Thursday, December 9, 2021

ចុះពិនិត្យពេទ្យម្តង! សត្វកេង​កង​មួយ​ហ្វូង ​មក​សួរ​សុខ​ទុក្ខ​អ្នក​ជំងឺ បង្ក​ការ​ភ្ញាក់​ផ្អើល​ទាំង​ព្រឹក

ជឿថាប្រិយមិត្តជាអ្នកប្រើប្រាស់បណ្តាញសង្គម ពិតជាបានចាប់អារម្មណ៍ និងភ្ញាក់ផ្អើលរួចហើយ ចំពោះវត្តមានដ៏កម្រ របស់សត្វកេងកងមួយហ្វូង ដែលបានបង្ហាញខ្លួននៅក្នុងបរិវេណសាកលវិទ្យាល័យភូមិន្ទភ្នំពេញ កាលពីអំឡុងដើមខែធ្នូ ឆ្នាំ២០២០។

តែយ៉ាងណាមិញ ជាមួយវត្តមានរបស់ហ្វូងសត្វកេងកងដ៏កម្រនោះ គេពុំបានដឹងពីប្រភពនៃទីជម្រករបស់ពួកវា ស្ថិតនៅកន្លែងណានោះទេ។ ប៉ុន្តែ ទន្ទឹមនឹងនេះ​ អ្នកលេងបណ្តាញសង្គមមួយចំនួនដែលហាក់បានដឹងពីប្រភព បានប្រាប់ថា ពួកវាមានម្ចាស់គេថែករក្សាត្រឹមត្រូវ។ រីឯអ្នកខ្លះទៀត ក៏បានប្រាប់ថា ហាមប៉ះពាល់ពួកវាឲ្យសោះ ព្រោះម្ចាស់របស់ពួកវាគឺ «បងធំ» យើងម្នាក់​តើបងធំណាទៅន៎!?។

ដោយឡែក ថ្មីៗនេះ វត្តមានសត្វកេងមួយហ្វូង ដែលមិនដឹងថាជាពពួកសត្វកេងដដែល ឬយ៉ាងណានោះទេ បានធ្វើឲ្យក្រុមគ្រូពេទ្យ និងអ្នកជំងឺ ពិតជាមានការភ្ញាក់ផ្អើលយ៉ាងខ្លាំងតែម្តង ខណៈបានឃើញពួកវាបានហើរមកទុំតាមបង្កាន់ដៃនៃអគារមន្ទីរពេទ្យមិត្តភាពខ្មែរ-សូវៀត កាលពីព្រឹកថ្ងៃទី១៧ ខែវិច្ឆិកា ឆ្នាំ២០២១ ម្សិលមិញ។

នេះបើតាមលោកគ្រូពេទ្យម្នាក់ដែលមានគណនីហ្វេសប៊ុកឈ្មោះ Kith Koeung បានបង្ហោះរូបភាពពីទិដ្ឋភាពហ្វូងសត្វកេងកងទាំងនោះ ដោយភ្ជាប់ Caption ថា៖ «ព្រលឹមឡើង សត្វកេងកង មកសួរសុខទុក្ខអ្នកជំងឺកំពុងសម្រាកព្យាបាលកូវីត»៕ រក្សាសិទ្ធិដោយ៖ លឹម ហុង