លោក Vaughan Laws ជាអ្នកថតរូបជនជាតិអូស្ត្រាលីម្នាក់ ដែលមានចំណង់ចំណូលចិត្តក្នុងការ “បរបាញ់” ព្យុះ ពិតជាមានការភ្ញាក់ផ្អើលយ៉ាងខ្លាំងតែម្តង នៅពេលដែលគាត់បានឃើញអាកាសធាតុបង្ហាញសញ្ញាដ៏ចម្លែក គឺពពកមានរូបរាងដូចត្រីបាឡែន អុីចឹង។
រាល់ពេលដែល “ប្រមាញ់” ព្យុះម្តងៗ លោក Vaughan Laws សង្ឃឹមថានឹងចាប់យកពេលវេលាដ៏អស្ចារ្យនៃធម្មជាតិ។ ហើយករណីដ៏ចម្លែកនេះ គឺគាត់បានថតនៅក្នុងតំបន់ Frankston នៅជាយក្រុង Melbourne ប្រទេសអូស្ត្រាលី។ឮ
នៅពេលដែលគាត់បានឮការព្យាករណ៍អាកាសធាតុ និងដឹងថាមានព្យុះដ៏ធំមួយនឹងមកដល់ លោក Laws បានត្រៀមខ្លួនរួចជាស្រេចដើម្បីចេញទៅ “តាមប្រមាញ់” ព្យុះ។
ដោយផ្អែកលើបទពិសោធន៍ គាត់បានស្វែងរកឆ្នេរសមុទ្រ ដើម្បីចាប់យកពេលវេលាដ៏គួរឱ្យរំភើបបំផុត ប៉ុន្តែពេលនេះ ធម្មជាតិបានផ្តល់អំណោយដល់គាត់ដែលមិននឹកស្មានដល់ នៅពេលដែលគាត់បានឃើញពពករាងជាត្រីបាឡែនដ៏ធំ បានបង្ហាញខ្លួនផ្តេកលាតសន្ធឹងនៅជើងមេឃ។
ចែករំលែកអំពីពេលវេលាដ៏ពិសេសនេះ លោក Laws បាននិយាយថា៖ «ខ្ញុំដឹងថានឹងមានព្យុះដ៏ធំមួយ ដូច្នេះខ្ញុំត្រៀមខ្លួនជាស្រេចដើម្បីស្វែងរកពេលវេលាដ៏គួរឱ្យចាប់អារម្មណ៍មួយ ប៉ុន្តែខ្ញុំពិតជាមិននឹកស្មានថាខ្ញុំនឹងជួបករណីនេះទេ។ វាជាពេលវេលាដ៏អស្ចារ្យ ដែលខ្ញុំទទួលបានបទពិសោធន៍នៃអាកាសធាតុផ្តល់ឱ្យខ្ញុំនូវកម្រិតដ៏រំភើប។ ខ្ញុំតែងតែចាប់អារម្មណ៍នឹងការ «បរបាញ់» សម្រាប់ពេលវេលាបែបនេះ»។
ទោះបីជាគាត់បានថតរូបរាប់ម៉ឺនសន្លឹកក៏ដោយ ប៉ុន្តែសម្រាប់លោក Laws នេះគឺជារូបថតដែលគួរអោយចាប់អារម្មណ៍បំផុត ក្នុងអាជីពរបស់គាត់៕ រក្សាសិទ្ធិដោយ៖ លឹម ហុង
