ភ្នំពេញ ៖ តុលាការកំពូល កាលពីព្រឹកថ្ងៃទី ០៨ ខែ ធ្នូ ឆ្នាំ ២០២១នេះ បានបើកសវនាការ ប្រកាសសាលដីកា លើបណ្ដឹងសារទុក្ខរបស់ជនជាប់ចោទម្នាក់ ដែលជាអតីតនគរបាល ជាប់ពាក់ព័ន្ធនឹងបទ ល្មើសសញ្ចារកម្មស្ថានទម្ងន់ទោស ដោយយកសង្សារខ្លួនឲ្យទៅ អ្នកដទៃរួមភេទដើម្បីយកលុយ ប្រព្រឹត្តនៅភូមិរោង ឃុំចាម ស្រុកកំពង់ត្របែក ខេត្ត ព្រៃវែង កាលពីពអំឡុងខែ វិច្ឆិកា ឆ្នាំ ២០១៧ និង ខែ មករា ឆ្នាំ ២០១៨។
តុលាការកំពូលបានសម្រេចតម្កល់សាលដីការបស់សាលាឧទ្ធរណ៍ រាជធានីភ្នំពេញ រក្សាទុកជាបានការដដែល និង សម្រេច តម្កល់ទោសរបស់ជនជាប់ចោទ រក្សាទុកដដែល និង ប្រកាសបិទផ្លូវតវ៉ា។
យោងតាមការសំណុំរឿងរបស់ចៅក្រមរបាយការណ៍ បានឲ្យដឹងថា ជនជាប់ចោទរូបនេះ មានឈ្មោះ ឌឹម មករា ភេទ ប្រុស អាយុ ៣៣ ឆ្នាំ មុខរបរ មុនចាប់ខ្លួន ជាមន្ត្រីនគរបាលផ្នែកអគ្គិភ័យ នៅខេត្តព្រៃវែង។
ចំណែកឯ ជនរងគ្រោះ មានអាយុ១៦ ឆ្នាំ ត្រូវជាសង្សាររបស់ជនជាប់ចោទ ឈ្មោះ ឌឹម មករា។
ឈ្មោះ ឌឹម មករា ត្រូវបានសាលាដំបូងខេត្តព្រៃវែង កាលពីឆ្នាំ ២០១៩ ផ្តន្ទាទោស ដាក់ពន្ធនាគារ កំណត់ ៨ ឆ្នាំ ពីបទ: សញ្ចរកម្ម មានស្ថានទម្ងន់ទោស ទាក់ទងនឹងជនរងគ្រោះ តាមមាត្រា ២៤១ និង ២៨៩ នៃក្រមព្រហ្មទណ្ឌ ។
តែគាត់ប្តឹងឧទ្ធរណ៍ ខណៈសាលាឧទ្ធរណ៍រាជធានីភ្នំពេញ បានតម្កល់ទណ្ឌកម្មរបស់គាត់ រក្សាទុកដដែល។ គាត់ក៏បន្តប្តឹងសាទុក្ខ មកតុលាការកំពូលទៀត។
ជនជាប់ចោទឈ្មោះ ឌឹម មករា ត្រូវបានចាប់ខ្លួនកាលពីថ្ងៃទី ១១ ខែ ឧសភា ឆ្នាំ ២០១៨ តាមបណ្តឹងរបស់កុមារីរងគ្រោះ។
យោងតាមពាក្យបណ្តឹងរបស់ជនរងគ្រោះ, ជនជាប់ចោទ បានចាប់បង្ខាំងជនរងគ្រោះ នៅក្នុងបន្ទប់ជួល អស់រយៈពេល ប្រហែល៤ខែ ដើម្បីរំ.លោភសេព.សន្ថវ: និង បានលក់ខ្លួនជនរងគ្រោះ ទៅរួមភេទ ជាមួយបុរសដទៃទៀត ដើម្បីរកលុយឲ្យជនជាប់ចោទ។ ក្រៅពីនោះ, ជនជាប់ចោទ ព្រមទាំងបានគំរា.មស.ម្លាប់ជនរងគ្រោះផងដែរ បើសិនជនរងគ្រោះ ប្រាប់រឿងរ៉ាវ របស់ខ្លួនទៅម្តាយ ឬអ្នកដទៃទៀត។
គួររំលឹកថា នាពេលសវនាការ កាលពីថ្ងៃទី០១ ខែ ធ្នូ ឆ្នាំ ២០២១, ជនជាប់ចោទ ឌឹម មករា បានឆ្លើយបដិសេធ ចំពោះការចោទប្រកាន់ និង និយាយថា គាត់មិនបានប្រព្រឹត្តអ្វីដូចការចោទគាត់ខាងលើនោះឡើយ ។
ទោះបីជាយ៉ាងណាក្តី, ឈ្មោះ ឌឹម មករា បានទទួលស្គាល់ថា ជនរងគ្រោះ និងខ្លួន គឺជាគូសង្សារនឹងគ្នា និងធ្លាប់បានរស់នៅជាមួយគ្នា នៅផ្ទះជួល នៅក្នុងខេត្តព្រៃវែង មុខពេលខ្លួន ត្រូវបានចាប់ឃាត់ខ្លួន។
ជនជាប់ចោទ ឌឹម មករា បានសំណូមពរដល់តុលាការកំពូល មេត្តាសម្រេច ទម្លាក់បទចោទប្រកាន់ និង ដោះលែង រូបគាត់ឲ្យមានសេរីភាពវិញ ៕
រក្សាសិទ្ធិដោយ ៖ ចន្ទា ភា