អ្នកនៅរស់រានមានជីវិតចុងក្រោយបង្អស់ ដែលកើតក្នុងសតវត្សទី១៩ គឺលោកយាយ Francisca Susano បានទទួលមរណភាពក្នុងខែនេះហើយ ក្នុងអាយុ ១២៤ ឆ្នាំ។
លោកយាយ Susano ដែលត្រូវបានគេស្គាល់ឈ្មោះមួយទៀតថា “Lola Iska” បានទទួលមរណភាពស្ថិតក្នុងស្ថានភាពគេង នៅវេលាម៉ោងប្រហែល ៦ និង ៤៥ នាទី ល្ងាចថ្ងៃទី២២ ខែវិច្ឆិកា ឆ្នាំ២០២១ នៅទីក្រុង Negros Occidental ប្រទេសហ្វីលីពីន។
យោងតាម CNN ស្រ្តីជនជាតិហ្វីលីពីនរូបនេះ បានកើតនៅថ្ងៃទី១១ ខែកញ្ញា ឆ្នាំ១៨៩៧ ដែលជាឆ្នាំមុនពេលហ្វីលីពីន ត្រូវបានរំដោះខ្លួនចេញពីអាណានិគមរបស់អេស្ប៉ាញ។
ការស្លា-ប់របស់លោកយាយ Susano គឺដោយសារជំងឺចាស់ជរារបស់គាត់ ដោយពុំពាក់ព័ន្ធនឹងជំងឺ Covid-19 នោះទេ។ នេះបើតាមមន្ត្រីព័ត៌មានសាធារណៈរបស់ទីក្រុង អ្នកស្រី Jake Carlyne Gonzales បានបញ្ជាក់ថា លោកយាយ Susano ត្រូវបានតេស្តពុំរកឃើញជាមួយរោគសញ្ញាណាមួយនៃជំងឺឆ្លងនេះទេ។
ទីក្រុង Kabankalan ជាលើកដំបូងហើយ ដែលបានប្រកាសពីការស្លា-ប់របស់លោកយាយ Susano នៅលើទំព័រ Facebook ផ្លូវការរបស់ពួកគេ។ សេចក្ដីថ្លែងការណ៍នោះបានសរសេរថា៖ «វាជាការសោកសៅក្នុងចិត្តរបស់យើងនៅពេលដែលយើងបានទទួលដំណឹងថា លោកយាយ Lola Francisca Susano មនុស្សជាទីស្រឡាញ់របស់យើងបានទទួលមរណភាពនៅព្រឹកថ្ងៃចន្ទទី ២២ ខែវិច្ឆិកា នេះ»។
ពួកគេបានបន្ថែមថា «លោកយាយ Lola Iska ត្រូវបានគេចាត់ទុកថាជាមនុស្សចាស់ជាងគេ នៅ Negros Occidental និងនៅក្នុងប្រទេសហ្វីលីពីន»។
យោងតាមសារព័ត៌មាន Manila Bulletin បានឲ្យដឹងថា លោកយាយ Susano មានកូនចំនួន ១៤ នាក់ ហើយម្នាក់ក្នុងចំណោមពួកគេ គឺមានអាយុ ១០១ ឆ្នាំ។
កំណត់ត្រាពិភពលោក Guinness បានកំពុងស្ថិតក្នុងដំណើរការផ្ទៀងផ្ទាត់ឯកសាររបស់លោកយាយ Susano ដើម្បីប្រកាសជាផ្លូវការថា តើគាត់ជាមនុស្សចាស់ជាងគេលើពិភពលោក។ តែទោះជាយ៉ាងណា លទ្ធផល នៅមិនទាន់ត្រូវបានចេញផ្សាយនៅឡើយទេ៕ រក្សាសិទ្ធិដោយ៖ លឹម ហុង
