆ្នាំ២០២១ ។
ក្រោយឃាត់ខ្លួន, សមត្ថកិច្ចប្រឆាំងគ្រឿងញៀន ដកហូតបានថ្នាំងញៀនចម្រុះ សរុប ១៦៧, ៤៧៥.៤៣ គីឡូក្រាម, អាវុធខ្លី១ដើម (មានគ្រាប់៦), ជញ្ជីង១គ្រឿង, រថយន្ត១គ្រឿង និងមានសម្ភារ:មួយចំនួនទៀត ៕រក្សាសិទ្ធិដោយ ៖ ចន្ទា ភា
