ភ្នំពេញ៖ កាណូតដឹកជញ្ជូនអ្នកដំណើរមិនយកប្រាក់ដែលចាប់ចេញដំណើរពីចំណតឫស្សីកែវទៅក្រុងតាខ្មៅ ក្នុងរយៈពេលជាង១០ថ្ងៃនេះបានដឹកជញ្ជូនអ្នកដំណើរបានចំនួនជិត៦០០០នាក់ ជាមួយនិងភាពសប្បាយរីករាយនៃការផ្តើមឲ្យមានការធ្វើចរាចរណ៍លើផ្លូវទឹក។
លោកសាំ ពិសិដ្ឋ នាយកមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងនៅព្រឹកថ្ងៃទី២០ មេសា ឆ្នាំ២០១៨នេះថា កាណូតដឹកជញ្ជូនអ្នកដំណើរមិនយកប្រាក់ដែលចាប់ផ្តើមចេញដំណើរពីចំណតឫស្សីកែវទៅចំណតក្រុងតាខ្មៅ ចាប់ពីថ្ងៃ៦ មេសារហូតដល់១៩ មេសា២០១៨នេះមាន អ្នកជិះចំនួន៥៩៣៦នាក់ ដោយប្រើប្រាស់កាណូតចំនួន៣គ្រឿង ក្នុងមួយថ្ងៃ២០ជើង ដោយឆ្លងកាត់ចំនួន៤ចំណត រួមមានចំណតឫស្សីកែវ ផ្សារចាស់ ចតុមុខ និងចំណតស្ថានីយក្រុងតាខ្មៅ ។
លោកសាំ ពិសិដ្ឋ បានបញ្ជាក់ថា ក្នុងរយៈពេលជាង១០ថ្ងៃនេះ ចំនួនអ្នកមកទទួលសេវាកម្មជិះកាណូតនេះច្រើនជាងគេគឺនៅថ្ងៃទី១៦ មេសា ដែលជាថ្ងៃចុងក្រោយនៃបុណ្យចូលឆ្នាំថ្មី ដោយមានចំនួនរហូតដល់ចំនួន៨៩១នាក់ ។
លោកសាំ ពិសិដ្ឋ បានបន្តបញ្ជាក់ទៀតថា កាណូតដឹកជញ្ជូនអ្នកដំណើរមិនយកប្រាក់នេះបាន ចាប់ផ្តើមឲ្យដំណើរការកាលពីថ្ងៃទី៦ មេសា ហើយជាគម្រោង ការជិះកាណូតមិនយកលុយនេះនឹងបន្តរហូតដល់១សីហា២០១៨ ។ ដូច្នេះទេលោកសូមអំពាវនាវឲ្យបងប្អូនប្រជាពលរដ្ឋទាំងបន្តការគាំទ្រនិងជិះកាណូតនេះឲ្យបានច្រើន ដើម្បីកាត់បន្ថយការកកស្ទះចរាចរលើផ្លូវគោក។
គួរបញ្ជាក់ថា ក្នុងឱកាសចូលឆ្នាំថ្មីនេះ ប្រជាពលរដ្ឋយ៉ាងច្រើនបានជិះកាណូតដឹកជញ្ជូនអ្នកដំណើរ ឫស្សីកែវ-តាខ្មៅ ដោយក្នុងរយៈពេល ៤ថ្ងៃចាប់ពីថ្ងៃ១៤ មេសា ដល់ថ្ងៃ១៧មេសា មានអ្នកជិះចំនួនជិត៣០០០នាក់ ជាមួយនិងភាពសប្បាយរីករាយនៃការផ្តើមឲ្យមានការធ្វើចរាចរណ៍លើផ្លូវទឹកនេះ៕ ដោយ៖បញ្ញាស័ក្តិ
