ភ្នំពេញ ៖ តុលាការកំពូល កាលពីព្រឹកថ្ងៃទី ០៣ ខែ ធ្នូ ឆ្នាំ ២០២១នេះ បានបើកសវនាការ ប្រកាសសាលដីកា លើបណ្តឹងសាទុក្ខ របស់ បុរសជនជាតិអាហ្វ្រិកខាងត្បូងម្នាក់ ដែលត្រូវបានតុលាការជាន់ទាប កាត់ទោស ដាក់ពន្ធនាគារ កំណត់អស់មួយជីវិត ជាប់ពាក់ព័ន្ធនឹងការ ដឹកជញ្ជូនគ្រឿងញៀន ឆ្លងដែន ដោយលេបថ្នាំញៀនទុក នៅក្នុងពោះរបស់គាត់ ប្រព្រឹត្តនៅចំណុច ច្រកអ្នកធ្វើដំណើរមកដល់ នៃ អាកាសយានដ្ឋានអន្តរជាតិភ្នំពេញ ស្ថិតក្នុងសង្កាត់កាកាប ខណ្ឌពោធិ៍សែនជ័យ កាលពីថ្ងៃទី ២៣ ខែកញ្ញា ឆ្នាំ ២០១៦។
សវនាការនេះ ដឹកនាំដោយលោកចៅក្រមនិល ណុន ជាប្រធានក្រុមប្រឹក្សាជំនុំជម្រះ និង មានលោកព្រះរាជអាជ្ញារង ប៊ូ- ប៊ុនហាង គឺជាតំណាងមហាអយ្យការអមតុលាការកំពូល។
តុលាការកំពូល បានសម្រេចតម្កល់សាលដីការបស់សាលាឧទ្ធរណ៍ រាជធានីភ្នំពេញ រក្សាទុកជាបានការដដែល និង តម្កល់ទោសជនជាប់ចោទ ឲ្យ ជាប់គុកអស់មួយជីវិត នៅក្នុងពន្ធនាគារ។
លោកចៅក្រមនិល ណុន បានថ្លែងឲ្យដឹងថា ជនជាប់ចោទ រូបនេះ មានឈ្មោះ BOTHA JACOBUS DAWIE ភេទ ប្រុស អាយុ ៣៥ ឆ្នាំ ជនជាតិអាហ្វ្រិកខាងត្បូង។
ជនជាប់ចោទ ត្រូវបានសាលាដំបូង រាជធានីភ្នំពេញ កាលពីថ្ងៃទី ២ ខែ ឧសភា ឆ្នាំ ២០១៧ ផ្តន្ទាទោសដាក់ពន្ធនាគារ កំណត់អស់មួយជីវិត និង ពិន័យជាប្រាក់ ចំនួន ៤០លានរៀលសម្រាប់ដាក់ចូលក្នុងថវិកាជាតិ។
គាត់បានប្តឹងឧទ្ធរណ៍ ខណៈតែសាលាឧទ្ធរណ៍ បានតម្កល់ទណ្ឌកម្មរបស់ទោសរបស់គាត់ រក្សាទុកដដែល។
គាត់ក៏បន្តប្តឹងសាទុក្ខ មកកាន់ តុលាការកំពូលទៀត។
ជនជាប់ចោទត្រូវចាប់ឃាត់ខ្លួន កាលពីថ្ងៃទី ២៣ ខែ កញ្ញា ឆ្នាំ ២០១៦ ចំណុច កន្លែងប្រព្រឹត្តបទល្មើស និងទីតាំងដូចខាងលើ នៅក្នុងព្រលានយន្តហោះអន្តរជាតិភំ្នពេញ ។
សមត្ថកិច្ចនគរបាលប្រឆាំងគ្រឿងញៀន នៃក្រសួងមហាផ្ទៃ ដកហូតបានគ្រឿងញៀន ប្រភេទកូកាអ៉ីន មានទម្ងន់សរុបចំនួន ៥៨៧, ១០ ក្រាម ដែលលាក់ទុក នៅក្នុងពោះរបស់គាត់។
គួររំលឹកថា នាពេលសវនាការ កាលពីថ្ងៃទី ២៦ ខែ វិច្ឆិកា ឆ្នាំ ២០២១, ជនជាប់ចោទឈ្មោះ BOTHA JACOBUS DAWIE បានឆ្លើយបដិសេធចំពោះការចោទប្រកាន់ ខាងលើ និង និយាយថា នៅក្នុងករណីនេះ គឺ ខ្លួនគ្រាន់តែតែស៊ីឈ្នួល យកគ្រឿងញៀនអោយគេតែប៉ុណ្ណោះ និង ,មិនមែនជាអ្នកជួញដូរ ឬ ជាម្ចាស់ថ្នាំញៀន ដែលបានដកហូតនោះទេ។
BOTHA JACOBUS DAWIE បានសំណូពរ ដល់តុលាការកំពូល មេត្តាសម្រេច លើកការចោទប្រកាន់ និងដោះលែងរូបគាត់ អោយមានសេរីភាពវិញ៕ រក្សាសិទ្ធិដោយ ៖ ចន្ទា ភា