ភ្នំពេញ ៖ រថយន្តដឹកក្រដាសអេតចាយសំពីងសំពោង បើកបត់ឆ្វេងឆ្លងផ្លូវបួងចង្កូតខ្លាំងពេក ក្រឡាប់បះជើងនៅកណ្តាលផ្លូវ បង្កឱ្យមានការកកស្ទះចរាចរណ៍ សំណាងល្អមិនបង្កឲ្យមានអ្នករងរបួស។
ហេតុការណ៍នេះបានកើតឡើងកាលពីវេលាម៉ោង ៨និង១០ព្រឹកថ្ងៃទី៣០ ខែវិច្ឆិកា ឆ្នាំ ២០២១ ស្ថិតនៅត្រង់ចំណុចស្តុបបាគូ ផ្លូវ៥០ម៉ែត្រ ភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាក KAI ពណ៌ខៀវពាក់ផ្លាកលេខភ្នំពេញ 3D-2270 បើកបរដោយបុរសម្នាក់ ដឹកក្រដាសឡាំងអេតចាយសំពីងសំពោង បើកបរតាមបណ្ដោយផ្លូវ២១៧ ក្នុងទិសដៅពីត្បូងទៅជើង ខណៈមកដល់ត្រង់ចំណុចស្តុបបាគូ បួងចង្កូតបត់ឆ្វេងឆ្លងផ្លូវ ដោយល្បឿននៅលឿនក្រឡាប់បះជើង សំណាងល្អមិនបង្កឲ្យមានអ្នករងរបួស នៅក្នុងហេតុការណ៍គ្រោះថ្នាក់ចរាចរណ៍ខាងលើនោះទេ។
ក្រោយកើតហេតុសមត្ថកិច្ចមូលដ្ឋាន បានចុះពិនិត្យទីតាំងកន្លែងកើតហេតុ ដោយមិនមានគ្រោះថ្នាក់ដល់អ្នកដទៃ និងមិនបង្កឲ្យខូចខាតដល់ទ្រព្យសម្បត្តិរដ្ឋ ក៏អនុញ្ញាតឱ្យម្ចាស់រថយន្ត ហៅរថយន្តស្ទូចមកស្ទូចយករថយន្តទៅជួសជុល ដោយខ្លួនឯង៕ រក្សាសិទ្ធិដោយ ៖ សួង សាម
