នេះជាខណៈពេលដ៏គួរឲ្យអាសូរមួយ ដែលសត្វកវែង១ក្បាលត្រូវងាប់ដោយខ្លួនឯងយ៉ាងវេទនា បន្ទាប់ពីជាប់.កនឹងបង្កៀបដើមឈើបែកជា២ ខណៈវាព្យាយាមកោសរួសរមាស់ ។
សត្វកវែងនេះមានឈ្មោះថា Hairong អាយុ ១០ ឆ្នាំ ហើយៗ វាបានកំពុងរស់នៅក្នុងសួនសត្វ Kunming ក្នុងប្រទេសចិន អស់រយៈពេល ៥ ឆ្នាំ ។
ក្រុមអ្នកទេសចរទៅទស្សនានៅក្នុងសួនសត្វខាងលើនេះ ស្ថិតនៅក្នុងខេត្ត Yunnan (ចិន) បាននាំគ្នារន្ធត់ចិត្តយ៉ាងខ្លាំង នៅពេលឃើញសត្វកវែងដ៏ធំនេះ ត្រូវជាប់ករហូតដាច់ខ្យល់នៅនឹងបង្កៀបដើមបែបនេះ ។
បុគ្គលិកសួនសត្វដែលមានការព្រួយបារម្ភ បានប្រើប្រាស់ជណ្តើរ ដើម្បីឡើងទៅដល់ក្បាលរបស់ Hairong ប៉ុន្តែ ពុំអាចទាញចេញទេ ដោយពួកគេសម្រេចធ្វើការអារកាត់មែកឈើ១ចេញ ទើបរំដោះក្បាលរបស់វារួច ។
ទោះយ៉ាងណា វាហួសពេលទៅហើយ ព្រោះសត្វដ៏ធំនេះ បានដាច់ខ្យល់ងាប់បាត់ទៅហើយ ។
បុគ្គលិកនៅទីនោះ បាននិយាយថា Hairong តែងពឹងពាក់ដើមឈើ ដើម្បីរួសរមាស់របស់វា នៅត្រង់កន្លែង ដែលវាពុំអាចធ្វើទៅបាន ។ ពួកគេជឿថា វាកំពុងព្យាយាមធ្វើសកម្មភាពដដែល ប៉ុន្តែ ជាអកុសល ក៏ត្រូវជាប់កនឹងបង្កៀបដើមឈើរើពុំរួចរហូតងាប់តែម្តងទៅ ៕ ចន្ទី
