ភ្នំពេញ ៖ កម្លាំងកងរាជអាវុធហត្ថរាជធានីភ្នំពេញ នៅល្ងាចថ្ងៃទី១៥ ខែធ្នូ ឆ្នាំ២០២១ នេះ បានចុះបង្ក្រាប ឃ្លាំងមួយកន្លែងពាក់ព័ន្ធការបើកល្បែងស៊ីសងខុសច្បាប់ ទ្រង់ទ្រាយធំ ស្ថិតនៅលើផ្លូវបេតុង ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ ។
តាមសេចក្ដីរាយការណ៍ពីក្រុមការងារ ដែលកំពុងនៅកន្លែងកើតហេតុ បានឲ្យដឹងថា នៅពេលនេះសមត្ថកិច្ចកំពុងតែប្រតិបត្តិការនៅឡើយ ដោយមិនអនុញ្ញាតឲ្យអ្នកសារពព័ត៌មាន ចូលខាងក្នុងទេ ពោលគឺបានត្រឹមឈរយកព័ត៌មានពីខាងក្រៅ ។
ប៉ុន្តែតាមប្រភពព័ត៌មាន បានទម្លាយដឹងថា ក្នុងឃ្លាំងនេះបើកលេងបៀជាច្រើនវង់ ។ ក្នុងប្រតិបត្តិការនេះ សមត្ថកិច្ច រកឃើញអ្នកពាក់ព័ន្ធប្រមាណជិត៣០នាក់ ប៉ុណ្ណោះ។
បច្ចុប្បន្នជនញៀនល្បែងប្រុសស្រីទាំង៣០នាក់ខាងលើ ត្រូវបានបញ្ជូនទៅកាន់អាវុធហត្ថរាជធានីភ្នំពេញ ចាត់ការបន្តតាមនីតិវិធី៕ រក្សាសិទ្ធិដោយ ៖ សួង សាម
