រថយន្តទំនើបពីរបាំងកន្លះ១គ្រឿងម៉ាក TUNDRA បានធ្វើឲ្យមហាជននៅក្នុងបណ្តាញសង្គម នាំគ្នាហួសចិត្តខ្លាំងបំផុត បន្ទាប់បានឃើញពីទង្វើម្ចាស់ឡាននេះ បើកឡើងទៅចតនៅលើសួនដាំស្មៅមួយកន្លែងទាំងយប់ ស្ថិតក្នុងភូមិសាស្រ្តក្រុងព្រះសីហនុ ដែលបានបណ្តាលឲ្យខ្ទេចស្មៅបែកភក់វ៉ល់តែម្តង។
យ៉ាងណាមិញ ក្រោយបានដឹងថា ឡានទំនើបខាងលើ បើកជាន់ស្មៅឡើងខ្ទេចបែបនេះ ភ្លាមៗនោះ ក្រុមការងាររដ្ឋបាលក្រុងព្រះសីហនុ បានសហការចុះមកកាន់កន្លែងកើតហេតុ និងដាក់ច្រវ៉ាក់កង់ឡាន រួចស្ទួចយកទៅទាំងយប់តែម្តង។ នេះបើតាមឯកឧត្តម គួច ចំរើន អភិបាលខេត្តព្រះសីហនុ បានសម្តែងការហួសចិត្តថា៖ «សង្ហាណាស់ជាន់លេីស្មៅទាំងយប់ យកមកដាក់ច្រវ់ាក់ទាំងយប់វិញម្ដងមេីល។ អរគុណក្រុងព្រះសីហនុ ចាត់ការបានល្អ»។
ជាមួយទង្វើនេះផងដែរ គេបានសង្កេតឃើញអ្នកលេងបណ្តាញសង្គម បានចូលខមិនស្នើឲ្យឯកឧត្តម គួច ចំរើន ធ្វើការផាកពិន័យឲ្យច្រើនៗ ដើម្បីឲ្យរាងចាលនៅថ្ងៃក្រោយ ហើយលោកអភិបាលក៏បានឆ្លើយតបថា៖ «ប្រហែលហើយ ចេញថ្លៃឡានស្ទួច»។
តែទោះជាយ៉ាងណា យើងក៏មិនដឹងថា អ្នកបើកបរបំពាននោះ គឺជាជនជាតិខ្មែរ ឬបរទេសនោះទេ ខណៈមហាជនចង់ឃើញទាំងម្ចាស់ និងផ្លាកលេខឡាន ដើម្បីទុកជាមេរៀនដល់អ្នកដទៃ កុំចេះតែហ៊ានតាមចិត្ត បើមិនជួយថែរក្សាទេ កុំជួយបំផ្លាញសម្បត្តិសាធារណៈរបស់ជាតិ!៕ រក្សាសិទ្ធិដោយ៖ លឹម ហុង
