ខេត្តព្រះសីហនុ៖ ភ្ញៀវទេសចរជាតិ–អន្តរជាតិ ពិសេសប្រជាពលរដ្ឋរស់នៅក្រុងព្រះសីហនុ ដែលជាទីក្រុងស្អាត ទើបទទួលជ័យលាភីផ្ការំដួល៣ទងពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាឆ្នាំ២០១៨នេះ បានបន្តរិះគន់រដ្ឋបាលក្រុង-ខេត្តព្រះសីហនុនៅក្រោយពិធីបុណ្យចូលឆ្នាំថ្មីឆ្នាំនេះ ថាមិនទាន់អាចគ្រប់គ្រងកាកសំណល់សំរាម ឲ្យបានល្អទេ។
ភ្ញៀវទេសចរ ពិសេសភ្ញៀវជាតិ បានបង្ហាញការហួសចិត្ត និងបានបញ្ចេញទស្សនថា មិនគួរណាកាកសំណល់សំរាម ត្រូវគេគរទុកចោលគ្មានរបៀបរៀបរយ និងជះក្លឹនស្អុយអសោច នៅតាមទីសាធារណៈ ឬតាមចិញ្ចើមផ្លូវធ្វើដំណើរនាទីប្រជុំជនក្រុងទេសចរណ៍ជាប់ឆ្នេរសមុទ្រមួយនេះទេ។
ចំណែក ប្រជាពលរដ្ឋរស់នៅក្នុងក្រុងព្រះសីហនុភាគច្រើន ក៏បានរិះគន់ថ្នាក់ដឹកនាំស្ថាប័នពាក់ព័ន្ធ ដែលជាអ្នកទទួលខុសត្រូវការងារប្រមូលសំរាម រួមមាន៖ ក្រុមហ៊ុនប្រមូលសំរាម ពិសេសថ្នាក់ដឹកនាំនៃរដ្ឋបាលក្រុង–ខេត្តព្រះសីហនុ ដែលមិនទាន់អាចគ្រប់គ្រងកាកសំណល់សំរាម ដែលប្រជាពលរដ្ឋបានវេចខ្ចប់ និងយកទៅគរទុកនៅតាមមុខផ្ទះ ឬទីតាំងនីមួយៗ ប៉ុន្តែមិនមានរថយន្តក្រុមហ៊ុនប្រមូលសំរាម មកដឹក ឬប្រមូលសំរាមឲ្យបានទាន់ទេ។
ប្រជាពលរដ្ឋភាគច្រើនបានរអ៊ូរទាំ និងរិះគន់ក្រុមហ៊ុនប្រមូលសំរាម ដែលទើបទទួលសិទ្ធិថ្មី ដើម្បីប្រមូលសំរាម នាទីប្រជុំជនក្រុងព្រះសីហនុ ជំនួសឲ្យក្រុមហ៊ុនស៊ិនទ្រី ដែលត្រូវបញ្ចប់កុងត្រាថា មិនទាន់មានលទ្ធភាព ឬខ្វះបទពិសោធន៍ក្នុងការងារប្រមូលសំរាមទេ ហើយសំរាមត្រូវគេទុកចោលយូរថ្ងៃនៅតាមចិញ្ចើមផ្លូវថ្នល់ និងជះក្លឹនស្អុយ។
បញ្ហាសំរាមនេះដែរ ប្រជាពលរដ្ឋនៅតាមគ្រួសារខ្លះ បានចំអក និងប្រដូចការទុកកាកសំណល់សំរាមគរចោលនៅតាមចិញ្ចើមផ្លូវ និងមានក្លឹនស្អុយរាល់ថ្ងៃនេះ ជាពិសេសកាកសំណល់សំរាម ដែលត្រូវគេគរទុកចោល នៅក្រោយពិធីបុណ្យចូលឆ្នាំថ្មីបានបញ្ចប់នេះ ស្ទើរក្លាយទៅជាទីតាំងពិព័រណ៍ សំរាម ដើម្បីស្វាគមន៍ភ្ញៀវទេសចរជាតិ–អន្តរជាតិ ចូលមកទស្សនាអញ្ចឹងដែរ។
តាមការកត់សម្គាល់សំរាមគរទុកចោលយូរថ្ងៃនៅតាមចិញ្ចើមផ្លូវ ហើយគ្មានរថយន្តក្រុមហ៊ុនមកប្រមូលឲ្យបានទៀងទាត់ ឬទាន់ពេលនេះ គឺកំពុងរង់ការរិះគន់ពីសំណាក់ប្រជាពលរដ្ឋរស់ទីប្រជុំជនក្នុងក្រុងព្រះសីហនុ និងភ្ញៀវទេសចរជាបន្តបន្ទាប់ ព្រោះបានជះក្លឹនស្អុយអសោចដល់អ្នកដំណើរឆ្លងកាត់ និងពលរដ្ឋរស់នៅក្នុងមូលដ្ឋាននេះ។
ប្រជាពលរដ្ឋមួយចំនួន បានប្រដូចក្រុងព្រះសីហនុ ដែលទើបឈ្នះជ័យលាភីជាទីក្រុងស្អាត និងទទួលបានផ្ការំដួល៣ទងពី សម្តេចតេជោ ហ៊ុន សែន នាយករដ្ឋមន្ត្រីក្នុងពេលថ្មីៗនេះ ថាបានក្លាយទៅជាទីកន្លែងតាំងពិព័រណ៍សំរាម សម្រាប់ផ្តល់ជូនភ្ញៀវទេសចជាតិ–អន្តរជាតិ ដែលចូលមកដល់មូលដ្ឋាននេះ។
