អភិបាលខេត្តមួយរូបបានឱ្យដឹងថា ចំនួនអ្នកស្លាប់ដោយសារខ្យល់ព្យុះកំបុតត្បូងដ៏ខ្លាំងក្លាដែលបានបំផ្លិចបំផ្លាញទីក្រុងនានាក្នុងរដ្ឋ Kentucky សហរដ្ឋអាមេរិក អាចនឹងកើនឡើងលើស១០០ នាក់។ ខណៈក្តីសង្ឃឹមនៃការស្វែងរកអ្នកនៅរស់រានមានជីវិតហាក់ធ្លាក់ចុះជាខ្លាំង។
លោក Andy Beshear អភិបាលរដ្ឋ Kentucky បាននិយាយថា នេះគឺជាហេតុការណ៍ព្យុះកំបុតត្បូងដ៏បំផ្លិចបំផ្លាញធំបំផុតនៅក្នុងប្រវត្តិសាស្ត្ររបស់រដ្ឋ Kentucky ដោយមានអ្នកស្លាប់យ៉ាងតិច 80 នាក់។ក្នុងនោះ មនុស្សចំនួន១៤នាក់ស្លាប់បន្ថែមទៀត ត្រូវបានរាយការណ៍នៅក្នុងរដ្ឋចំនួន៤ ផ្សេងទៀត។
ទន្ទឹមនេះ ប្រធានាធិបតីអាមេរិកលោកចូ បៃដិនបានប្រកាសអំពីគ្រោះមហន្តរាយដ៏ធំមួយនៅក្នុងរដ្ឋ Kentucky ហើយបានបញ្ជាឱ្យផ្តល់ជំនួយសហព័ន្ធដល់តំបន់ដែលរងគ្រោះខ្លាំងបំផុត។ ក្រៅពីនេះ បុគ្គលិកជួយសង្គ្រោះបានបន្តរុករកកំទេចកំទីអ្នកនៅដែលមានជីវិតរស់ ខណៈដែលក្រុមជួយសង្គ្រោះនេះក៏បានចែកចាយទឹក និងម៉ាស៊ីនភ្លើងដល់ប្រជាពលរដ្ឋប្រើប្រាស់ផងដែរ។ បន្ថែមពីនេះ សមាជិកក្រុមជួយសង្គ្រោះជាតិជាង៣០០នាក់ បានបន្តរើកំទេចកំទីចេញពីទៅផ្ទះមួយទៅផ្ទះមួយ។
អភិបាលក្រុងខាងដើម បានបញ្ជាក់នៅក្នុងដំណើរត្រួតពិនិត្យនៅទីក្រុង Mayfield ដែលជាតំបន់រងគ្រោះខ្លាំងបំផុតមួយថា ៖«យើងនៅតែសង្ឃឹម ហើយយើងត្រូវឆ្ពោះទៅមុខសម្រាប់អព្ភូតហេតុមួយចំនួន ដើម្បីស្វែងរកមនុស្សបន្ថែមទៀត។»ទោះជាយ៉ាងនេះក្តី គេមិនបានរកឃើញអ្នករស់រានមានជីវិតនោះទេចាប់តាំងពីព្រឹកថ្ងៃសៅរ៍មក។
លោក Beshear បានបន្តថា ខ្យល់ព្យុះកំបុតត្បូងនេះបានបំផ្លាញកន្លែងទាំងអស់ប្រមាណ ២៧៧ម៉ាយរឺស្មើ ៣៦៥គីឡូម៉ែត្រ ខណៈមនុស្សរាប់ពាន់នាក់ត្រូវបានបាត់បង់ផ្ទះសម្បែង បើទោះជាចំនួនពិតប្រាកដនៅមិនទាន់ដឹងច្បាស់ក៏ដោយ។កាលពីមុន ខ្យល់ព្យុះកំបុតត្បូងដែលវែងបំផុតបានធ្វើដំណើរក្នុងសហរដ្ឋអាមេរិក គឺរយៈប្រវែង២១៩ម៉ាយក្នុងរដ្ឋ Missouri កាលខែមីនា ឆ្នាំ ១៩២៥ ដែលបានឆក់យកជីវិតមនុស្សចំនួន៦៩៥នាក់។ ក្នុងហេតុការណ៍ធំៗបែបនេះ គឺកើតមានឡើងនៅក្រោយខែនិទាឃរដូវ និងរដូវក្តៅ ព្រោះរដូវពីរនេះ កម្រកើតមានណាស់៕ ប្រភព៖ A24 NEWS