ភ្នំពេញ ៖ មន្ត្រីសមត្ថកិច្ចនៅច្រកដូងបានទម្លាយឲ្យដឹងថា លោក ឆេង សាវិន មេគយច្រកដូង បានរងការចោទប្រកាន់ថា បើកដៃឲ្យវៀតណាមនាំទំនិញចូកតាមប៉ុស្តិ៍ច្រកទ្វារតំបន់ព្រំដែនដូង ដូចជា តុ ទូ ដែក ក្រឡាក្រួច កៅអីជ័រ ទុយោទឹកជ័រ ធុងជ័រ ម៉ូទ័រ ពូក សំបក កង់ម៉ូតូ និងគ្រឿងសំណង់ គ្រប់ប្រភេទ ដោយគ្មានការត្រួតពិនិត្យឲ្យបានត្រឹមត្រូវនោះទេ។ ហើយគ្មានវិធានការលើរថយន្តដឹកទំនិញសំពីងសំពោង និងលើសទម្ងន់ធ្វើឲ្យខូចផ្លូវកៅស៊ូ ដែលទើបតែសាងសង់រួចថ្មីៗ។
បើតាមតាមប្រភពពីក្រុមអាជីវករ និងមន្ត្រីសមត្ថកិច្ចបានឲ្យដឹងថា ទំនិញដែលដឹកចេញពីកម្ពុជាចូលទៅប្រទេសវៀតណាម គឺភាគីវៀតណាមមិនអនុញ្ញាត ឲ្យខ្មែរនាំទំនិញចូលនោះទេ។ តែបើទំនិញវៀតណាមចូលមកកម្ពុជាវិញ បានដោយគ្មានការហាមឃាត់នោះទេ។ ហើយទំនិញដែលនាំពីវៀតណាម ចូលកម្ពុជាតាមប៉ុស្តិ៍ច្រកទ្វារតំបន់ព្រំដែនដូង មានដូចជា តុ ទូ ដែក ក្រឡាក្រួច កៅអីជ័រ ទុយោទឹកជ័រ ធុងជ័រ ម៉ូទ័រ ពូក សំបក កង់ម៉ូតូ និងគ្រឿងសំណង់ គ្រប់ប្រភេទ ជាប្រភពចំណូលដល់លោក ឆេង សាវិន មេគយច្រកដូងនិងបក្ខពួករបស់ខ្លួន។
សេចក្តីរាយការណ៍ពីក្រុមអាជីវករខ្មែរ បានឲ្យដឹងថា មានមន្ត្រីគយដាក់ប៉ុស្តិ៍បង់ពន្ធបណ្តាក់គ្នាដូចខ្យង គឺប៉ុស្ត៍ការិយាល័យ គយ និងរដ្ឋាករ ច្រកទ្វារតំបន់ព្រំដែនដូង ប៉ុស្តិ៍សាខាគយខេត្ត និង ប៉ុស្ត៍គយចល័ត មានបង់ពន្ធហើយ មានទារបង់ថ្លៃបាយថ្លៃកាហ្វេទៀត។ ហើយក្រុមឈ្មួញដឹកទំនិញទាំងតូច ទាំងធំ បើមិនបង់តាមការកំណត់នោះទេ គឺមិនអាចដឹកទំនិញដល់គោលដៅបានឡើយ។
ក្រុមអាជីវករបានសំណូមពរ ដល់អភិបាលខេត្តស្វាយរៀង ក៏ដូចជាមេគយ ពិនិត្យមើលករណីនេះផង កុំបណ្តែតបណ្តោយឲ្យលោក ឆេង សាវិន មេគយច្រកដូង និងបក្ខពួកធ្វើអ្វីស្រេចតែចិត្ត។
ទាក់ទងការចោទប្រកាន់ខាងលើនេះ លោក ឆេង សាវិន មេគយច្រកដូង មិនអាចសុំការអត្ថាធិប្បាយបានទេ៕ រក្សាសិទ្ធិដោយ ៖ ចេស្តារ