ភ្ញៀវទេសចរខ្លះទៀត បង្ហាញការហួសចិត្តថា មិនគួរណាក្រុងព្រះសីហនុ ដែលទើបជាប់ចំណាត់ថ្នាក់ទីក្រុងស្អាត ហើយឈ្នះជ័យលាភីទទួលបានផ្ការំដួល ៣ទង ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឆ្នាំ២០១៨នេះ ប៉ុន្តែបែរជាជាក់ស្តែងបរិស្ថាន នៅក្នុងទីក្រុងទាំងមូល គឺគ្មានអនាម័យ ដោយកាកសំណល់សំរាម ត្រូវគេទុកចោលយូរថ្ងៃ គ្មានសណ្តាប់ធ្នាប់នៅតាមចិញ្ចើមផ្លូវសាធារណៈនិងមានក្លឹនស្អុយបែបនេះទៅវិញ។
ចំណុចនេះ ភ្ញៀវទេសចរជាតិ បានទទូចដល់ថ្នាក់ដឹកនាំរដ្ឋបាលក្រុង–ខេត្តព្រះសីហនុ ពិសេសក្រុមហ៊ុនប្រមូលសំរាម និងប្រជាពលរដ្ឋរស់មូលដ្ឋាននេះ ត្រូវរួមសហការគ្នាសំអាតបរិស្ថានមូលដ្ឋាននេះ ឲ្យបានប្រសើរជាងពេលបច្ចុប្បន្ន ព្រោះក្រុងព្រះសីហនុនេះ ទើបជាប់ចំណាត់ថ្នាក់ថា ជាទីក្រុងស្អាត និងទទួលបានជ័យលាភីផ្ការំដួល៣ទង ពីសម្តេចប្រមុខដឹកនាំ ដើម្បីរក្សាកិត្តិយសខេត្ត កិត្តិយសប្រទេសជាតិ ជាពិសេសកុំឲ្យប៉ះពាល់កិត្តិយស របស់សម្តេចតេជោ ហ៊ុន សែន ដែលបានផ្តល់ទំនុកចិត្ត និងលើកទឹកចិត្តដល់ថ្នាក់ដឹកនាំក្រុង–ខេត្តព្រះសីហនុកន្លងមក។
ទោះជាបែបនេះក្តី ទាំងប្រជាពលរដ្ឋ និងភ្ញៀវទេសចរជាតិភាគច្រើន បានគាំទ្រ ទៅលើសកម្មភាពដឹកនាំ របស់ លោក អ៊ី សុខឡេង អភិបាលក្រុងព្រះសីហនុ និង លោក យន្ត មីន អភិបាលខេត្តព្រះសីហនុ នៅក្នុងអាណត្តិនេះ ដែលបានដឹកនាំអភិវឌ្ឍមូលដ្ឋានមានការរីកចម្រើនស្ទើរគ្រប់វិស័យ ពិសេសលើវិស័យសំណង់នៅក្នុងប៉ុន្មានឆ្នាំចុងក្រោយនេះ។
ភ្ញៀវទេសចរជាតិ ដែលបានធ្វើដំណើរមកកម្សាន្តខេត្តព្រះសីហនុ នាឱកាសពិធីបុណ្យចូលឆ្នាំថ្មីឆ្នាំនេះ ក៏បានកោតសរសើរ ដល់ថ្នាក់ដឹករដ្ឋបាលក្រុង និងខេត្តព្រះសីហនុ ដែលបានរួមសហការគ្នា អភិវឌ្ឍសួនច្បារ តាំងភ្លើងបំភ្លឺ ស្តារហេដ្ឋារចនាសម្ព័ន្ធពង្រីកផ្លូវថ្នល់ លូបង្ហូរទឹក និងស្តារអូរធម្មជាតិមួយចំនួនបានធំទូលាយ ដើម្បីរំដោះទឹកជនលិច មានលទ្ធផលវិជ្ជមានច្រើននាពេលកន្លងមកនេះ។
យ៉ាងណាក៏ដោយចុះ ទាំងប្រជាពលរដ្ឋរស់នៅក្នុងក្រុងព្រះសីហនុ និងភ្ញៀវទេសចរជាតិ បានសំណូមពរដល់អភិបាលក្រុង–ខេត្តព្រះសីហនុ ស្នើឲ្យជួយជម្រុញទៅក្រុមហ៊ុនប្រមូលសំរាម ឲ្យបន្តសកម្មភាពចុះប្រមូលសំរាម នៅតាមទីសាធារណៈ ឬតាមផ្លូវសំខាន់ៗ ដែលភ្ញៀវទេសចរនិយមធ្វើដំណើរឆ្លងកាត់ឲ្យបានជាប្រចាំ ដោយមិនត្រូវទុកឲ្យកាកសំណល់សំរាមគរទុកចោលច្រើនថ្ងៃ និងមានជះក្លឹនស្អុយដូចរាល់ថ្ងៃនេះទៀតទេ។
ទាក់ទិនបញ្ហានេះ មន្ត្រីរដ្ឋបាលក្រុងខេត្តព្រះសីហនុ បានឲ្យដឹងថា បញ្ហាសំរាមនេះ អាជ្ញាធរពាក់ព័ន្ធ បានយកចិត្តទុកដាក់ ដើម្បីធ្វើយ៉ាងណាកែឆ្នៃ ឲ្យបរិស្ថានខេត្តព្រះសីហនុទាំងមូល ឲ្យមានអនាម័យ និងសោភ័ណ្ឌភាពល្អ និងឆ្លើយតបជ័យលាភីផ្ការំដួល ៣ទង ដែលសម្តេចនាយករដ្ឋមន្ត្រី ទើបបានប្រគល់ជូននាឆ្នាំ២០១៨នេះ៕ ដែន សីមា
