នេះជារឿងដ៏ភ្ញាក់ផ្អើលជាខ្លាំង បន្ទាប់ពីផុសរីករាលដាលមួយ ដែលអះអាងថា ភេសជ្ជៈដ៏ពេញនិយមនៅអាស៊ី «តែគុជ» ត្រូវបានធ្វើឡើងជាមួយលាមកពពែ។ តែទោះជាយ៉ាងណា ការបង្ហោះនេះ នៅពេលនេះ ត្រូវបានលុបចោលហើយ។
រូបភាពបង្ហាញសត្វពពែបន្ទោរបង់ចូលក្នុងកែវភេសជ្ជៈតែគុជ គឺត្រូវបានដឹងថា ត្រូវបានផ្សព្វផ្សាយនៅលើបណ្ដាញសង្គមតាំងពីឆ្នាំ ២០១៩ មកម្ល៉េះ។ តែទោះយ៉ាងណាក៏ដោយ AFP Fact Check បានបង្ហាញថា នេះជាការបង្ហោះអះអាងមិនពិត ដែលរូបសត្វពពែមួយ ត្រូវបានគេកាត់តដូចរូបជាក់ស្តែង។
សូមបញ្ជាក់ថា រូបភាពសត្វពពែ ដែលបង្ហោះអមជាមួយរូបភាព៣សន្លឹកនៃតែគុជ ត្រូវបានចែករំលែករាប់ពាន់ដងនៅលើហ្វេសប៊ុក ជាមួយនឹងការអះអាងថា លាមកសត្វពពែមានតម្រូវការខ្ពស់នៅក្នុងប្រទេសចិន។
យោងតាម AFP Fact Check ការបង្ហោះ Facebook ដែលត្រូវបានលុបនៅពេលនេះ បាននិយាយថា “លាមកពពែឥឡូវនេះមានតម្រូវការខ្ពស់នៅក្នុងប្រទេសចិន ដោយសារតែវាសម្បូរប្រូតេអ៊ីន។ វាត្រូវបានបម្រើក្នុងករណីភាគច្រើនជាមួយនឹងការផ្សំនៃទឹកផ្លែឈើ ទឹកដោះគោសណ្តែក និងសារធាតុចម្រាញ់ផ្សេងទៀត។
Liberia Billboard ស្ថិតក្នុងចំណោមអ្នកប្រើប្រាស់ Facebook ដែលបានចែករំលែកការបង្ហោះនោះ ដោយដាក់ចំណងជើងថា “លាមកសត្វចៀម និងពពែ កំពុងតែមានតម្រូវការនៅក្នុងប្រទេសចិន ដោយសារសម្បូរប្រូតេអ៊ីន តើអ្នកអាចផឹកទឹកនេះបានទេ?។
យោងតាម Lead Stories រូបថតរបស់ពពែដែលបញ្ចេញទៅក្នុងពែងតែគុជ បានមកពីវីដេអូរយៈពេល ១៤ វិនាទីនៃ “Pooping Goat” ដែលត្រូវបានបង្ហោះនៅលើ YouTube នៅថ្ងៃទី២០ ខែតុលា ឆ្នាំ ២០០៩ ។ ហើយរូបថតមុខនៃវីដេអូ ត្រូវបានកែសម្រួលដើម្បីបញ្ចូលគ្នា ដោយពែងតែគុជ ត្រូវបានកាត់តហាក់ដូចជាពពែកំពុងជុះដាក់នៅក្នុងភេសជ្ជៈអុីចឹង៕ រក្សាសិទ្ធិដោយ៖ លឹម ហុង
