វេជ្ជបណ្ឌិតម្នាក់ មកពីរដ្ឋ Haryana ក្នុងប្រទេសឥណ្ឌា បានបង្កភាពចម្រូងចម្រាសលើអ៊ីនធឺណិត បន្ទាប់ពីបង្ហាញខ្លួននៅមុខកាមេរ៉ា ដើម្បីសរសើរពីអត្ថប្រយោជន៍នៃការបរិភោគលាមកគោ ខណៈកំពុងស៊ីលាមកគោស្តែងៗតែម្តង។
ឱសថបុរាណឥណ្ឌា ត្រូវបានផ្សព្វផ្សាយជាយូរយារណាស់មកហើយ ថាជាការព្យាបាលដែលសូម្បីតែអាចទប់ទល់នឹងជំងឺដូចជាមហារីក និង Covid ។ ប៉ុន្តែ នេះមិនរួមបញ្ចូលវេជ្ជបណ្ឌិតដែលបានទទួលការបណ្តុះបណ្តាលដែលជាទូទៅជឿជាក់លើអ្វីៗ ជាលក្ខណៈវិទ្យាសាស្ត្រ និងការសាកល្បងព្យាបាល នោះទេ។ តែទោះយ៉ាងណា សម្រាប់គ្រូពេទ្យម្នាក់ឈ្មោះ Manoj Mittal អ្នកឯកទេសជំងឺកុមារ មកពីស្រុក Karnal នៃរដ្ឋ Haryana បានកំពុងធ្វើឲ្យមនុស្សនៅលើពិភពលោកភ្ញាក់ផ្អើល និងហួសចិត្តជាខ្លាំង ខណៈឃើញក្នុងវីដេអូដែលត្រូវបានបង្ហោះនាពេលថ្មីៗនេះ និងកំពុងរីករាលដាល បង្ហាញលោក Mottal កំពុងខាំបរិភោគលាមកគោ ហើយសរសើរពីអត្ថប្រយោជន៍របស់វាទៅលើរាងកាយ ចិត្ត និងព្រលឹងរបស់មនុស្ស។
Mittal និយាយថា “គ្រប់ផ្នែកនៃ Panchagavya ដែលទទួលបានពីគោ គឺមានតម្លៃណាស់សម្រាប់មនុស្សជាតិ” ។ “ឃើញថា បើយើងស៊ីលាមកគោ នោះរូបកាយ និងចិត្តរបស់យើងប្រែជាបរិសុទ្ធ ហើយព្រលឹងរបស់យើងក៏ក្លាយជាបរិសុទ្ធ។ ពេលវាចូលទៅក្នុងខ្លួនយើង វាធ្វើឲ្យខ្លួនយើងស្អាត»។
គ្រូពេទ្យរូបនេះបានបន្ថែមថា ម្តាយរបស់គាត់ធ្លាប់បញ្ចុះលាមក ដោយហូបលាមកគោ ហើយស្ត្រីដែលស៊ីកាកសំណល់គោដ៏គួរឱ្យខ្ពើម លែងត្រូវការគ្រូពេទ្យវះកាត់ពេលសម្រាលកូនទៀតហើយ។
នៅក្នុងវីដេអូនោះ គេឃើញលោកវេជ្ជបណ្ឌិត Manoj Mittal រើសលាមកគោមួយដុំ ហើយយកវាមកស៊ីជាដុំៗ ដូចជានំប៉័ង អុីចឹង។ កាយវិការរបស់គាត់កំពុងទទួលបានការឆ្លើយតបចម្រុះនៅលើប្រព័ន្ធផ្សព្វផ្សាយសង្គម ។ ក្នុងនោះ មនុស្សមួយក្រុមបានអបអរសាទរគាត់ចំពោះការឱបក្រសោបឱសថបុរាណឥណ្ឌា និងផ្សេងទៀតថា គាត់កំពុងគេចចេញពីតក្កវិជ្ជាវិទ្យាសាស្ត្រ ដូច្នេះ គាត់អាចកំពុងតែឆ្កួតមែនទែនហើយ។
លើសពីនេះ មនុស្សជាច្រើនទៀត ក៏បានស្នើក្រុមប្រឹក្សាវេជ្ជសាស្ត្រឥណ្ឌា គួរតែកត់សម្គាល់រឿងនេះ ហើយលុបអាជ្ញាប័ណ្ណរបស់គាត់ចោលទៅ ដើម្បីអនុវត្តវិជ្ជាជីវៈវេជ្ជសាស្ត្រ។ ព្រោះក្នុងនាមជាគ្រូពេទ្យ គាត់មិនគួរចេញវេជ្ជបញ្ជាថ្នាំ gobar (លាមកគោ) ដល់ក្មេងតូចៗស្លូតត្រង់នោះឡើយ៕ រក្សាសិទ្ធិដោយ៖ លឹម ហុង