នេះជារឿងមួយដ៏គួរឲ្យសោកស្តាយជំនួសខ្លាំងណាស់ ដែលម្ចាស់ផ្ទះមានមុខរបស់វេប្រាក់តាមសេវាកម្មវីងផង និងលក់ភេសជ្ជៈផងមួយកន្លែង នៅក្នុងសង្កាត់ព្រៃស ខណ្ឌដង្កោ ត្រូវបានក្រុមចោរ៣នាក់ ប្រើល្បិចចូលប្រមូលលុយអស់ជិត ៧ ពាន់ដុល្លារ យកទៅបាត់ដោយសុវត្ថិភាព។
តាមរយៈវីដេអូ ដែលម្ចាស់ផ្ទះរងគ្រោះបានបង្ហោះបានបង្ហាញឲ្យឃើញថា ចោរ៣នាក់ បានជិះម៉ូតូ ក្នុងនោះម្នាក់ជិះ១គ្រឿង និង២នាក់ទៀតជិះឌុបគ្នា១គ្រឿង ដោយជិះចុះជិះឡើង ដើម្បីមើលឱកាសថាតើម្ចាស់ផ្ទះនៅម្នាក់ឯងឬក៏អត់ ហើយពេលឱកាសហុចឲ្យ ក្នុងនោះម្នាក់ក្នុងចំណោមពួកគេ បានជិះម៉ូតូ Zoomer ធ្វើជាមកទិញភេសជ្ជៈនៅខាងមុខច្រើនមុខ ដើម្បីបំភាំងស្មារតីម្ចាស់ផ្ទះ ខណៈគ្នាវាម្នាក់ទៀតលបដើរចូលទៅប្រមូលលុយពីក្នុងកិកតុយ៉ាងប្រញ៉ាប់ប្រញាល់ រួចឡើងម៉ូតូជិះចាកចេញដោយសុវត្ថិភាព។
នេះបើតាមម្ចាស់ផ្ទះរងគ្រោះដែលមានគណនីហ្វេសប៊ុកឈ្មោះ Peuv Long បានបង្ហោះឲ្យឃើញមុខចោរម្នាក់យ៉ាងច្បាស់ៗ ជាមួយវីដេអូកាមេរ៉ាសុវត្ថិភាព និងរៀបរាប់ឲ្យដឹងថា៖ «នេះជាសកម្មភាពរបស់អាពួក ដែរចាំតែបន្លំ និង លួចលុយទ្រព្យសម្បត្តិរបស់គេ។ ថ្ងៃ24/12/2021 វេលា ម៉ោង9:34 ព្រឹកនេះ គ្រួសារខ្ញុំបាទបានត្រូវពួកអាចោរ ប្រើប្រាស់ល្បិចកល មកលួច លុយអសជិត7000$ តាមសកម្មភាព ដូចវីដេអូ ដែលបានshared។
ពួកយើងបានដាក់ពាក្យបណ្ដឹងទៅប៉ូលិសប៉ុស្តិ៍ព្រៃស រួចដែរហើយ ។ សូមបងប្អូនជួយ share ផងដើម្បីជួយចាប់ពួកក្រុមជនល្មើសដើម្បី អោយច្បាប់កាត់ទោសពួកវានិងកុំឲ្យពួកវាដើរប្រព្រឹត្តិទង្វើនេះទៅលើអ្នកផ្សេងទៀត។ សូមបងប្អូនដែលរកស៊ី របរដូចគ្នានេះ សូមអោយមានការប្រុងប្រយ័ត្នខ្ពស់ កុំឲ្យជួបនៅបញ្ហាដូចពួកខ្ញុំ។»៕ រក្សាសិទ្ធិដោយ៖ លឹម ហុង
