ភ្នំពេញ ៖ ជំនួបសម្ដែងការគួរសម និងពិភាក្សាការងាររវាង ឯកឧត្តម ស៊ុយ សែម រដ្ឋមន្រ្តីក្រសួងរ៉ែ និងថាមពល និងលោកស្រី Alissar Chaker ប្រធានកម្មវិធីអភិវឌ្ឍន៍សហប្រជាជាតិប្រចាំកម្ពុជា(UNDP) នៅថ្ងៃទី៣០ ខែវិច្ឆិកា ឆ្នាំ២០២១ នៅទីស្តីការក្រសួងរ៉ែនិងថាមពល ដើម្បីស្វែងយល់បន្ថែម អំពីទស្សន:វិស័យរបស់ក្រសួង និងគម្រោងអាទិភាពនានា ពាក់ព័ន្ធទៅនឹងការអភិវឌ្ឍប្រសិទិ្ធភាពថាមពល ក៏ដូចជាឱកាស និងគំនិតផ្តួចផ្តើមថ្មីៗបន្ថែមទៀត ដើម្បីបន្ត និងជំរុញកិច្ចសហប្រតិបត្តិការក្នុងវិស័យថាមពល។
ឯកឧត្តមរដ្ឋមន្ត្រីស៊ុយ សែម បានថ្លែងអំណរគុណដល់កម្មវិធីអភិវឌ្ឍន៍សហប្រជាជាតិប្រចាំកម្ពុជា ដែលបានផ្តល់កិច្ចសហការ និងកិច្ចគាំទ្រជាច្រើន ក្នុងគម្រោងអភិវឌ្ឍន៍ថាមពលរបស់កម្ពុជា ដែលក្នុងនោះរួមមាន៖ ជំនួយហិរញ្ញប្បទាន គម្រោងកសាងសមត្ថភាព គម្រោងបច្ចេកទេស និងការសិក្សាស្រាវជ្រាវ គម្រោងប្រឹក្សាយោបល់ ទាំងក្របខណ្ឌច្បាប់ លិខិតបទដ្ឋានគតិយុត្ត សេចក្តីណែនាំនិងវិធានការផ្សេងៗ និង ការផ្តល់ជាសម្ភារៈបរិក្ខាជាដើម ដែលសរុបមានចំនួនប្រមាណ ១០ គម្រោងសម្រាប់ឆ្នាំ២០២១ នេះ។
ឯកឧត្តមរដ្ឋមន្ត្រី ក៏បានជម្រាបជូនអំពីចំណុចសំខាន់ៗ ក្នុងការអភិវឌ្ឍវិស័យថាមពល រួមមាន៖ គោលដៅនៃការអភិវឌ្ឍវិស័យថាមពលនៅកម្ពុជា លទ្ធផលនៃការរៀបចំផែនការមេអភិវឌ្ឍវិស័យថាមពលកម្ពុជា ជាមួយធនាគារ ADB និង វឌ្ឍនភាព នៃការរៀបចំគោលនយោបាយជាតិ ស្តីពីប្រសិទ្ធភាពថាមពល និងជំហររបស់វិស័យថាមពលកម្ពុជា ពាក់ព័ន្ធទៅនឹងបញ្ហាអាកាសធាតុ។
ភាគីទាំងពីរ បេ្តជ្ញាពង្រឹងការអនុវត្តស្របតាមអនុស្សារណៈយោគយល់គ្នា និងពង្រឹងភាពជាដៃគូ ក្នុងវិស័យថាមពលបន្តទៀត។
លោកស្រីប្រធានកម្មវិធីអភិវឌ្ឍន៍សហប្រជាជាតិប្រចាំកម្ពុជា នឹងបន្តស្វែងរកគម្រោងជំនួយផ្សេងៗ និងកៀងគរជំនួយហិរញ្ញវត្ថុ ពីដៃគូអភិវឌ្ឍន៍ផ្សេងៗទៀតផងដែរ ដើម្បីការអភិវឌ្ឍវិស័យថាមពលរបស់កម្ពុជា ជាពិសេសគឺការផ្តោតលើគម្រោងប្រសិទិ្ធភាពថាមពល និងការប្រយុទ្ធប្រឆាំងនឹងបញ្ហាប្រែប្រួលអាកាសធាតុ៕ រក្សាសិទ្ធិដោយ ៖ កូលាប
